iklan

NASIONÁL, POLÍTIKA

Governu selebra loron nasionál tais ho feira no lansa livru tais

Governu selebra loron nasionál tais ho feira no lansa livru tais

Vendedora hosi Grupu Bobometo, Marta da Costa no Elsa Ximenes, prepara hela nia produtu tais, iha ambitu Feira Produtu Kultural no Turizmu hosi Artezenatus Komunidade Bebonuk, iha Arts Center AEMTL Colmera Dili, kinta (25/08). Imajen Tatoli/Francisco Sony

DILI, 17 novembru 2022 (TATOLI)—Governu liuhosi komisaun preparasaun ba komemorasaun tinan dahuluk loron nasionál tais, kinta ne’e, hasoru malu ho Ministru Turizmu Komérsiu no Indústria, José Lucas do Carmo da Silva, hodi ko’alia kona-ba programa komemorasaun loron nasionál tais ne’ebé tuir planu sei komemora iha 14 dezembru 2022.

Prezidente Komité Nasionál Patrimoniu, Kulturál Immateriál Timor-Leste, Manuel Ximenes Smith, aprezenta programa no planu integradu hodi komemora loron nasionál tais hanesan feira tais, átividade kompetisaun pintura ne’ebé sei liga liu ba tais, kompetisaun photoshoot, aprezentasaun múzika no poezia, konversa kulturál, talk show, marsa morradór sira, semináriu kona-ba tais, lansamentu livru tais, traje tradisionál no estudante sira sei hala’o lansamentu komunidade nia domin ba tais.

“Liuhusi sorumutuk ne’e, Komisaun Preparasaun Komemorasaun husu ba Ministru Turizmu, Komérsiu no Indústria atu bele utiliza espasu Centro Convenção de Díli. Aliende ne’e, Komitte Nasionál Patrimoniu no Immaterial Timor-Leste husu mós ba Governu atu dekreta loron nasionál tais, tanba ne’e presiza liuhusi sirkular balun atu komunika ba povu tomak atu konvida hadomi ba tais iha loron ida,” refere komunikadu imprensa ne’ebé Agência Tatoli asesu, kinta ne’e.

Asuntu ida tan, nia dehan, sira ko’alia kona-ba rezolusaun uniforme tais ba funsionáriu no estudante sira, ne’ebé iha ona diskusaun lubuk ida ho ministériu lubuk ida kona-ba oinsá rezolusaun uniforme tais ba estudante sira no funsionáriu sira.

Komisaun ne’e husu ba Governu liuhosi Ministru Turizmu Komérsiu no Indústria, José Lucas do Carmo da Silva atu define estatutu Komitte Nasionál Patrimoniu Immateriál atu nakfila an ba Institutu Nasionál Patrimoniu Kulturál Immateriál iha Timor-Leste, atu nune’e husik hela obra ne’e nu’udar eransa ministru nian.

Ministru Turizmu Komérsiu no Indústria, José Lucas do Carmo da Silva, husu ba Komisaun Preparasaun ba komemorasaun tinan dahuluk loron nasionál tais, liuhosi Prezidente Komité Nasionál Patrimóniu, Kulturál Immateriál Timor-Leste atu hato’o karta ofisiál ruma, hodi koordena ho responsabel CCD.

Kona-ba dekreta loron nasionál, rezolusaun no komité nia ejisténsia, ninistru ne’e iha ona diskusaun ho Ministru Edukasaun Ensinu Superiór Siénsia no Kultura, Longuinhos dos Santos liuliu kona-ba ezisténsia komité.

“Ha’u intende no ministériu sei apoiu másimu, tanba asuntu sira-ne’e asosia ho identidade Timor-Leste, ita presiza hahú ona labele hein tan tanba servisu lubuk ida mak halo ona. Nune’e Ministru apoiu totál esforsu ne’ebé mak la’o ona,” Governante ne’e hateten.

Governante ne’e husu atu iha espozisaun tais presiza hatudu tais nia orijinálidade tanba ohin loron iha imitasaun barak ona, tanba ne’e presiza hatudu nia orijinálidade loloos.

Hosi ne’e, Ministru hato’o parabéns ba komisaun nia servisu husu atu mellora liután koordenasaun atu nune’e komemorasaun ne’e la’o ho susesu.

Entretantu, orsamentu ba komemorasaun loron nasionál tais ne’ebé sei elebra iha 14 dezembru 2022 ne’e, mai hosi Ministériu Turismu, Komérsiu no Indústria, Sekretáriu Estadu Arte no Kultura no apoiu mós husi ajénsia internasionál USAID Turismu ba Ema Hotu.

Notísia Relevante: MTCI apoiu $25.800 selebra loron nasionál tais iha 14 dezembru 2022

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!