iklan

DILI, POLÍTIKA

SASCAS hetan redusaun millaun $2 aloka ba Ministériu Finansa

SASCAS hetan redusaun millaun $2 aloka ba Ministériu Finansa

Imajen/Media PR.

DILI, 15 novembru 2022 (TATOLI)—Parlamentu Nasionál (PN) aprova proposta Orsamentu Jerál Estadu (OJE) ba Serbisu Apoiu Sosiedade Sivíl no Auditória Sosiál (SASCAS) iha espesialidade no hetan redusaun millaun $2 ba Ministériu Finansa.

Notísia Relevante: PN ko’a millaun $4-resin hosi Ministériu Finansa iha OJE 2023

“Rezultadu votasaun proposta OJE 2023 ba SASCAS ho sofre alterasaun (proposta númeru 90) a-favór 40, kontra 0, abstensaun 21,” Prezidente PN, Aniceto Longuinhos Guterres Lopes, fó sai iha debate proposta OJE 2023 iha espesialidade ba loron dahaat iha sala plenária PN, tersa ne’e.

Iha debate ne’e, deputadu Helena Martins ho Antoninho Bianco (Fretilin) hato’o proposta númeru 66 títulu Serbisu Apoiu Sosiedade Sivíl no Auditória Sosiál iha programa igualidade jéneru no inkluzaun sosiál hasai millaun $1 hodi tau fali ba iha Fundu Dezenvolvimentu Kapitál Umanu (FDCH, siglá portugés) iha programa bolsu estudu, sub-programa MS-bolsu estudu, atividade Kuba medisina espesialista.

“Proposta ne’e objetivu atu haruka ita-nia médiku 40 ba hasai espesialista iha 2023 hanesan tinan ne’e ita haruka na’in 30 ona, nune’e orsamentu ne’e atu haruka médiku hanesan uluk iha primeiru Governu ita hala’o ona tanba ita mehi tinan-tinan ita nia pasiente sai ba li’ur, nune’e reforsa saúde nivel nasionál ami reforsa mai foti hosi ne’e tau ba  FDCH,” Antoninho Bianco fundamenta.

Proposta daruak númeru 90 hosi deputada (PLP), Maria Angelina Sarmento, hateten proposta ne’e atu re-organiza orsamentu proposta númeru 27 ne’ebé antes ne’e PN aprova hosi Ministéiru Finansa (MF) hetan redusaun, nune’e hosi fundu sosiedade sivíl re-organiza ba fali MF hodi repoin fali hosi SASCAS hodi re-kontribui fali.

“Proposta OJE 2023 ba SASCAS por volta millaun $9-resin finansia atividade barak se ita hasai millaun $2 klaru sei prezudika atividade,” nia hateten.

Nune’e, proposta ne’e repoin fali orsamentu millaun $2 hosi SASCAS hodi tau fali ba MF tanba antes ne’e hetan ko’a hodi aloka ba ministéiru seluk.

Ministra Saúde (MS), Odete Maria Freitas, hateten  proposta dahuluk ne’e presiza duni orsamentu ituan haruka estudante sira foti espesialista no durante ne’e mós haruka ba iha Fiji.

“Orsamentu ne’ebé aloka ba FDCH asesu orsamentu uitoan maibé ami hasoru ho ministru MESSK ho Ministru Justisa  prontu re-aloka orsamentu uitoan ba Ministéiru Saúde hodi hatán ba kestaun ne’ebé deputadu sira foti,” nia esplika.

Primeiru-Ministru (PM), Taur Matan Ruak, hateten iha dotasaun Ministériu Finansa nian retiradu balun ita la repoin, nia iha difikuldade boot liu-liu akizisaun mákina X-Ray no sira seluk tau iha fronteira.

Nune’e, Primeiru-Ministru hateten ho orsamentu ne’ebé SASCAS kontribui ba fali MF mak SASCAS altera projetu foun iha tinan oin no mantein de’it projetu tuan ne’ebé la’o hela hodi ajusta millaun $2.

“Tanba ne’e, hau aseita,” Primeiru-Ministru, Taur Mata Ruak, hateten.

Ministru Finansa, Rui Augosto Gomes, agradese ba proposta hodi SASCAS dispoin millaun $2 ba MF retira hosi konfisaun relijiozu konsege repoin hodi rekupera orsamentu ne’ebé MF hetan ko’a.

Ho esplikasaun Governu nian, nune’e proponente deside retira proposta númeru 66, hodi kontinua avansa votasaun proposta númeru 90.

Rezultadu votasaun proposta númeru 90 ho votu a-favór 50, kontra neen (6) no abstensaun lima (5) ho ida-ne’e aprovadu.

Tuir justifikasaun proposta ne’e rekere reabertura votasaun foun proposta OJE 2023 ba MF sofre alterasaun ho proposta 90 ne’e rezultadu a-favór 37, kontra 0 no abstensaun 24.

“Proposta OJE 2023 ba Ministéiru Finansa ho alterasaun introduzida aprovadu,” Prezidente PN hatetetn.

PN mós aprova proposta OJE 2023 alterasaun orsamentu dotasaun jerál Estadu ne’ebé sofre alterasaun ho proposta 90, a-favór 39, kontra 0 no abstensaun 22.

Entertantu, proposta OJE 2023 SASCAS prevee montante inisiál $10,717,247 hodi implementa programa boa-governasaun no jestaun instituisionál $ 863,100, ho sub-programa ida (1) no atividade ida (1).

Programa igualidade jéneru no inkluzaun sosiál $9,854,147, ho sub-programa auditoria sosiál ho atividade ida (1), sub-programa finansiamentu organizasaun rezisténsia ho atividade rua (2), sub-programa koordenasaun apoiu serbisu sosiedade sivíl ho atividade ida (1), sub-programa finansiamentu instituisaun konfisaun relijioza ho atividade ida (1), sub-programa finansiamentu sosiedade sivíl ho atividade ida (1).

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!