DILI, 17 novembru 2022 (TATOLI)—Asosiasaun Akadémiku Estudantil hosi Universidade Nasionál Timor-Leste (UNTL) lamenta ho orden Komandu Polísia Nasionál Timor-Leste (PNTL), ne’ebé haruka membru sira halo blokeia universidade no tama sai edifísiu hodi halo pasa revista ba estudante sira, hahú tuku 07:00 dadeer, loron 16 novembru to’o ohin loron.
“Ami lamenta ho membru PNTL sira-nia aktu hanesan halo pasa revista ba estudante UNTL ne’ebé inosente no halo pasajen ba korridór fakuldade hodi kontrola estudante sira. Ami estudante UNTL la’ós ema kriminozu, bandalizmu, traidór no problemátiku,” Porta-voz Asosiasaun Akadémiku Estudantil hosi UNTL, Cesar João, hateten, iha kampus sentrál UNTL, kinta ne’e.
Nune’e, Reprezentante ne’e husu Komandu PNTL atu retira hikas ninia membru sira hosi resintu universidade tanba la’ós fatin halibur estudante kriminozu, maibé nu’udar instituisaun edukativu atu hanorin estudante sira sai ema krítiku no matenek, nune’e iha futuru mai bele kontribui ba dezenvolvimentu país liuhosi pilár akadémiku tolu ne’ebé estudante sira asume.
“Ami konsidera aktu PNTL inklui karta reitór UNTL tenta atu hamate demokrasia kampus liuhosi aparelu reprezivu Estadu, ne’ebé la fó liberdade ba estudante sira nu’udar ajente ba kontrolu sosiál atu uza autonomia kampus hodi manifesta no espresa preokupasaun no lamentasaun ba desizaun ne’ebé foti hosi líder polítiku ne’ebé tuur iha órgaun soberania hodi uza osan povu ne’ebé la a-favór ba interese povu, maibé fó de’it previléjiu no benefísiu ba grupu balun,” nia lamenta.
Notísia relevante: PPN deside ona loron halo diálogu ho manifestante AMN
Aleinde ne’e, Asosiasaun Akadémika Estudantil UNTL hato’o ezijénsia ba parte relevante sira, hodi ezije reitór urjentemente halo karta ba Komandu PNTL munisípiu Dili hodi husu membru sira retira hosi kampus sentrál nia laran no hapara movimentasaun inklui pasa revista ba estudante iha resintu UNTL.
“Husu mós ba Reitór UNTL atu mantein prinsípiu imparsialidade no labele hamate liberdade espresaun iha universidade, bainhira estudante sira atu uza resintu hodi hala’o asaun pasífiku hasoru desizaun injustu sira ne’ebé la a-favór ba interese povu, tanba universidade sai fatin seguru no apropiadu ba asaun hasoru elite polítiku sira-nia desizaun,” Reprezentante asosiasaun reforsa.
Nune’e mós, asosiasaun husu ba reitoria UNTL tomak atu labele impede asaun sira ne’ebé estudante sira halo hodi kontribui ba dezenvolvimentu ekonómiku, sosiál, polítiku no kultura, tanba bainhira estrutura universidade halo impedimentu, maka asosiasaun konsidera estrutura UNTL ditadór no ajente anti-demokrátiku.
Asosiasaun rekomenda Komandu Jerál PNTL atu orienta unidade jurídika fó formasaun lei ba membru sira, nune’e sira-nia atuasaun tenke tuir lei no orden inklui imparsiál no profisionál.
Iha biban hanesan, asosiasaun husu ba Komandu PNTL atu liberta estudante sira ne’ebé maka sei detein hela iha sela detensaun no tenke trata sira ho dignu.
Jornalista : Tomé Amado
Editora : Julia Chatarina
