iklan

NASIONÁL, POLÍTIKA

Marsu 2023, STAE hahú atividade resensiamentu eleitorál ba timoroan iha diaspora

Marsu 2023, STAE hahú atividade resensiamentu eleitorál ba timoroan iha diaspora

Diretór Jerál STAE, Acilino Manuel Branco. Imajen TATOLI/António Dasiparu.

DILI, 18 novembru 2022 (TATOLI)—Diretór Jerál Sektretariadu Tékniku Administrasaun Eoeitorál (STAE), Acilino Manuel Branco, hateten tuir planu iha inísiu fulan-marsu (2013) ne’e, STAE hahú halo atividade resensiamentu eleitorál no atualiza baze dadus ba sidadaun timoroan sira iha diáspora durante fulan tolu ka haat nia laran.

Notísia Relevante: Acilino: Horta husu órgaun eleitorál aumenta partisipasaun eleitór iha estranjeiru

“Iha fulan-marsu nia hahú, STAE sei hahú hala’o atividade resensiamentu eleitorál no halo atualizasaun baze dadus  ba sidadaun timoroan iha rai-liúr,” Acilino Manue; Branco hateten ba jornalista sira, hafoin hala’o enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, sesta ne’e.

Maibé servisu hirak-ne’e hotu sei servisu hamutuk ho Ministériu Negósiu Estranjeiru no Kooperasaun (MNEK), hodi nune’e bainhira eleisaun akontese bele lori suseseu ne’ebé di’ak no garante pás no estabilidade ba rai ida-ne’e.

Nune’e, STAE-CNE hanesan órgaun eleitorál hatán ba Prezidente Repúblika nia konvite tuir enkontru no halo preparasaun ba eleisaun parlamentár 2023 ne’e, CNE nian saida mak halo ona no hadi’a iha eleisaun prezidensiál 20222 ne’ebé liu ona, no preparasaun ba eleisaun parlamentár tinan 2023 nian.

Ba sentru votasaun, nia informa, tuir planu operasionál sei aumenta purvolta 300 no estasaun votu 500. Momentu iha eleisaun prezidensiál sentru votasaun 1.200 depois propoin ba 1.500 no ba iha estasaun votu 1.900.

Entratantu Prezidente CNE, José Belo, haktuir Xefe Estadu husu atu presiza hadi’a prosesu kampaña ba eleisaun parlamentar tinan 2023 mai ne’e.

“Xefe Estadu husu ami preparadu ka lae, CNE preparadu no iha kampaña prezidensiál iha buat balun ne’ebé ita presiza hadi’a no ami sei hadi’a kualidade ba beibeik. Enkontru no debate ne’ebé di’ak mak prosesu hotu-hotu tenke la’o tuir regra, nune’e eleisaun ne’ebé asegura demokrásia,” nia dehan.

Prezidente Repúblika mós ohin hato’o atu iha tempu kampaña ne’e partidu polítiku sira aprezenta programa labele buka mak insultu malu, tanba nu’udar órgaun eleitorál sei ko’alia mós partidu hotu-hotu. Maibé ita haree ba lei no ida-ne’e hanesan responsabilidade partidu sira nian katak kampaña ne’e oinsá atu eduka eleitór sira kompreende liután no aposta sira nia hanoin ba futuru.

“Ha’u hanoin ida-ne’e lejislasaun, tanba ita multiparializmu depois rejistu partidu kritériu sira iha ona tanba ne’e dixiplina partidaria, la’ós de’it CNE maibé rejistu iha notariadu, Tribunál Rekursu mós tenke haree ba prosesu sira-ne’e la’ós de’it tenke legaliza hanesan partidu, maibé prosesu tomak no ideolójia ne’ebé partidu sira iha liu-liu kona-ba estatutu sira-ne’ebé bele koresponde ho partidu sira modernu.

Prezidente Repúblika deklara sei dekreta kalendáriu ba eleisaun parlamentár iha fulan-Fevereiru 2023, Prezidente CNE hateten, CNE órgaun implementadór kualkér desizaun ne’ebé Xefe Estadu foti tanba kompeténsia tuir Konstitusaun RDTL.

Iha enkontru entre STAE ho Komisaun Nasionál Eleisaun (CNE) no Xefe Estadu, José Ramos Horta ne’e, Xefe Estadu husu órgaun eleitorál atu servisu hamutuk ho komponente hotu-hotu nune’e garante liután eleisaun ida-ne’ebé kredivel no susesu liután iha futuru.

Jornalista : Osoria Marques

Editór       : Cancio Ximenes

iklan
iklan

Leave a Reply

iklan
error: Content is protected !!