iklan

BOBONARO, HEADLINE, MUNISÍPIU, POLÍTIKA

Embaxadór Cuba sei reprezenta Bobonaro iha festivál Atauro

Embaxadór Cuba sei reprezenta Bobonaro iha festivál Atauro

Sekretáriu Autoridade Munisípiu Bobonaro, João do Carmo de Fátima, hasai foto ho Embaxadór Repúblika Cuba iha Timor-Leste no brigada médiku Cubano. Imajen espesiál.

BOBONARO, 18 novembru 2022 (TATOLI) – Embaxadór Repúblika Cuba, José Ernesto Dias, sei aprezenta identidade kultura munisípiu Bobonaro iha eventu festivál múzika no kulturál iha munisípiu Atauro, ne’ebe tuir planu sei hahú iha loron 21 to’o 24 fulan-novembru tinan 2022.

Sekretáriu Autoridade Munisípiu Bobonaro, João do Carmo de Fátima, haktuir, diplomata ne’e deside atu uza identidade kultura munisípiu Bobonaro nian hafoin hala’o enkontru kooperasaun ho autoridade munisípiu Bobonaro no ekipa Brigada Médiku Timoroan iha tersa semana ne’e.

Notísia relevante: Festivál múzika no kultura iha Atauro, sei promove TL ba mundu

“Embaixadór rasik informa mai ami (autoridade) katak, nia sei partisipa iha serimónia kulturál iha munisípiu Ataúro reprezenta munisípiu Bobonaro,” nia imforma ba Jornalista Tatoli,iha kna’ar fatin sesta ne’e.

Embaixadór Cuba hili munisípiu Bobonaro hafoin Prezidénsia Repúblika no Ministériu Negósiu Estranjeiru no Kooperasaun fó embaixadór nasaun idak-idak iha Timor-Lste atubele eskolla munisípiu idak-idak iha festivál Atauro.

“Tan ne’e maj Cuba mak sei reprezenta ita-nia munisípiu Bobonaro,” Sekretáriu Autoridade Munisípiu Bobonaro informa.

“Ita sente ida ne’e di’ak tebes, tanba embaixadór mai dehan, nia ba ne’e sei reprezenta munisipiu Bobonaro, entaun kala sira halo ona ligasaun ho Palásiu Prezidensiál, Sekretaria Estadu Arte no Kulturá ka MNEK tanba buat sira-ne’e interligadu,” nia akresenta.

Maske diplomata ne’e laiha karta verbál no eskrita ruma, maibé Autoridade Bobonaro ne’e dehan, atu utiliza identidade munisípiu Bobonaro ne’e di’ak atubele promové patrimóniu kulturál ne’e ba mundu.

“Ha’u hanesan Bobonaro-oan, hanesan mós autoridade ida, apresia no kongratula, ema estranjeiru ida, ne’ebé maka hanesan ita-nia amigu, ne’ebé iha vontade, fuan boot hakarak reprezenta ita-nia munisípiu iha momentu sira-ne’e,” nia agradese.

Tuir dadus Refreshing Training Civil Registertion and Vital Statistic (CRVS) períodu II (1 jullu to’o 31 dezembru 2018), Diresaun Estatístika Munisípiu Bobonaro anunsia aldeia hamutuk 193, suku 50 no postu administrativu-neen, ho totál populasaun 114,537, mane 57,462 no feto 57,075 ho totál uma-kain 24,591.

Lian materna ne’ebé durante ne’e komunidade munisípiu Bobonaro uza halo komunikasaun mak hanesan Kemak, Bunak, Tetun-Terik no Bekais.

Poténsia dezenvolvimentu ekonomia lokál liuhosi turizmu mak hanesan; forte Balibo, bee-manas Marobo, bee-manas Borluli, foho Loelaco Maliana, foho Odomau, foho Malitoli (Saburai).

Nune’e mós Lagoa bee malae, foho Gagap-lau (Atabae), foho Lesu-luli (Cailaco), foho Sibi (Lolotoe), foho Lour Gunung Meza (Bobonaro), Phi Chigi, Costaria artezenatu, Beacou, bazár tradisionál fronteira no fatin kulturál seluk tán.

Iha setór agrikultura área kultiva natar maizumenus ektare 7,663, área kultiva batar maizumenus ektare 5,189.5.

Iha setór ortikultura mak hanesan; fore-keli, batar, hare, maek, fore, koto, fore-rai, lís-mean ho mutin, modo-tahan, mostarda no seluk tán.

Iha setór pekuária hanesan karau timor, karau vaka, bibi, fahi no manu. Enkuantu setór agro-floresta mak hanesan sándalu, gaharu, kamí, aí-teka, kafé (arábika ho rebusta) no nú.

Iha setór rekursu minerál mak hanesan; gás (Holmesél-suku Sibuni, suku Lour no suku Karabau), magnésiu (suku Saburai no Cowa-Balibo), diamante, urániu (Marobo), rai-henek fatuk no seluk tán.

Notísia relevante: SEAK sei realiza kolókiu Internasionál “patrimóniu kulturál” iha Ataúro

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!