COVALIMA, POLÍTIKA

KFP avalia no identifika profesór sira hala’o servisu administrasaun iha AMC

KFP avalia no identifika profesór sira hala’o servisu administrasaun iha AMC

Administradór munisípiu Covalima, Francisco de Andrade, akompañadu hosi prezidente KFP fò pose ba xefe departamentu sira iha Covalima. Imajen Tatoli /Celestina Teles.

COVALIMA, 16 novembru 2022 (TATOLI)–Prezidente Komisaun Funsaun Públika, Faustino Cardoso, identifika diretór Eskola Bázika ho koordenadór filiál halo avaliasaun dezempeñu ba profesór sira hala’o servisu administrasaun iha Administrasaun Munisípiu Covalima (AMC).

“Diretór rekursu umanu administrasaun munisípiu Covalima, Jacinto dos Santos, haree ba ha’u iha Fohorem bainhira profesór hala’o servisu iha administrasaun maibé avaliasaun dezempeñu hala’o hosi diretór EBC no koordenadór filiál, ne’e problema,” Faustino Cardoso hato’o asuntu ne’e liuhosi nia diskursu bainhira partisipa serimónia fó pose ba xefe departamentu sira, iha salaun AMC, Sukaer Laran, kuarta ne’e.

KFP identifika diretór Eskola Bázika ho koordenadór filiál halo avaliasaun servisu ba profesór sira-ne’ebé presta servisu iha administrasaun bainhira nia halo vizita ba iha postu administrativu Fohorem.

Ho problema sira-ne’e, nia mós husu diretór rekursu umanu administrasaun munisípiu covalima atu haree, tanba profesór sira servisu iha administrasaun, maibé diretór EBC ho koordenadór filial halo avaliasaun desempeñu ne’e problema.

“Ita-boot sira haree ba ema ida hosi fatin seluk halo avaliasaun ba ema ida-ne’ebé servisu iha fatin seluk ne’e laiha sentidu, tanba ne’e presiza atu hadi’a. Profesór sira servisu ona iha jestaun administrasaun entaun administradór mak sei halo avaliasaun la’ós diretór no koordenadór filiál ni’an, ida-ne’e mak ha’u hakarak alerta,” nia dehan.

Administradór Munisípiu Covalima, Francisco de Andrade, rekuñese uluk diretór Eskola Bázika ho koordenadór filiál halo avaliasaun dezempeñu ba profesór sira-ne’ebé hala’o serivusu iha administrasaun tanba sira seidauk intende lei.

“Ita hatene oras ne’e daudaun profesór sira-ne’ebé destaka, maibé ho rejime espesiál nafatin hanesan profesór servisu mak destaka mai iha administrasaun, tanba ne’e ba oin avaliasaun dezempeñu ne’e la’ós ona, hala’o hosi sira-nia diretór maibé hosi administradór sira,” nia hateten.

Konaba preokupasaun prezidente komisaun Funsaun Públiku (KFP), la’ós akontese iha tinan ne’e tanba tinan ida halo avaliasaun dala-ida hanesan avaliasaun 2021 hala’o iha tinan 2022.

Tuir dadus, profesór ne’ebé servisu destaka iha administrasaun profesór na’in-lima (5) ho nune’e prezidente KFP ho nia-ekipa mai iha Covalima husu oinsá la prejudika prosesu aprendizajen ba labarik sira.

Tanba, eskola hanesan instituisaun kiik-ida iha Covalima, maibé administrasaun ne’e kobre povu tomak no atu halo atende ema rihun tomak maibé eskola atende de’it na’in-2000 ne’e.

“Ha’u haruka profesór destaka servisu mai iha administrasaun haree mós ba sira-nia nivél edukasaun, ba sira-ne’ebé nivél edukasaun iha área edukasaun, ha’u la foti. Maibé sira-nia nivél edukasaun iha área siénsia governametál, administrasaun públiku, ekonomia, ita halo sira destaka mai iha ne’e hodi okupa kargu xefe departamentu tanba haree ba rekursu umanu minímu tebes atu prenxe rekezitu tuir KFP,” nia dehan.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!