DILI, 17 novembru 2022 (TATOLI)—Parlamentu Nasionál (PN) liuhosi diskusaun no votasaun Orsamentu Jerál Estadu (OJE) 2023 iha faze espesialidade, aprova orsamentu ba Universidade Nasionál Timor-Lorosa’e (UNTL) ho montante $18.649.005, ho votu a-favór 46, kontra 7 no abstensaun 7.
Reitór UNTL, João Soares Martins, hateten, orsamentu aprovadu aloka ba programa prioridade tolu hanesan programa boa governasaun no jestaun institusionál $11.170.615, edukasaun no formasaun $7.461.650 no apoiu programa igualdade jéneru no inkluzaun sosiál $16.740.
“Programa boa governasaun no jestaun institusionál iha sub-programa rua no atividade hamutuk 13, nune’e mós programa edukasaun no formasaun iha sub-programa hamutuk 14 inklui atividade 33, ne’ebé mak sei realiza iha 2023 no ikus liu programa igualdade jéneru no inkluzaun sosiál rasik iha sub programa ho atividade rua,” Reitór informa iha resintu PN, kinta ne’e.
Notísia relevante: Dezenvolvimentu UNTL Depende Ba Orsamentu
Orsamentu ba UNTL laiha proposta hosi deputadu sira, tanba konsidera orsamentu alokadu relevante duni atu mantein hodi apoiu liután dezenvolvimentu universidade nia laran.
Jornalista : Tomé Amado
Editora : Julia Chatarina
