iklan

HEADLINE, MUNISÍPIU, VIQUEQUE

BTL, E.P sei lansa projetu kanalizasaun bee-moos ba abitante Lacluta

BTL, E.P sei lansa projetu kanalizasaun bee-moos ba abitante Lacluta

Bee-moos. Imajen/Espesiál

VIQUEQUE, 21 novembru 2022 (TATOLI)–Koordenadór Bee Timor Leste, Empreza Públika (BTL, E.P) munisípiu Viqueque, Marito da Costa, informa, tempu badak sei halo lansamentu projetu kanalizasaun bee-moos ba abitante iha área urbana postu Lacluta, munisípiu Viqueque.

“Kompañia manán-na’in Timor Rindo, Unipesoal Lda mak sei kaer obra instalasaun bee-moos ba abitante sira,” Koordenadór hateten ba Agência Tatoli, iha postu Viqueque Vila, segunda ne’e.

Projetu ne’e ho kustu $582.100 resin ba kanalizasaun kanu, enkuantu ba konstrusaun tanke daudaun sei iha faze konkursu.

“Kanalizasaun ne’e sei uza bee-matan Surik Lulik, ne’ebé lokaliza iha foho Bibileo nia hun no bee ne’e rasik sei kobre suku Dilor no Laline, ho distánsia purvolta kilómetru 4,5. Kapasidade bee iha tempu udan litru 5/segundu, maibé bainhira tempu bai-loron volume bee bele tun ba litru 3/segundu,” nia akresenta.

Notísia relevante: Instalasaun fasilidade bee-moos iha suku rua Viqueque ho kondisaun a’at

Projetu kanalizasaun bee-moos ne’e sei benefisia uma-kain 6.613 iha suku rua inklui ba uma maternidade.

“Bainhira obra ne’e ramata, ami sei instala kontadór atu komunidade selu bee ne’ebé sira uza,” nia hato’o.

Aleinde ne’e, planu melloramentu bee-moos iha área urbana iha postu Ossu daudaun sei iha faze konkursu, enkuantu postu Uatulari no Uatucarbau sei iha faze dezeñu, bainhira finaliza mak fó sai anúnsiu públiku hodi kompañia sira bele tuir konkursu.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!