iklan

DESPORTU, BOBONARO, HEADLINE, MUNISÍPIU

Postu Bobonaro sei komemora 28 novembru ho desportu komunitária

Postu Bobonaro sei komemora 28 novembru ho desportu komunitária

Administradór postu administrativu Bobonaro, Juvinal Leto-Mau dos Santos. Imajen Tatoli/Sérgio da Cruz.

BOBONARO, 17 novembru 2022 (TATOLI) – Administrasaun postu administrativu Bobonaro, munisípiu Bobonaro, sei komemora loron proklamasaun independénsia 28 novembru, ho atividade desportu komunitária.

Administradór postu administrativu Bobonaro, Juvinál Leto-Mau dos Santos, esplika, komemorasaun loron proklamasaun independénsia 28 novembru ba dala-47 ho atividade desportu komunitária ne’ebé hetan apoia orsamentu hosi Sekretaria Estadu Juventude no Desportu (SEJD).

Juvinál afirma, eventu desportu komunitária ne’e ho modalidade tolu kompostu hosi futeból, voleiból feto no mane, halai karon, dada-tali no tau berlindus iha ibun hodi halai.

Notísia relevante: Bobonaro sei komemora loron proklamasaun independénsia ho atividade oioin

“Atvidade sira-ne’e ita realiza bazea ba orientasaun hosi governu sentrál ho Objetivu atu anima komunidade sira hodi komemora loron boot ne’e,” nia informa ba Jornalista Tatoli, iha kna’ar fatin, Bobonaro, kinta ne’e.

Lideransa postu administrativu ne’e dehan, antes ne’e konsege halo ona enkontru ho xefe suku sira hotu, atu idak-idak iha nia klubu rasik, maibé infelizmente suku balu labele partisipa tanba menus jogadór.

Enkuantu tuir dadus provizóriu hosi komisaun organizadora klubu ne’ebé rejistadu ohin (17/11) mai tuir teknikál ‘Meeting’ komposta hosi futeból hamutuk 16, voleiból feto lima no mane sia.

Kona-bá modalidade sira seluk, komisaun organizadora sei kontinua halo rejistrasaun nune’e harame komunidade iha postu refere.

“Ha’u husu ba komunidade hotu, suku 18 nia laran, xefe suku no xefe aldeia atu organiza komunidade sira atu entusiazmu mai asiste eventu ne’e, tanba atividade ne’e la’ós loron-loron ita halo, tinan ida dala-ida,” nia fó hanoin.

Komunidade Bobonaro, António de Jesus, sente kontente no agradese ba governu tanba iha inisiativa realiza atividade desportiva iha postu administrativu Bobonaro.

“Ami-nia haree ho atividade sira hanesan ne’e mak komunidade sira foin sente loron-boot ne’e, se lae uluk ita haree, buat sira-ne’e iha hotu Dili de’it, ami (foho) ne’e la hetan buat ida,” nia katak.

Orsamentu ne’ebé SEJD aloka ba postu administrativu Bobonaro hamutuk rihun $2,800 resin, hodi realiza atividade inklui atribui prémiu ba vensedór primeiru to’o terseiru lugár.

Notísia relevante: Veteranu na’in-628 sei simu kondekorasaun iha 28 novembru

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!