DILI, 18 novembru 2022 (TATOLI)– Koordenadór Jerál Unidade Kooperasaun iha Ministériu Solidariedade Sosiál no Inkluzaun, João Coimbra, hateten subsídiu $200 ba família hotu-hotu ka uma kain elizivél tenke presta deklarasaun rendimentu iha suku, nune’e ekipa pagamentu bele konfirma uma kain ida-idak nia rendimentu mensál.
“Uma kain hotu-hotu ne’ebé mak elizivél bainhira mosu iha fatin pagamentu, nia obrigadu tenke halo deklarasaun iha suku. Ita deklara simples de’it, iha ne’ebá ita hateten katak ha’u-nia família laiha membru ida mak nia rendimentu liu $500 ba leten,” João Coimbra hateten ba Agência Tatoli, hafoin halo diseminasaun Dekretu-Lei nú 37/2022, de 25 de maio, alteradu ho Dekretu Lei nú 82/2022, 11/11/22, kona-ba pagamentu subsídiu fim do ano ba uma kain iha tinan 2022 ba autoridade lokál inklui ho Polisía Nasionál Timor-Leste (PNTL), iha salaun MSSI, Caicoli sesta ne’e.
Ida-ne’e sei funsiona ba uma kain hotu-hotu tenke prenxe formuláriu ne’ebé mak xefe suku ho Ministériu Solidariedade Sosiál no Inkluzaun (MSSI) prepara iha fatin pagamentu nian.
“Bainhira iha ema balun mak falsifika, dekretu-lei aborda kedas ho situasaun rua importante mak se ho konsiente simu osan $200 mak nia iha biban durante loron 15 nia-laran, devolve fali ba Estadu no se nia la devolve mak bainhira iha evidénsia katak família ruma simu mak nia sei sujeitu ba responsabilidade kriminál. Ida-ne’e hateten iha dekretu-lei 87 artigu 4,” nia dehan.
Dadus uma kain elizivél hamutuk 339,954 maibé ida-ne’e seidauk filtru, bainhira filtru tiha sei halo ezersísiu eskluzaun no karik nia sei monu fali ba 335,000.
Atu halo filtru ba dadus uma kain eleizivél sira, nia dehan, MSSI ho MAE mak halo filtrajen hodi bele haree família ne’ebé mak nia rendimentu $500 ba leten.
“Ita halo filtrajen ba dadus ne’e, MSSI ho MAE sei servisu hamutuk ho Institutu Nasionál Seguransa Sosiál (INSS) hodi halo filtrajen no espera katak sira bele fó sira-nia instrumentu hodi fornese dadus ne’ebé mak adekuadu ba sekretariadu,” nia dehan.
Husu kona-ba pagamentu, nia dehan, ultimu pagamentu ba subsídiu $200 ne’e to’o iha 30 dezembru tinan ne’e no pagamentu ne’e hala’o to’o de’it loron 14 nia laran.
“Pagamentu ne’e rasik sei halo durante loron 14 nia-laran nia sei la liu loron 20. Ida-ne’e ami garante tanba loron 14 ne’e sufisiente atu halo pagamentu ba ita-nia uma kain sira iha territóriu nasionál,” nia dehan.
Atu deside bainhira mak atu halo lansamentu ba implementasaun pagamentu subsídiu $200 fim do ano ba uma kain ne’e hahú halo pagamentu, bainhira MSSI ho MAE asina ona diploma ministeriál.
“Ohin MSSI ho MAE sei posibiliza tempu atu asina diploma ministeriál ne’e no iha ne’e mak foin hakotu pagamentu, maibé konserteja ita sei hahú iha inisíu dezembru tinan ne’e,” nia dehan.
Notísia Relevante: Membru família ho rendimentu mensál $501 labele simu subsídiu $200
Jornalista : Osória Marques
Editór : Cancio Ximenes
