PN aprova OJE 2023 ba MPM millaun $74-resin ho votu a-favór 40

DILI, 15 novembru 2022 (TATOLI)—Parlamentu Nasionál (PN) aprova proposta-lei Orsamentu Jerál Estadu (OJE) 2023 ho montante $74,120,903 ba iha Ministéiru Petróliu no Minerál (MPM) iha espesialidade ho votu a-favór 40, kontra 0 no abstensaun 18.
“OJE 2023 ba MPM ho alterasaun introduzida aprovadu,” Prezidente Parlamentu Nasionál, Aniceto Longuinhos Guterres Lopes, hateten iha debate proposta-lei OJE 2023 iha espesialidade ba loron dahaat iha sala plenária PN, tersa ne’e.
Montante orsamentu ne’e sei implementa programa jestaun rekursu petróliu no minerál $56,043,907 ho sub-programa dezenvolvimentu polítika no lejislasaun ho atividade tolu (3), sub-programa implementasaun inisiativa transparánsia indústria extrativa Timor-Leste ho atividade tolu (3), sub-programa jestaun patrimóniu petróliu ho atividade ida (1), sub-programa kompañia nasionál mineira ho atividade ida (1).
Programa boa-governasaun no jestaun instituisionál $18,076,996, ho sub-programa tolu (3) no atividade 12.
Antes ne’e, iha loron 14 novembru 2022, deputadu Maria Angelica Rangel (Fretilin), Antoninho Bianco (Fretilin), António da Conceição (PD) aprezenta proposta númeru 27 títulu Ministéiru Finansa iha programa jestaun finansa públika, sub-programa arekadasaun impostu no taxa hasai $1.500.000 no programa boa-governasaun no jestaun instituisionál, sub-programa jestaun instituisionál hasai $1.500.000, nune’e totál millaun $3 hodi tau ba iha Ministéiru Petróliu no Minerál (MPM), iha programa jestaun rekursu petrolíferu no minerál, sub-programa kompañia nasionál mineira nia atividade estabelesimentu no operasionalizasaun kompañia nasionál.
Proposta ne’e aprovadu ho votu a-favór 33, kontra 12 no abstensaun 17, nune’e montante orsamentu inisiál ho alterasaun ba MPM sei iha númeru aumenta.
Notísia Relevante: PN ko’a millaun $4-resin hosi Ministériu Finansa iha OJE 2023
Jornalista : Nelson de Sousa
Editór : Cancio Ximenes

