iklan

OPINIAUN

Influensia hosi “ambiente eskolár” iha “prosesu ensinu no aprendizajen”

Influensia hosi “ambiente eskolár” iha “prosesu ensinu no aprendizajen”

Memensio Sequeira Freitas

Hosi: Memensio Sequeira Freitas*)

Lia Makloke 

Timor-Leste dezde tinan 2002 to’o tinan 2022 aprova ona osan Estadu ho montante $23.816.909.811,63 (biliaun $23.8) liuhosi Parlamentu Nasionál ba prosesu konstrusaun no dezenvolvimentu Estadu Direitu Demokrátiku ida-ne’e. Hosi osan ho montante refere ba Orsamentu Jerál Estadu durante tinan 20 nia laran, 6% ka ekivalente ho osan $1.404.282.877,40 (biliaun $1.4) mak aloka ba área edukasaun hodi bele dezenvolve setór edukasuan nu’udar setór prioridade ida ba prosesu dezenvolvimentu rai doben ida-ne’e nian.

Ho osan ida-ne’e, durante tinan 20 nia laran buat barak la’o ona iha setór edukasuan nia laran. Pelumenus, eskola sira loke ona to’o área hotu-hotu iha teritóriu laran tomak no kondisaun mínimu lubuk ida ne’ebé bele fasilita ona atividade ensinu aprendizajen iha eskola sira. Biar nune’e, labele nega katak Estadu liuhosi Ministériu Edukasuan, Juventude no Desportu (MEJD) tenke investe no esforsa di’ak liután atu bele hadi’a di’ak liután setór edukasuan nu’udar lema edukasaun nian ne’ebé hateten “Harii Timor-Leste ho edukasaun ne’ebé kualidade”.

Fatór importante ida atu hadi’a kualidade ensinu no aprendizajen mak ambiente eskolár. Ambiente eskolár refere ba espasu hotu-hotu eskola nian no ninia dinámika ne’ebé akontese iha fatin refere. Herabudin (2009) hateten katak komponente ida-ne’ebé importante tebes iha prosesu ensinu no aprendizajen mak instalasaun infraestrutura relativa ba atividade sira. Instalasaun sira-ne’e inklui espasu etuda jerál nian, sala-de-aula sira, espasu ba atividade akadémiku, sala reuniaun nian (auditóriu), sala ba estudu ekipa ho aprendizajen mídia (kadeira, meza, palku, kuadru no ekipamentu eletróniku sira), laboratóriu, biblioteka, ofisina ba eskola tékniku profisionál sira, sala ba profesór sira, sala ba órgaun diretivu sira, no selu-seluk tan.

Artigu simples ida-ne’e mosu atu aprezenta hanoin ka ideia ruma kona-ba importánsia ka influénsia hosi ambiente eskolár ba iha atividade ensinu no apredizajen nian. Aprezenta uitoan situasaun reál balun kona-ba realidade ne’ebé ita-nia sistema edukativu hasoru hela relasiona ho ambiente eskolár no oinsá ambiente eskolár influénsia ba iha dezenvolvimentu alunu sira-nian (limita de’it ba ezisténsia sala ba aula sira no la’ós abranje fasilidade sira seluk hanesan biblioteka, laboratóriu ka sira seluk tan). Nune’e hein katak artigu simples ne’e bele kontribui orizonte ruma ba ita tomak atu buka kontribui oinsá mak bele mellora liután ita-nia sistema edukativu liuhosi kna’ar ne’ebé ita hala’o loro-loron.

Situasaun balun kona-ba ambiente eskolár iha Timor-Leste

Durante tinan 20-resin ita-nia investimentu ba iha setór edukasaun, realidade hatudu loloos katak buat barak sei falta no presiza intensiva liután ita-nia esforsu atu kompleta buat hirak ne’ebé seidauk iha no seidauk di’ak. Realidade hatudu katak eskola barak ninia edifisiu ladi’ak no sala-de-aula la to’o, alunu barak sei eskola hela iha uma piku ida-nia laran ho kakuluk ku’ak ba-mai hanesan situasaun ne’ebé enfrenta hosi alunu sira iha Ensinu Báziku Filiál Saraída Quelicai-Baucau estuda de’it iha uma piku ida be ku’ak ba ku’ak mai, tantu hosi nia taka baluk to’o ninia didin-lolon sira-ne’ebé mizéria tebe-tebes.

Iha eskola barak ninia meza no kadeira sira kuaze laiha, obriga alunu sira tuur de’it iha rai ka lori rasik sira-nia kadeira hosi uma hanesan buat ne’ebé akontese iha Eskola Bázika Sentrál onze de Março de Maucata iha munisípiu Suai. Eskola balu ninia edifisiu aat tebe-tebes no la merese atu utiliza, hanesan akontese iha Eskola filiál Uatumaluli iha Munisípiu Viquequeno to’o agora seidauk hetan reabilitasaun ruma no fatin seluk tan ne’ebé karik ita lahatene maibé presiza fó atensaun urjente hosi Estadu.

Eskola barak ninia sala-de-aula la to’o kompara ho totál estudante ezistente. Nune’e, obriga eskola tenke koloka estudante sira butuk iha sala ida-nia laran liu tiha fali númeru normál (ideal ba sala ida). Iha eskola foun ne’ebé aplika hosi nasaun bara-barak iha mundu, númeru ideal alunu sira iha sala ida-nia laran mak 20 to’o 36 (iha Timor-Leste bele aplika 40 alunu kada sala bazea ba ita-nia situasaun). Iha realidade ita-nian, sala balun bele akumula estudante to’o 70 ba leten até balu atinje 100 iha sala ida hanesan akontese iha Eskola Sekundária FINANTIL Dili. Akumulasuan estudante ne’ebé barak iha sala ida-nia laran, susar tebe-tebes atu manorin sira jere prosesu ensinu no aprendizajen, até manorin sira-nia fatin atu tuur no book an ba-mai iha sala laran de’it mós susar.

Eskola balun, tanba sala-de-aula la to’o, obriga jerente eskola nian hamutuk ho manorin sira tenke estabelese turmu tolu ba loron ida. Hanesan realidade ne’ebé akontese iha Eskola Sekundária 5 de Maio Dili, implementa hela turmu 3 hanesan turmu dahuluk hahu tuku 08h00 to’o tuku 11h00 (ba 12º ano sira), turmu daruak hahu hosi tuku 11h00 to’o tuku 14h00 (ba 11º ano sira) no turmu datoluk hahu hosi tuku 14h00 to’o tuku 17h00 (ba 10º ano sira). Realidade ida-ne’e redús tiha ona karga oráriu normál ka ideal ne’ebé iha, ke divia oras ensinu ida tenke atinje minutu 40 ka 45 maibé sira tenke redús karga oráriu minutu 25 to’o minutu 30 kada oras hanorin ida.

Relasiona ho sala ba aula ne’ebé la to’o, prejudika mós to’o momentu realizasaun Ezame Nasionál. Eskola públika hotu-hotu iha Dili laran aplika sala aula ida bele utiliza ba sala ezame rua, signifika ezaminandu na’in-40 mak utiliza lisuk sala aula ida ba sira-nia ezame. Oinsá mak estudante sira labele serbisu hamutuk (la haree tuir malu) enkuantu sira tenke tuur rabat malu lahó distánsia iha momentu ezame? Eskola balun hanesan Eskola Sekundária 4 de Setembru Balide até uza sala aula ida ba sala ezame tolu (3), katak estudante na’in-60 mak uza lisuk sala aula ida ba sala ezame nian. Situasaun sira hanesan ne’e la’ós foin akontese, maibé akontese ona durante tinan 20 nia laran no timoroan sira hotu ne’ebé asume ona Ministru Edukasuan hatene hela situasaun ida-ne’e.

Iha aspetu fasilidade eskola nian, ita enfrenta hela problema barak. Eskola públika hotu-hotu seidauk iha laboratóriu (karik balun iha ona mós ne’e tanba inisiativa rasik hosi eskola refere ka tanba hetan doasaun hosi fatin ruma). Eskola barak laiha biblioteka tanba se sala ba aula de’it la to’o ona, oinsá mak sira bele estabelese tan biblioteka? Eskola barak ka kuaze eskola maiória laiha fasilidade desportu, sala ba atividade akadémika estudante sira-nian laiha, laiha sala ba reuniaun ne’ebé bele akumula ema barak no fasilidade sira seluk tan ne’ebé bele fasilita eskola nia atividade sira.

Biar enfrenta hela situasaun reál sira hanesan ne’e, Governu liuhosi Ministériu Edukasuan, Juventude no Desportu hosi Governu dahuluk to’o Governu atuál kontinua halo esforsu hodi rezolve tutuir problema balun. Nu’udar ezemplu, tinan ida-ne’e Ministériu Edukasuan, Juventude no Desportu implementa hela projetu komunitáriu hodi konstrui edifísiu eskola hamutuk 202 unidade (606 sala ba aula) iha teritóriu laran tomak (ezeptu RAEOA) ne’ebé maioria atinje ona pursentu 80. Eskola balun hetan sala tolu (3) no eskola balu hetan sala neen (6) bazea ba identifikasaun ne’ebé hala’o ona hosi parte kompetente ministériu nian.

Ba tinan 2023, tuir planu ne’ebé aposta ona iha OJE ba MEJD, sei konstrui tan edifisiu eskolár hamutuk 343 (1029 sala ba aula), iha ne’ebé edifisiu 227 (681 sala ba aula) sei konstrui ho Orsamentu Jerál Estadu (projetu komunitáriu) no edifisiu 116 (348 sala ba aula) sei konstrui liuhosi fundu empréstimu hosi programa BEST ba teritóriu laran tomak ezeptu RAEOA. Tuir dadus kredível balun ne’ebé hakerek-na’in hetan asesu nota katak konstrusaun edifisiu 343 ne’e maioria sei destinadu ba ensinu báziku ho totál 261 edifisiu, 77 edifisiu ba Pré Eskolár, edifisiu haat (4) ba ensinu sekundáriu jerál no ida (1) edifisiu ba ESTV Keloheda, Uatulari.

Ministériu mós aranja nafatin meza no karteira sira atu bele rezolve tutuir problema sira kona-ba falta meza no kadeira iha eskola sira. Problema mak dala barak estudante sira iha eskola laiha konxiénsia morál atu utiliza meza no kadeira sira-ne’e ho kuidadu, nune’e bele utiliza ba tempu naruk. Iha fatin balun eskola nia sasán lakon iha tempu kalan tanba komunidade la kontribui hodi kuída lisuk fasilidade sira-ne’ebé eskola iha. Ita hotu tenke lembra katak eskola ne’e kompostu hosi pilár tolu (3) importante mak eskola ne’e rasik (profesor sira), estudante sira no inan-aman inan sira. Pilár tolu (3) ne’e hamutuk mak foin forma komunidade ida ke ita hanaran komunidade eskolár. Tanba ne’e, hotu-hotu iha responsabilidade atu kuidadu eskola ho ninia fasilidade tomak.

Influénsia hosi ambiente eskolár ba dezenvolvimentu estudante sira-nian 

Normalmente, ema ida-idak presiza estuda atu aumenta nia kuiñesimentu ba siénsia no teknólojia. Estuda nu’udar prosesu ida-ne’ebé baibain ema hala’o atu eleva ka aumenta ninia kapasidade inteletuál personál. Ne’e atu dehan katak estuda nu’udar pasu ida ba transformasaun hosi atetude ne’ebé mosu hosi esperiénsia no formasaun sira maibé la’ós tanba kreximentu fíziku ka maturasaun isin-lolon nian.

Aprendizajen katak apreende buat ruma ke sei benefisia ba ita-nia an, mezmu ema la apreende de’it buat di’ak. Apreende sempre liuhosi meiu oioin, liuhosi mediasaun oioin no konserteza liuhosi fasilidade oioin mós. Objetivu prinsipál hosi apreende ne’e mak atu mellora di’ak liután ita-nia kuiñesimentu iha aspetu oioin, la’ós de’it aspetu intelijénsia maib’é tenke balansu mós ho aspetu morál.

Aurélio (2001, p. 54) aprezenta katak aprendizagem vem de aprender que significa “tomar conhecimento de algo, retê-lo na memória, graças a estudo, observação, experiência, etc. Nia aprofunda ninia ideia katak arendizajen ne’e prosesu ida-ne’ebé implika ba adkiri ka hetan kuiñesimentu foun atu atinje kreximentu, maturidade no dezenvolvimentu. Autór seluk hanesan Oliveira no Bossa (2000) esklarese katak aprendizajen ne’e akontese iha individu (ema) liuhosi intermédiu ema seluk no fasilidade sira.

Ambiente nu’udar fatór importante ida hosi fatór sira seluk atu lori ema ida ba atinje ninia metas estudu nian. Sala ba estudu ka sala ba aula ne’ebé konfortável sei halo fasil estudante sira atu atinje rezultadu ne’ebé óptimu liu no ho nune’e estudante sira bele sente di’ak liután valór hosi prosesu estudu ne’ebé nia hala’o. Ambiente iha ninia signifikadu jerál mak sasán ka buat ruma (tantu buat moris komu buat la moris) ne’ebé bele influansia ba dezenvolvimentu umanu. Influensiadu iha sentidu signifikante no hola papel iha kreximentu no dezenvolvimentu estudante sira-nian (Deminah, 2021).

Hank (2006), iha ninia estudu kona-ba importánsia hosi espasu fíziku iha dezenvolvimentu no aprendizajen, konklui katak estudante sira presiza espasu ne’ebé fó ba sira seguransa, konveniénsia no liberdade atu movimenta no estuda ho di’ak. Eapasu (ambiente eskolár) tenke organiza ho forma ida di’ak atu fasilita aspetu oioin ne’ebé sei estimula estudante sira. Ho nune’e duni, mak ambiente eskolár iha duni ninia influénsia ba prosesu aprendizajen ne’ebé akontese iha eskola.

Ambiente simboliza ema ida ninia moris hosi ninia kompozisaun no oganizasaun; ho forma ida ne’e, edukadór sira tenke mós partisipa iha estudante sira-nia vida liuhosi planeia atividade sira ho estudante no promove sosialiazasaun entre sira no sira-nia ambiente eskolár ne’e rasik. Ho modun ka maneira ida-ne’e duni mak ema sei persebe katak espasu fíziku (ambiente eskolár) influensia iha prosesu dezenvolvimentu no envolvimentu estudante sira-nian ho sira-nia meiu (Franklin, 2010).

Ambiente eskolár ne’ebé seguru, limpu, kondusivu, konfortável no bem organizadu sei fó implikasaun di’ak tebe-tebes ka pozitiva ba estudante sira-nia prestasaun estudu. Monteiro iha ninia peskiza ida realiza iha tinan 2010 kona-ba as influências dos ambientes escolares no processo de ensino e aprendizagem, aprezenta difikuldade oioin ne’ebé eskola (liu-liu eskola públika sira) hasoru. Difikuldade ida hosi difikuldade baraa-barak ne’ebé iha mak kondisaun hosi eskola ne’ebé la oferese apoiu ba iha prosesu aprendizajen nian, inklui espasu ba administrasaun ne’ebé laiha no limitasaun sala ba aula sira.

Realidade ida-ne’e hatudu momoos loos iha eskola barbarak iha Timór laran. Há’u foti Eskola Sekundária FINANTIL ho Eskola Sekundária 5 de Maio nu’udar ezemplu hodi reprezenta eskola sira iha teritóriu laran (razaun tanba realidade katak eskola rua ne’e enfrenta menus sala ba aula no presiza atensaun sériu). Eskola FINANTIL rasik ninia alunu kada tinan atinje 1500 ba leten, enkuantu sala ba aula ne’ebé eziste iha de’it sala 11. Matemátikamente, se ita distribui alunu 1500 ba iha sala aula 11 ne’e (alunu na’in 40 ba kada sala), kada sala ida bele akumula maizumenus estudante hamutuk na’in 130 liu, no ida-ne’e duni mak durante ne’e akontese.

Iha fali Eskola Sekundária 5 de Maio, totál estudante ne’ebé estuda iha eskola refere kada tinan atinje na’in 2000 resin, enkuantu sala ba aula ezistente iha de’it sala 13. Ho realidade ida ne’e mak obriga eskola tenke estabelese turmu tolu (3) hanesan dehan ona iha parte dahuluk nian, maibé tenke sofre lakon karga oráriu normál.

Situasaun sira hanesan ne’e bele rezolve ho dalan rua. Dalan ida mak Ministériu presiza konstrui tan edifisiu foun ba eskola rua ne’e. Se ita hakarak kada sala hetan totál alunu ideál (alunu 40 kada sala tuir ita-nia situasaun) mak hosi totál sala eziste iha FINANTIL ne’ebé iha de’it sala 14 ne’e presiza konstroi tan sala aula hamutuk 30 resin tan. Enkuantu, iha Eskola 5 de Maio, Governu presiza konstroi sala aula hamutuk maizumenus sala 37 tan. Kabe ba Ministériu atu halo planu ba oin, basta bele buka solusaun ida di’ak ba eskola refere atu eskola sira seluk ne’ebé enfrenta problema hanesan atu bele mellora kualidade ensinu tuir ita hotu nia espetativa.

Solusaun ida tan mak Ministériu liuhosi Servisu Edukasaun Munisípiu Dili bele orienta ba eskola públika sira iha Díli laran atu la simu tan finalista sira Ensinu Báziku nian hosi munisípiu seluk. Há’u hanoin Servisu Edukasaun Munisípiu Dili hahú tinan hanorin 2022 orienta ona eskola sira iha Dili laran atu simu de’it estudante sira ba sala ida ho estudante na’in 40 no bele orienta mós atu tinan oin la simu estudante sira hosi munisípiu.

Solusaun ida ne’e la’ós atu halo diskriminasaun (foho-oan tenke adapta ho Dili-oan, lae), maibé nu’udar esforsu ida de’it atu labele iha akumulasaun estudante ne’ebé barakliu, nune’e prejudika fali ba kualidade ensinu. Alternativa solusaun ida-ne’e fiar katak sei hetan krítika barak hosi entidade oioin, maibé ita tenke iha ona polítika ida adekuadu ba iha melloramentu kualidade ensinu liuhosi alternativa solusaun bara-barak, la’ós de’it iha Díli maibé iha munisípiu sira seluk mós.

Lia Maktaka 

Hafoin tinan 20-resin ita investe iha setór edukasaun, afinál das kontas ita sei enfrenta problema bara-barak. Ida-ne’e mosu tanba buat ida problema sosiál ne’e sai nunka hotu durante ita ema sei existe iha mundu ida-ne’e. Importante mak ita iha vontade, defini public policy ne’ebé di’ak no liu-liu boa fé hosi polítiku no governante sira atu mezmu neineik maibé tenke beibeik buka solusaun ba problema sosiál hirak ne’e.

Atu ita bele responde ita-nia espetativa ba edukasaun ida kualidade, klaru ke presiza halo duni ezersísiu barak ho sériu tuir planu ne’ebé konsta ona iha Planu Estratéjiku Dezenvolvimentu Nasionál. Iha Planu Estratéjiku Deenvolvimentu Nasionál, iha pájina 19, hatuur estimativa ba konstrusaun sala ba aula ne’ebé tenke atinje toó tinan 2030, katak to’o tinan 2030, Timor-Leste tenke iha ona sala ba aula hamutuk 3367 ba nível edukasaun Pré-Eskolár to’o Ensinu Sekundária (Jerál no Tékniku Vokasionál).

Se tinan ida-ne’e ita konstrui ona edifísiu eskolár hamutuk 202 (ekivalente ho sala ba aula hamutuk 606), no tinan oin ita konsege konstrui tan edifísiu eskolár hamutuk 349 ka sala ba aula hamutuk 1029 no ida-ne’e kontinua ba beibeik, mak to’o tinan 2030 karik ita bele atinje estimasaun iha PEDN nia laran ne’e.

Ita-nia problema ida mak bainhira Estadu konstrui tiha edifísiu foun ida iha tinan ruma enkuantu tinan barak nia laran edifísiu tuan ezistente sira lahetan manutensaun, entaun ita iha tiha edifísiu foun maibé edifísiu tuan aat fila-fali tiha. Aleinde ne’e, komunidade no estudante sira mós dala barak la kontribui hodi kuída lisuk fasilidade sira-ne’ebé eskola iha, halo kon ke ita enfrenta nafatin de’it problema ne’ebé hanesan biar Estadu liuhosi ministériu relevante esforsa an atu solusiona.

Tanba ne’e, ita hotu-hotu iha responsabilidade atu kuidadu kondisaun ne’ebé ita-nia Estadu aranja ona, nune’e bele garantia realizasaun prosesu ensinu no aprendizajen la’o nafatin no loron ruma ita bele atinje duni metas, kualidade ensinu ida iha ita-nia rain atu bele kompete ho rai sira seluk.

*) Hakerek-na’in nu’udar profesór iha Eskola Sekundária Jerál 12 Novembru Díli no hela iha Manleuana.

 

 

iklan
iklan

Leave a Reply

iklan
error: Content is protected !!