iklan

NASIONÁL, HEADLINE, KAPITÁL

Timor-Leste lori pozisaun importante rua durante konferénsia ONU dala-27 iha Egiptu

Timor-Leste lori pozisaun importante rua durante konferénsia ONU dala-27 iha Egiptu

Sekertariádu Estadu Ambiente, Demétrio do Amaral de Carvalho. Imajen Tatoli/Egas Cristóvão

DILI, 17 novembru 2022 (TATOLI)—Delegasaun Timor-Leste lideradu hosi Ministru Prezidénsia Konsellu Ministru, Fidelis Manuel Leite Magalhães, akompaña mós hosi Sekretáriu Estadu Ambiente, Demétrio do Amaral de Carvalho, no Embaixadór Asuntu Alterasaun Klimátika, Adão Barboja, partisipa iha konferénsia Organizasaun Nasaun Unida (ONU) ba dala-27, foin lalais.

Konferénsia ne’e kona-ba mudansa klimátika (COP27, sigla inglés), ne’ebé realiza iha loron 30 to’o 18 novembru 2022, iha sidade Sharm El Sheikh, Egiptu.

“Timor-Leste lori posizaun hamutuk 20 resin durante konferénsia dala-27 iha Egiptu, ne’ebé entre pozisaun ne’e hotu, iha pozisaun importante ida atu insiste mekanizmu finansiamentu ba lakon no estragu. Tanba tinan barak nia laran Timor-Leste sai hanesan Estadu persistente, ko’alia kona-ba lakon no estragu ho ativu tebes, liuhosi embaixadór asuntu alterasaun klimátika, iha tinan ida-ne’e,” Sekretáriu Estadu Demétrio do Amaral, informa, liuhosi konferénsia imprensa, iha edifísiu SEA, Akait, kinta ne’e.

Foin dahuluk konferénsia ONU dala-27 rejista iha ajenda, ho sub-ajenda kona-ba lakon no estragu.

“Espera katak desizaun finál kona-ba lakon no estragu sei iha finansiamentu espesiál ida ba asuntu ne’e. Pontu daruak importante ba Timor-Leste, ita insiste atu país emitór gás efeitu estufa ba atmósfera, tanba ita hatene 80% hosi país G20 sira mak prodús 80% ba emisaun globál no efeitu sira hosi emisaun globál ne’e, bainhira ita haree lista nasaun 55 vulnerável iha mundu besik 90% hosi lista ne’e hosi país menus dezenvolvimentu (LDC, sigla inglés) hanesan Timor-Leste no nasaun illa kiik sira,” nia akresenta.

Notísia relevante: Fidelis Magalhães lidera delegasaun TL bá partisipa simeira mudansa klimátika iha Egiptu

Timor-Leste hola parte ba negosiasaun país menus dezenvolvimentu no Small Island Developing States (SIDS) hamutuk ho Sekretáriu Jerál ONU, António Guterres, ne’ebé ko’alia kona-ba ezisténsia país durante mudansa klimátika.

“País kiik-oan sira balun hahú mout ba tasi okos tanba level tasi sa’e tanba efeitu hosi pemanasan global, halo mudansa klimátika ne’ebé dala ruma frekuente liu lori efeitu ba populasaun sira. Tinan ne’e mundu infrenta inundasaun barak tebes, ikus iha Japaun,” nia tenik.

Aleinde ne’e, Timor-Leste hasoru inundasaun boot iha loron 04 abril 2021, ne’ebé iha ema 44 mak lakon vida no osan rekuperasaun ba lakon no estragu durante inundasaun millaun $500.

“Bainhira ita haree ida-ne’e, ninia efeitu ba Produtu Internu Brutu (GDP, sigla inglés)  kada tinan parese boot liu 110%, ne’ebé hetan influénsia direta hosi inundasaun. País LDC no SIDS sira kada tinan lakon 1% to’o 5% GDP hosi efeitu alterasaun klimátika,” nia adianta.

Tanba ne’e, Timor-Leste durante konferénsia ba dala-27, insiste atu país boot sira muda atetude promesa mamuk ba asaun reál hodi rezolve problema klimátika.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!