iklan

HEADLINE, MUNISÍPIU, VIQUEQUE

Estrada rurál Ossu-Liaruka ho naruk kilómetru 6 hahú reabilita

Estrada rurál Ossu-Liaruka ho naruk kilómetru 6 hahú reabilita

Mapa munisípiu Viqueque. Imajen/Espesiál

VIQUEQUE, 17 novembru 2022 (TATOLI)–Diretór Servisu Ministériu Obra Públika (MOP) munisípiu Viqueque, Mário do Rego, informa, estrada ligasaun postu administrativu Ossu bá suku Liaruka, postu administrativu Ossu, munisípiu Viqueque, hahú halo reabilitasaun ho naruk kilómentru 6.

“Ita iha konkursu estrada rurál iha Viqueque tinan ne’e, ne’ebé fó sai iha tinan kotuk (2021), ne’ebé kompañia mánan-na’in iha ona no asina kontratu iha loron 17 marsu 2022. Nune’e, dalan liga hosi postu Ossu bá suku Liaruka daudaun hahú halo reabilitasaun kilómentru 6,” Diretór hateten ba Agência Tatoli, iha ninia knaar fatin, kinta ne’e.

Estrada hosi postu Ossu bá suku Liaruka ho naruk kilómetru 21, maibé daudaun foin halo reabilitasaun kilómetru 6 ho kustu $ 1 millaun.

Aleinde ne’e, liga ba estrada nasionál sira iha munisípiu Viqueque, daudaun kompañia internasionál CRIG-COVEC reabilita hela estrada iha Venilale.

Konstrusaun estrada nasionál trosu Baucau-Venilale no Venilale-Viqueque ho distánsia kilómetru 58 resin, ho kustu millaun $44, hosi fundu empréstimu hosi Banku Dezenvolvimentu Aziátiku (ADB). Tuir planu projetu sei hala’o durante tinan-tolu, hahú implementa iha agostu 2019 ba estrada dirasaun Baucau no Viqueque, postu Ossu hosi Asalaitula to’o  Buanurak parte ponte Ueradek, munisípiu Viqueque.

Notisia relevante: MOP Viqueque identifika estrada urbana besik kilómetru 40 seidauk reabilita

“Hosi ponte Ueradek to’o Viqueque Vila ho naruk kilómetru rua, oras-ne’e seidauk iha kompañia ruma maka atu kaer, maibé tuir informasaun MOP katak bainhira iha progresu di’ak hosi kompañia COVEC, maka Governu iha hanoin atu fó tan adisionál estrada kilómetru rua ne’ebé liga bá Viqueque Vila, maibé to’o agora sira-nia progresu serbisu hakdasak hela. Entaun serbisu adisionál seidauk bele entrega,” nia hato’o.

Nune’e mós , estrada nasionál hosi Viqueque Vila to’o Natarbora ho naruk kilómetru 50, ne’ebé kompañia Vila Nova halo manutensaun rutina, ne’ebé serbisu ona iha tinan-rua ba kotuk, daudaun foin atinje 40%.

Manutensaun estrada nasionál hosi munisípiu Viqueque to’o suku Uma Uain Leten, ho naruk kilómentru 31 no kustu $350.000, ne’ebé kompañia halo serbisu taka estrada kuak, ho durasaun serbisu durante tinan-rua.

Estrada nasionál iha postu Uautulari ho naruk kilómetru 10 no kustu millaun $8, ne’ebé kompañia Hela Mula UNIP, LDA toma-konta kilómetru 5 no kompañia Greo UNIP, LDA kilómetru 5, hahú asina kontratu iha tinan 2017 no halo estensaun serbisu to’o agora.

“Ita hasoru  impase polítika, COVID-19 no kompañia ninia kapasidade finaseira la to’o inklui mudansa klimátika. Entaun to’o agora serbisu sei la’o nafatin, serbisu ba estrada Uatulari tama fulan-dezembru bele atinje ona 80% tanba agora sira besik tau aspal,” Diretór relata.

Tuir dadus, estrada nasionál iha munisípiu Viqueque purvolta kilómentru 150, miabé to’o agora seidauk reabilita 50% .

“Estrada nasionál barak maka presiza halo reabilitasaun hodi fasilita movimentu transporte públika,” nia tenik.

Jornalista   : Vitorino Lopes da Costa

Editora        : Julia Chatarina  

iklan
iklan

Leave a Reply

iklan
error: Content is protected !!