iklan

NASIONÁL, POLÍTIKA

PR Horta-Coliati diskute pozisaun xefe kaza militár ne’ebé mamuk hela

PR Horta-Coliati diskute pozisaun xefe kaza militár ne’ebé mamuk hela

Vise Xefe Estadu Maiór Jeneràl FALINTIL -Forsa Defeza Timor-Leste (F-FDTL), Maijor Jeneràl Calisto dos Santos "Coliati". Imajen Tatoli/Egas Cristóvão

DILI, 18 novembru 2022 (TATOLI)–Vise Xefe Estadu Maiór Jeneràl FALINTIL-Forsa Defeza Timor-Leste (F-FDTL), Majór Jeneràl Calisto dos Santos “Coliati”, hateten iha enkontru ne’e Prezidente Repúblika, José Ramos Horta, ko’alia kona-ba Xefe Kaza Militár nia fatin ne’ebé mak to’o agora sei mamuk hela.

“Tanba Xefe Kaza Militár dezde Koronél Renilde retira hosi Prezidensia Repúblika, fila-fali ba iha Kuartél Jenerál Forsa Armada nian, pozisaun ba Kaza Militár ne’e mamuk hela. Ne’ebé ohin enkontru ho Xefe Estadu ne’e,a mi diskute kona-ba pozisaun Xefe Kaza Militár ne’ebé nanuk hela ne’e,” Majór Jeneral Coliati hateten ba jornalista sira hafoin hasoru malu ho Xefe Esatdu, iha Palásiu Prezidensiál Nicolau Lobato, Bairru Pite, sesta ne’e.

Opiniaun hosi Xefe Estadu ne’e, nia parte aprezenta ba komandu Tenente Jenerál Falur Rate Laek no hamutuk ho Komodoru, sira na’in-tolu (3) tuur hamutuk hafoin foti desizaun, tanba seidauk iha desizaun kona-ba ofisiál ida-ne’ebé atu mai troka fali pozisaun iha Xefe Kaza Militár ninian.

“Enkontru ha’u ho Xefe Estadu, ami rona ona Xefe Estadu nia hanoin no intensaun ida mak ami lori ba atu bele tetu foti desizaun. Normalmente tenke Koronél maibé enkuantu Koronél laiha, bele mós Tenente Koronél,” Coliati hateten.

Entretantu, iha enkontru ne’e, Vise Xefe Estadu Maiór Jeneràl FALINTIL-Forsa Defeza Timor-Leste (F-FDTL), Major Jeneràl Calisto dos Santos “Coliati”, aprezenta mós atividade militár nian ba Xefe Estadu, José Ramos Horta.

“Ha’u ohin reprezenta Tenente Jenerál Falur Rate Laek tanba nia ba vizita iha Oé-Cusse ne’ebé delega hela ha’u mai hasoru Prezidente Repúblika, hodi aprezenta pontu situasaun ba Xefe Estadu relasióna ho atividade militár ninian,” nia dehan.

Majór jenerál ne’e aprezenta atividade militár ninia mak enseramentu ba kursu forsa espesiál iha Tasi-Tolu no mós ho atividade sira seluk ne’ebé hala’o iha teritóriu Timor laran.

Nune’e, Prezidente Repúblika José Ramos Horta hanesan Komandante Supremu apresia ba atividade ne’ebé militár sira hala’o no Xefe Estadu husu atu Komandu mantein militár sira hanesan militár ne’ebé dixiplinadu iha fatin hotu-hotu.

Notísia Relevante: Komandu F-FDTL hahú prepara proposta subtituisaun ba kargu Xefe Kaza Militár

Jornalista : Osoria Marques

Editór        : Cancio Ximenes

iklan
iklan

Leave a Reply

iklan
error: Content is protected !!