iklan

BOBONARO, HEADLINE, MUNISÍPIU, POLÍTIKA

Autoridade Bobonaro apela komunidade hasa’e bandeira RDTL iha uma oin

Autoridade Bobonaro apela komunidade hasa’e bandeira RDTL iha uma oin

Prezidénsia Repúblika hasa'e bandeira nasionál to'o meia haste (rin klaran) hodi hanoin hikas antigu Prezidente Repúblika Portugeza Jorge Sampaio. Imajen/Midia PR.

BOBONARO, 18 novembru 2022 (TATOLI) – Sekretáriu Autoridade Munisípiu Bobonaro, João do Carmo de Fátima, apela ba komunidade sira iha kapitál Maliana no postu administrativu sira atu hasa’e bandeira Repúblika Demokrátika Timor-Leste (RDTL) iha uma oin, hodi komemora loron Proklamasaun Independénsia, 28 novembru ba dala-41.

Autoridade Munisípiu hasai ona despaxu ba administradór postu idak-idak atu orienta xefe suku sira, aviza tama sai bairru, haruka komunidade idak-idak atu dada sa’e bandeira RDTL iha uma oin.

“Ohin, ha’u rasik hasai tán despaixu ka karta orientasaun ida ba administradór postu Maliana, atubele orienta ita-nia xefe suku sira, populasaun sira, ba loja sira, kioske sira, empreza lokál, nasionál no ajénsia sira-ne’e iha Maliana ne’e atubele kumpre, katak hotu-hotu tenke hasa’e Bandeira RDTL,” nia informa ba Jornalista Tatoli, iha Maliana, sesta ne’e.

Maibé realidade hela de’it loron 10 atu komemora loron istóriku ne’e komunidade barak, liuliu iha kapitál Maliana seidauk iha konsiénsia atu hasa’e Bandeira RDTL iha uma oin.

Autoridade munisípiu ne’e haklaken, folin Bandeira ne’ebé ema fa’an iha loja la karun liu, hodi presta  omenajen ba sakrifísiu ne’ebé mártir sira kontribui ona ba rai ida-ne’e.

“Ita-nia kontribuisaun nu’udar ema Timor ne’e iha-ne’ebé, nasionalizmu no patriotizmu ba rai ida-ne’e iha-ne’ebé. Sé ita timor-oan, ema-ne’ebé mate-restu liberta rai ida-ne’e nia oan pelumenus halo buat ruma atubele valoriza ita-nia eroi sira-nia luta,” nia fó hanoin ba komunidade.

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!