COVALIMA, 17 novembru 2022 (TATOLI)–Diretór Programa Nasionál Dezenvolvimentu Suku (PNDS) Covalima, Filipe Cardoso informa, Prosesu implementasaun Uma Kbiit Laek Plus A (UKL+ A) ho unidade 75 iha Covalima daudaun ne’e iha ona faze aprovizionamentu.
Notísia Relevante: PNDS hahú implementa UKL+ A iha munisípiu lima
“Ba iha implementasaun UKL plus A hamutuk unidade 75 ne’e ita sei imlementa iha postu administrativu Maucatar iha suku haat, ba dadaun ne’e iha hela faze aprovizionamentu,” Filipe Cardoso relata progresu konstrui UKL+ A ne’e ba Aêencia Tatoli iha nia kna’ar fatin, Sukaer Laran, kinta ne’e.
UKL+ A ne’e implementa iha postu administrativu Maucatar iha suku sira hanesan Ogues, Belekasak, Matai no Holpilat ne’ebé ho-nia benefisiáriu hamutuk na’in- 75 ne’e, tama ona iha faze aprovizionamentu.
Razaun implementasaun UKL+ A iha progresu aprovizionamentu tanba halo ona asina akordu ho fornesedór suplay materiál konstrusaun, nune’e traballadór sira hahú halo servisu ona.
“Implementasaun UKL+ A ita tama ona iha faze aprovizionamentu. Signifika tama ona iha implementasaun tanba desizaun hosi aprovizionamentu halo ona asina akordu ho fornesedór suplay materiál konstrusaun, nune’e traballadór responsabiliza kaer obra ne’e hahú halo servisu,” nia dehan.
Implementasaun UKL+ A ho unidade 75 ne’ebé implementa iha postu administrativu Maucatar ne’e ho orsamentu hamutuk $965.0000.
Entretantu, Diretór PNDS Covalima relata Uma Kbiit Laek Plus B (UKL+ B) ne’ebé sei implementa iha postu administrativu Suai iha suku lima (5) ho uma unidade-185, sei distribui de’it zinku ba benefisiariu sira iha tempu badak no sei halo distribuisaun.
“Maibé kona-ba nia orsamentu ami labele mensiona tanba sistema sentralizadu iha unidade aprovizionamentu dezentralizadu iha Ministériu Administrasaun Estatál (MAE) hodi sosa materiál distribui zinku ba komunidade ne’e, sentraliza iha MAE mak sei halo prosesu aprovizionamentum,” nia hateten.
Tanba ne’e, iha munisípiu hein de’it atu simu zinku ne’ebé mobiliza hosi nasionál hafoin to’o iha munisípiu hamutuk ho ekipa nasionál halo distribuisaun materiál zinku ba benefisiariu iha suku sira hanesan Suai Loro, Debos, Camanasa, Beco no Labarai.
“Ita iha munisípiu hein simu zinku sei mobiliza hosi nasionál to’o iha munisípiu hamutuk ho nasional, ita halo distribuisaun ba benefisiariu ne’ebé identifikadu iha postu administrativu Suai,” nia dehan.
Notísia Relevante: Governu sei identifika uma-kain 6.000 sai benefisiáriu UKL+
Jornalista : Celestina Teles
Editór : Cancio Ximenes
