DILI, 18 novembru 2022 (TATOLI)—Primeiru-Ministru, Taur Matan Ruak, konsidera, Sekretaria Estadu Komunidade Timor-oan iha rai-li’ur presiza rejista dadus sidadaun sira iha baze dadus.
“Baze dadus tenki iha hodi ajuda sira integra-an di’ak liu la’ós de’it iha ema-nia rain, maibé mós ajuda sira oinsá haruka osan mai iha ita-nia rain bele uza ho di’ak,” PM Taur hateten, hafoin aprovasaun proposta-lei Orsamentu Jerál Estadu (OJE) 2023, iha Parlamentu Nasionál, kinta (17/11).
Maski Governu liuhosi reuniaun Konsellu Ministru (KM) apova alterasaun datoluk ba dekretu-lei númeru 14/2018, loron 17 agostu kona-ba organika VIII Governu Konstitusionál no halo alterasaun daruak ba dekretu-lei númeru 20/2019, loron 31 jullu, kona-ba orgánika Ministériu Negósiu Estranjeiru no Kooperasaun (MNEK), hodi estabelese Sekretaria Estadu Komunidade Timor-oan iha rai-li’ur, maibé to’o agora seidauk propoin ema ida asume kargu Sekretáriu Estadu Komunidade Timor-oan iha rai-li’ur.
“Ezemplu, ideia ne’ebé mak nia fó ba Sekretáriu Estadu atu sensibiliza ita-nia sidadaun sira iha rai-li’ur atubele banati tuir esperiénsia ne’ebé ita-nia veterenu sira agora halo, katak ema idaidak kontribui osan ho valór $30 kada fulan atu kria fundu ida iha Banku Nasionál Komérsiu Timor-Leste (BNCTL),” nia akresenta.
Notísia relevante: Governu estabelese Sekretáriu Estadu Komunidade Timor-oan iha Rai-Li’ur
Tuir PM Taur, ba kondisaun ne’e la’ós de’it sira iha poupansa, maibé bele ajuda membru sira asesu ba kréditu ho seguransa.
“Dalaruma dezafiu iha ita-nia rain laran aumenta, iha rejiaun mós aumenta, ita trata ita-nia an iha dezafiu sira ne’e nia laran, ita bele hetan oportunidade dezenvolve ita-nia nasaun, ida-ne’e mak ita hakarak no ha’u fiar forsa vontade ita-nia nasaun,” nia tenik.
Eis Xefe Estadu dehan, karik Governu atuál la konsege estabelese Sekretáriu Estadu ne’e, espera Governu seluk bele kontinua tanba kontribuisaun sidadaun sira iha rai-li’ur maka’as.
“Sira kontribui la’ós de’it ba sira-nia família, maibé ba nasaun hodi haruka reseita mai, ne’e importante loos. Bainhira ita haree esperiénsia país Cabo-Verde, sira laiha rikusoin maibé ninia populasaun iha rai-li’úr barak liu fali iha rai-laran no nasaun tomak moris hosi reseita hosi sidadaun ne’ebé espalla iha mundu tomak, haruka ba sira-nia rain,” nia salienta.
Xefe Ezekutivu konsidera sidadaun sira iha rai-li’ur merese hetan atensaun boot hosi nasaun tomak.
Jornalista : Antónia Gusmão
Editora : Julia Chatarina
