iklan

NASIONÁL, HEADLINE, POLÍTIKA

MAE avalia kondisaun mínima iha munisípiu hodi implementa poder lokál

MAE avalia kondisaun mínima iha munisípiu hodi implementa poder lokál

Ministru Administrasaun Estatál, Miguel Pereira de Carvalho. Imajen Tatoli/António Daciparu

DILI, 16 novembru 2022 (TATOLI)—Governu liuhosi Ministériu Administrasaun Estatál (MAE) iha tinan oin sei halo halo avaliasaun ba kondisaun mínima iha munisípiu 13 hodi haree munisípiu ne’ebé iha ona kondisaun atubele implementa poder lokál.

“MAE nia prioridade iha ámbitu desentralizasaun poder lokál mak atu transforma munisípiu sira hodi forma ba administrasaun indireta Estadu inklui prepara munisípiu sira liuhosi kondisaun mínima hodi bele transforma ba poder lokál,” Ministru Administrasaun Estatál, Miguel Pereira de Carvalho, hateten iha Parlamentu Nasionál (PN), kuarta ne’e.

Notísia relevante: Estadu garante desentralizasaun administrativu promove dezenvolvimentu Timor-Leste

Maski nune’e, eleisaun ba poder lokál provavelmente labele realiza iha tinan 2023 tanba Governu foin mak submete lei finansa munisipál ba PN no sei realiza eleisaun parlamentár no eleisaun.

MAE prevee ona orsamentu millaun $19 iha Orsamentu Jerál Estadu (OJE) 2023 ba realizasaun parlamentár no eleisaun suku iha tinan 2023.

Notísia relevante: OJE 2023: STAE prevee millaun $10 no $9 realiza eleisaun parlamentár-xefe suku

“Ami propoin orsamentu MAE hamutuk millaun $113 ba tinan 2023. Ami mós propoin orsamentu millaun $19 atu realiza eleisaun parlamentár no eleisaun suku iha tinan oin,” nia akresenta.

Governante ne’e dehan, tanba eleisaun rua ne’e sei realiza maka órgaun eleitorál sira presiza rekursu no tempu.

“Iha tempu hanesan, iha tinan oin ami kontinua halo esforsu hotu ba rekursu finanseiru, rekursu umanu no rekursu patrimoniál hodi kontinua rekursu alokadu ba munisípiu sira, nune’e munisípiu sira iha kondisaun natón hodi nune’e bele ezerse kompeténsia daudaun no preparadu ona bainhira transforma poder lokál sira prontu fó apoiu ba rezidente munisípiu no deputadu munisipál sira,” nia tenik.

Preparasaun polítika desentralizasaun 

Konseitu desentralizasaun rasik la’ós atu loke instituisaun barak iha munisípiu, maibé atu hakbesik Governu sentrál ba povu, tanba ne’e presiza hakbiit liután rekursu umanu sira iha área administrasaun no jestaun.

Dezde tinan-2003 to’o agora, Governu halo preparasaun ba polítika desentalizasaun no halo sosializasaun molok implementa polítika desentralizasaun, bazea ba Konstituisaun Repúblika Demokrátika Timor-Leste (RDTL) artigu 72 no Planu Estratéjiku Dezenvolvimentu Nasionál (PEDN).

Artigu 72 konstituisaun RDTL hakerek kona-ba podér lokál iha alínea 1 haktuir, sei harii kbiit lokál ho ema koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak  kona-ba solusaun problema rasik iha sira-nia komunidade no atu promove dezenvolvimentu lokál no la afeta partisipasaun Estadu nian.

Nune’e mós, iha alínea 2 husi artigu hanesan hateten, organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Antes ne’e, Governu anteriór fó ona delegasaun kompeténsia ba munisípiu Baucau, Bobonaro, Dili no Ermera.

Iha PEDN kapítulu IV haktuir, desentralizasaun ninia prinsípiu maka atu dezenvolve setór privadu, promove instituisaun forte no lejítimu iha nasaun tomak ho estável no mós iha oportunidade partisipasaun demokrátika.

Iha tinan-2016, Governu kontinua polítika desentralizasaun maibé la liuhosi eleisaun munisipál tanba lei laiha, ne’e duni Governu halo esforsu hodi kontinua preparasaun mak iha dekretu lei númeru: 3/2016 ne’ebé alteradu ho dekretu lei númeru 9/2018, ne’ebé mensiona katak preparasaun sei liuhosi deskonsentrasaun administrativa, katak tau munisípiu hanesan administrasaun direta hosi Estadu.

Enkuantu, desentralizasaun innstitusionál, hatúr munisípiu nu’udár administrasaun indireta husi Estadu no desentralizasaun territoriál hatúr munisípiu sira nu’udár Governu lokál ida ho ninia asembleia munisipál.

Rezolusaun apoia polítika desentralizasaun

Iha loron 5 marsu 2019, VIII Governu Konstitusionál liuhosi enkontru Konsellu Ministru, aprova rezolusaun ida hodi fó apoiu polítika implementasaun desentralizasaun administrativa ba munisípiu sira seluk.

MAE submete rezolusaun ne’e hodi kesi ministériu ne’e ho ministériu relevante hodi fó apoiu ba prosesu desentralizasaun hodi bele la’o ho efetivu, nune’e tinan haat to’o lima mai bele atinje objetivu podér lokál iha munisípiu sira tuir artigu 72 Konstituisaun.

Nune’e mós, iha aprezentasaun orsamentu 2020, dahuluk, Primeiru-Ministru, Taur Matan Ruak, afirma iha tinan ne’e, Governu prevee ona orsamentu atu fortifika polítika desentralizasaun administrativa.

Ba inisiativa ida-ne’e, Governu prevee ona millaun $3, ne’ebé atu prenxe vaga sira ne’ebé ezistente ba mapa pesoál autoridade munisipál no administrasaun munisipál sira.

Aleinde ne’e, prevee mós millaun $9,4, ne’ebé destina atu fó apoiu ba projetu autoridade munisipál  no administrasaun munisipál sira hodi promove iha ámbitu Planu Dezenvolvimentu Integradu Munisipál (PDIM).

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!