Vise-MAE inaugura edifisísiu postu administrativu Maucatar
COVALIMA, 14 novembru 2022 (TATOLI)—Vise-Ministru Adminisrasaun Estatál (MAE), Lino de Jesus Torrezão, segunda ne’e, akompañadu hosi administradór munisípiu Covalima inuagura konstrusaun edifísiu postu administrativu Maucatar hafoin Kompañia Sabudoi Unipesoál, Lda, finaliza konstrusaun.
Notísia Relevante: MAE sei inaugura edifísiu postu administrativu Maucatar iha 14 novembru
“Iha administrasaun ita presiza fasilidade ne’ebé di’ak no presiza edifísiu ba administrasaun, nune’e funsionáriu ne’ebé hakna’ar an servisu iha administrasaun públika bele asegura servisu la’o. Tanba ne’e, ita mai hamutuk iha ne’e atu sai sasin, Maucatar bele hetan edifísiu di’ak hanesan agora daudaun ne’e,” Vise- Ministru Adminisrasaun Estatal (MAE), Lino de Jesus Toerezão, hateten hafoin inaugura edifísiu postu administrativu Maucatar.
Inaugurasaun ne’e bele asegura ona funsionáriu hotu ne’ebé mak atu hala’o servisu maske iha ona edifísiu, maibé nafatin iha ezijénsia presiza tan fasilidade hodi asegura atendimentu públiku ba komunidade.
Edifísiu postu administrativu Maucatar hanesan uma lulik ida atu halo atendimentu públiku ba komunidade espesiál komunidade iha postu administrativu Maucatar.
Administrasaun munisípiu presiza kompeténsia ne’ebé entrega ona bazea ba dekretu-lei númeru 3/2016, kompeténsia ba administradór postu servisu estensaun ne’ebé administradór kaer fó ona.
Administradór munisípiu Covalima, Francisco de Andrade, hato’o agradesimentu ba VIII Governu Konstituisionál liuhosi Ministru Administrasaun Estatál ne’ebé halo esforsu durante viabilisa Governu hodi hatudu ona nia rezultadu signifikante.
“Ita halo inagurasaun edifísiu postu administrativu Maucatar ida-ne’e tanba durante funsionáriu sira ladun disiplina razaun edifísiu ladun favorabel atu servi.maibé agora ita halo ona inaugurasaun edifisiu ho nia kapasidade bele akumula funsionáriu 100-resin. Tanba ne’e ha’u sei mai kontrola funsionáriu sira, labele funsionáriu nonook fila ba uma fulan simu osan iha banku,” nia dehan.
Iha postu administrativu Maucatar eis adminisradór na’in-rua iha esperiénsia ajuda administradór Constantino do Carmo, nune’e haree ba administrasaun postu Maucatar diferénsia ho postu administrativu sira seluk iha Covalima.
Autoridade ne’e husu ba funsionáriu nu’udar hanesan veteranu sira tenke sai ezemplu ba funsionáriu sira seluk labele servisu tuir-nia hakarak tanba lei mak regula.
Nia mós hato’o parabéns ba Kompañia Sabodoi Unipesoál, Lda, ne’ebé konstrui edifísiu ho kualidade ne’ebé di’ak.
Administradór postu administrativu Maucatar, Constantino do Carmo, hateten postu adminisrativu Maucatar marka istória foun liuhosi polítika VIII Governu Konstitusionál hodi konstrui edifísiu, tanba ne’e enkoraja funsionáriu sira badinas atu halo servisu.
“Ita hotu orgulu tanba esforsu bo’ot mai hosi Ministériu Administrasaun Estatál tanba ne’e fusionáriu sira tenke tau responsabilidade liuhosi ita-nia servisu. Ha’u enkoraja ha’u-nia funsionáriu hotu badinas atu hala’o servisu labele baruk atu servisu tanba servisu fatin espasu lato’o,” nia informa.
Tuir dekretu-lei númeru 3/2016, administradór postu administrativu hanesan reprezentante direta administradór munisípiu, autoridade postu mós hato’o agradese ba administradór sesante nia servisu
“Ha’u hato’o agradese no orgullu ba administradór sesanta nia servisu, nune’e ha’u mai hatutan nia servisu. Tuir loloos konstrusaun finaliza iha fulan haat ba kotuk maibé impkatu hosi natureza kompañia foin mak finaliza no inaugura agota,” nia esplika.
Enkuantu, Projetu PDIM tinan fiskal 2021 ne’ebé implementa iha munisípiu Covalima mak hanesan projetu konstrusaun edifísiu postu administrativu Maucatar finaliza no halo ona inagura no konstrusaun rezidénsia administradór munisípiu Covalima ne’ebé nia progresu konstrusaun 83,8%.
Antes ne’e, administradór munisípiu Covalima Francisco de Andrade hatuur fatuk dahuluk konstrusaun edifísiu postu administrativu Maucatar, iha loron 05 fulan-Janeiru tinan 2021, ne’ebé konstrui hosi kompañia Sabudoi Unipesoál, Lda, ne’ebé konstrusaun ho nia durasaun tempu durante fulan neen (6), ho orsamentu mai hosi 2021 ho montante $164,861.91.
Jornalista : Celestina Teles
Editór : Cancio Ximenes
