Top

MEJD seidauk iha planu harii sentru permanente ba programa eskola iha uma

Ministru Edukasaun Juventude no Desportu, Armindo Maia, vizita labarik sira iha sentru eskola iha uma iha suku Bidau Santa Ana, kuarta (16/11). Imajen Tatoli/Vitorino Lopes da Costa

DILI, 16 novembru 2022 (TATOLI)—Ministériu Edukasaun Juventude no Desportu (MEJD) daudaun ne’e seidauk iha planu harii sentru permanente ba programa eskola iha uma, maski komunidade Bidau Toko Baru deside oferese rai pedasuk iha eis Kampu Bintang, suku Bidau Santa Ana.

Reprezentante komunidade Bidau Toko Baru no atuál xefe aldeia, Raimundo Gama, hateten, nia parte hato’o ona asuntu kona-ba harii sentru permanente ba programa eskola iha uma ba responsavel programa Halimar, Apreende no Deskobre Susesu (HANDS) no MEJD, nune’e labarik sira bele iha fatin permanente hala’o prosesu aprendizajen.

Notísia relevante: MEJD harii ona sentru lima apoiu eskola iha uma

“Ha’u halo ona enkontru ho responsável sira hosi NGO HANDS no diresaun iha MEJD rasik tanba ita iha rai Estadu pedasuk ida iha Kampu Bintang ninin ne’ebá atubele utiliza hodi harii sentru permanente ida ba programa eskola iha uma, hodi nune’e komunidade bele aproveita lori sira-nia oan iha sentru ne’e,” Raimundo Gama dehan iha suku Bidau Santa Ana, kuarta ne’e.

Daudaun ne’e sentru eskola iha uma ne’ebé hala’o utiliza hela komunidade nia uma inklui sede suku, hanesan sentru iha Bidau Toko Baru oferese hela ninia uma privadu.

“Tanba ne’e, ha’u sujere ba ministériu atubele aseita rai ne’ebé komunidade oferese hodi bele harii sentru permanente ida,” nia akresenta.

Iha biban hanesan, Ministru Edukasaun Juventude no Desportu, Armindo Maia, hateten, daudaun ne’e seidauk iha planu atu harii sentru permanente.

“Eskola iha uma ne’e hala’o iha populasaun nia uma, depende ba orsamentu, karik iha orsamentu disponível maka bele halo buat ida ne’ebé simples, maibé la’ós atu harii edifísiu permanente ida hanesan ne’e. Tanba ne’e ita la konkorda atu harii sentru permanente tanba laiha planu tanba programa ne’e de’it ninia naran eskola iha uma,” Ministru tenik.

Jornalista   : Tomé Amado

Editora        : Julia Chatarina

Publisidade

Leave a Reply

Latest Post

error: Content is protected !!