DILI, 26 outubru 2022 (TATOLI)—Ministru Administrasaun Estatál (MAE), Miguel Pereira de Carvalho, hateten Estadu garante desentralizasaun administrativa hodi promove no aselera dezenvolvimentu Timor-Leste nian.
Governante ne’e hateten asuntu ne’e, bainhira halo abertura semináriu Internasional ho tema “Papel desentralizasaun iha ámbitu aselerasaun ba dezenvolvimentu iha Timor-Leste”, iha salaun Universidade Orientál Timor Lorosa’e (UNITAL), kuarta ne’e.
“Ezistênsia hosi Estadu Timor-Leste mak atu garante objetivu sira ho dignu. Tanba ne’e, ita ko’alia kona-ba desentralizasaun administrativu hodi promove no aselera ita-nia dezenvolvimentu iha ita-nia rain. Ita ko’alia konsetu sira hanesan Estadu sentrál, servisu órgaun administrasaun munisipál sira, saída mak ita hakarak prefere mak Estadu ne’e la’ós de’it Estadu sentál mós poder lokál nia finalidade mak atu poder lokál nia finalidade mak atu servi ita-nia populasaun sira,” Miguel Pereira de Carvalho hateten liuhosi komunikadu imprensa ne’ebé Agência Tatoli asesu, kuarta ne’e.
Progressu implementasaun polítika desentralizasaun no poder lokál ba aselerasaun atinjimentu objetivu dezenvolvimentu sustentável iha Timor-Leste, ne’ebé mak previstu ona iha Konstituisaun RDTL artigu 60.
Iha Konstituisaun Repúblika Demokrátika Timor-Leste artigu 60 (Propriedade intelektuál) ne’e haktuir Estadu garante no fó protesaun ba hamoris, produsaun no hala’o fila-liman ho obra literáriu, sientífiku no artístiku ninian, no mós fó protesaun ba direitu autór sira-nian.
Semináriu Internasional ne’e organiza hosi Ministériu Adminsitrasaun Estatál (MAE) ne’ebé servisu hamutuk ho Universidade Orientál Timor-Lorosa’e (UNITAL).
Oradór ka panelista sira hosi rai-li’ur mak hosi Universidade Gadjah Mada Yogyakarta-Indonézia, Departamentu Administrasaun Públika, Espesialista hosi Departamentu Edukasaun, Universidade Filipina, Profesór no expertu kona-ba Desentralizasaun no Governante.
Oradór hosi rai-laran mak Ministru Administrasaun Estatál (MAE), Miguel Pereira de Carvalho, Prezidente Komisaun D Parlamentu Nasionál, Antoninho Bianco, Ministru Finansa (MF), Ministru Planeamentu no Ordenamantu (MPO), Ministru Transporte no Telekomunikasaun (MTK), Ministru Agrikultura no Peska (MAP), Ministru Turizmu Komérsiu no Indústria (MTCI), Prezidente Komisaun Funsaun Públika (KFP) no Reitór UNITAL.
Jornalista : Osória Marques
Editór : Cancio Ximenes
