iklan

HEADLINE, MUNISÍPIU, SEGURANSA, VIQUEQUE

PNTL Viqueque halo apreensaun kilat manu no tudik iha Ossu

PNTL Viqueque halo apreensaun kilat manu no tudik iha Ossu

Autoridade seguransa asegura hela sasán ne’ebé halo apreensaun iha Komandu PNTL munisípiu Viqueque, sesta (19/11). Imajen Tatoli/Vitorino Lopes da Costa

VIQUEQUE, 18 novembru 2022 (TATOLI)--Polísia Nasionál Timor Leste (PNTL) munisípiu Viqueque, sesta kalan ne’e, meizumenus tuku 21:49 kalan, halo apreensaun kilat manu no tudik iha parte Asabere, suku Ossu de Cima, postu administrativu Ossu, munisípiu Viqueque.

Tuir Komandante PNTL munisípiu Viqueque, Superintendente, Sebastião Alves Quintão, antes ne’e simu ona informasaun katak ema lori kilat manu hosi Dili atu tama Viqueque.

“Ha’u simu informasaun hosi fonte informadór sira, depois ha’u informa kedas ba Komandante Tránzito no akompaña hosi Taskforce hodi hein iha postu Ossu, parte Asabere, suku Ossu de Cima. Bainhira halo check point, konsege hetan kilat manu ho teleskop hamutuk tolu inklui tudik ida. Sasán sira-ne’e ami sei tau iha Komandu PNTL Viqueque, aban ami sei kontinua prosesu identifikasaun,” Komadante PNTL Viqueque hateten ba Agência Tatoli, iha Komandu PNTL Viqueque, sesta kalan ne’e.

Notísia relevante: Guarda floresta Bobonaro sei halo apreensaun ba kilat-manu

Karreta ho marka Grand Max ne’ebé tula sasán hirak ne’e, iha pasajeiru mane na’in-haat, ne’ebé atu halo viajen hosi Dili bá postu Uatulari.

Nune’e, autoridade seguransa sei haruka fila pasajeiru iha karreta laran bá sira-nia rezidénsia, hafoin presta deklarasaun, no kazu ne’e sei prosesa no aprezenta ba Ministériu Públiku.

“Banhira Ministériu Públiku haruka fali notifikasaun mai PNTL munsípiu Viqueque maka ami lori sira bá Tribunál,” nia akresenta.

Polísia asegura hela sasán apreensaun no karreta iha Komandu PNTL munisípiu Viqueque hodi halo prosesu verifikasaun.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!