iklan

HEADLINE, MUNISÍPIU, VIQUEQUE

MOP halo teste laboratóriu ba reabilitasaun estrada kilómetru 10 iha Uatulari

MOP halo teste laboratóriu ba reabilitasaun estrada kilómetru 10 iha Uatulari

Ekipa téknika halo teste laboratóriu ba reabilitasaun Estrada iha postu administrative Uatulari. Imajen/MOP

VIQUEQUE, 18 novembru 2022 (TATOLI)—Ekipa téknika hosi Ministériu Obra Públiku (MOP) liuhosi Departamentu Konstrusaun, Manutensaun no Via Rápida hamutuk ho Supervizór destakadu munisípiu Viqueque no tékniku Laboratorium Nasionál, halo teste ba projetu reabilitasaun estrada kilómetru 10 iha postu administrativu Uatulari, munisípiu Viqueque.

“Ohin ami-nia ekipa téknika destakadu munisípiu Viqueque hamutuk ho tékniku laboratóriu nasionál halo teste ba projetu reabilitasaun estrada kilómetru 10 iha postu Uatulari, nune’e tama fulan-dezembru tenke tau ona aspál,” Diretór Servisu MOP Viqueque, Mário do Rego, hateten iha postu Viqueque Vila, sesta ne’e.

Notísia relevante: MOP Viqueque identifika estrada urbana besik kilómetru 40 seidauk reabilita

MOP halo teste hodi hatene serbisu kompañia responsável nia serbisu, nune’e bainhira ramata bele kontinua ho rega aspál-been hodi halakon rai-rahun sira.

“Kona-ba preparasaun tau aspál, daudaun kompañia prepara ona ekipamentu maibé tekniku hosi Indonézia na’in-ida seidauk mai, bainhira mai mak hahú monta aspál. Progresu fíziku atuál atinje ona 58,39%,” nia akresenta.

Estrada nasionál iha postu Uatulari ho naruk kilómetru 10, ho kustu millaun $8, asina kontratu iha tinan 2017, ne’ebé kompañia Hela Mula UNIP, LDA toma-konta kilómetru 5 no Greo UNIP, LDA responsabiliza kilómetru 5.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!