iklan

NASIONÁL, POLÍTIKA

MTCI apoiu $25.800 selebra loron nasionál tais iha 14 dezembru 2022

MTCI apoiu $25.800 selebra loron nasionál tais iha 14 dezembru 2022

DILI, 17 novembru 2022 (TATOLI)—Diretór Jerál Sekretáriu Estadu Arte no Kultura (SEAK), Manuel Ximenes Smith, informa Ministériu Turizmu Komérsiu no Indústria (MTCI, sigla portugés) apoiu orsamentu $25.800 atu selebra loron nasionál tais ne’ebé sei realiza iha 14 dezembru 2022.

Notísia Relevante: Governu deside 14 dezembru nu’udar loron nasionál Tais

“Ita-nia planu atu halo atividade (loron nasionál tais iha 14 dezembru 2022) ne’e mai hosi fundu tolu hanesan fundu ida mai hosi MTCI ho kuantidade orsamentu $25.800, fundu ida mai hosi Sekretáriu Estadu Arte no Kultura hamutuk $5.000 no fundu ida seluk la mai ho orsamentu maibé sira fó apoiu ba prosesu produsaun ka públisidade hotu-hotu ne’ebé mai hosi USAID Turizmu ba Ema Hotu. Sira sei fó apoiu banner no sertifikadu ba ita-nia konvidadu, hanesan ita-nia partisipante tais nian no estudante sira-ne’ebé sei partisipa iha loron nasionál tais ne’e,” Manuel Smith hateten ba Agência Tatoli iha ninia kna’ar fatin Avenida Portugál (anterior: Praia dos Coqueiros), Dili, kuarta (16/11) ne’e.

Daudaun ne’e SEAK hein hela Komité sei reuniaun hamutuk ho Sekretáriu Estadu Arte no Kultura no Komité mós hanoin atu reuniaun hamutuk ho Ministériu Turizmu Kom’ersiu no Indústria (MTKI) atu sira-nia polítika no sira-nia hanoin kona-ba komité nia prosesu realizasaun ba atividade ida-ne’e.

“Ita espera katak SEAK no MTKI mak apoiu másimu ba atividade ne’e tanba sira mak na’in, liu-liu ba SEAK na’in ba tradisionál no MTKI na’in ba oinsá halo promosaun ba ita-nia elementu kulturál sira ba iha rai-li’ur,” nia dehan.

Aleinde ne’e, nia akresenta, iha selebrasaun loron tais iha 14 dezembru tinan ne’e, SEAK sei halo atividade lubuk ida, ne’ebé hahú iha loron 12 to’o 14 dezembru, SEAK sei konvida soru na’in sira hosi munisípiu atu mai partisipa halo sira-nia espozisaun tais.

“Iha loron 13 dezembru, ita sei konvida estudante Universitáriu sira atu mai ko’alia de’it kona-ba tais no sira mós iha tema ida-ne’ebé ko’alia katak mai lori komunidade hadomi tais no mós iha tema seluk ne’ebé sei akontese iha 14 dezembru,” nia hateten.

Hosi ne’e, SEAK sei halo talk show ne’ebé sei konvida peritu balun mai hosi Internálmente komité nasionál Patrimómiu Kulturál Immateriál (PKI) no akademia balun, ne’ebé atu mai partisipa iha semináriu kona-ba tais ne’ebé sei realiza iha 14 dezembru.

“Ita mós sei halo espetakulu múzika, atu bele festeza loron nasionál tais ne’e bele sai furak,” nia hateten.

Notísia Relevante: PN aprova projetu rezolusaun “Loron Nasionál Tais” selebra kada 14 dezembru

Jornalista : Nelia Fernandes

Editór        : Cancio Ximenes

iklan
iklan

Leave a Reply

iklan
error: Content is protected !!