iklan

EKONOMIA, HEADLINE

Tinan 2022, timor-oan 3.899 serbisu iha Austrália no Koreia Súl

Tinan 2022, timor-oan 3.899 serbisu iha Austrália no Koreia Súl

Diretór Nasionál Empregu Exteriór SEFOPE, Filomeno Soares. Imajen Tatoli/Egas Cristóvão

DILI, 16 novembru 2022 (TATOLI)–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Emoregu Esteriór (DNEE), haruka ona traballadór timor-oan 3.899 bá serbisu iha Austrália no Koreia Súl, iha tinan 2022.

“Hirak ne’ebé serbisu iha Austrália iha área ospitalidade, ortikultura, ko’a na’an no indústria ikan. Enkuantu Koreia Súl iha área peska, fábrika no agrikultura,” Diretór Nasionál Empregu Esteriór SEFOPE, Filomeno Soares, informa ba Agência Tatoli, iha ninia knaar fatin, Becora, kuarta ne’e.

Hosi totál ne’e, traballadór iha Austrália hosi fulan-janeiru to’o 16 novembru 2022 hamutuk 2.821, enkuantu iha Koreia Súl hamutuk 1.078.

Traballadór timor-oan ne’ebé bá serbisu iha Austrália hahú hosi tinan 2012 to’o novembru 2022 hamutuk 7.952. Traballadór ne’ebé eziste iha Austrália hamutuk 2.786, ne’ebé fila mai Timor 4.185, no hetan asidente iha Austrália na’in-haat.

Notísia relevante: Traballadór timor-oan serbisu iha Koreia no Austrália kontribui reseita millaun $78

Traballadór ne’ebé serbisu iha Koreia Súl desde tinan 2009 to’o 2022 hamutuk 5.006, hirak ne’ebé fila hamutuk 973, sei eziste 4.033, no lakon vida na’in-10.

Diretór dehan, programa mobilidade laborál ba Austrália hahú kedas iha tinan 2012 to’o agora, mobilizasaun nafatin kontinua to’o agora, ne’ebé hahú ho programa Seasonal Labour Programme (SLP), iha tinan 2019 asina tan akordu ida liga ba programa Pacific Labour Scheme (PLS) no iha tinan 2021 ne’e iha programa foun ida hanaran The Pacific Australia Labour Mobility (PALM).

“Governu Austrália liuhosi nia ajénsia no empregadór sira orienta mai nasaun Ázia Pasífiku sira atu prepara traballadór ho abilidade di’ak atubele haruka tuir demanda ne’ebé presiza,” nia tenik.

Nia dehan, Timor-Leste nia preparasaun di’ak tanba hetan orientasaun klaru hosi nasaun ne’ebé husu traballadór, tanba ne’e SEFOPE hahú prepara traballadór durante ne’e liuhosi programa Pre-Departure Briefing (PDB).

“Ita konsege manán konfiansa boot hosi ajénsia empregadór iha Austrália, hosi ida-ne’e ita konsege haruka traballadór barak bá serbisu iha Austrália, ne’e pasu pozitivu tebes tanba bele hadi’a ekonomia família no kontribui kresimentu ekonómiku rai-laran,” nia salienta.

Kada tinan Governu Koreia sempre fó kouta mai Timor-Leste ba ema na’in-500, maibé ho esforsu hotu reprezentante Governu Koreia nian mak iha Timor-Leste, serbisu hamutuk ho entidade SEFOPE ne’ebé maka tinan sira antes vizita Koreia, tanba ne’e konsege buka oportunidade no oinsá konvense Koreia hodi simu traballadór barak liután.

Timor-Leste konsege ultrapasa meta  ne’ebé Governu fó iha tinan 2022, ne’ebé haruka traballadór hamutuk 1.078.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!