iklan

EKONOMIA, HEADLINE

Delio halibur $70.000 durante hetan oportunidade dala-neen serbisu iha Austrália

Delio halibur $70.000 durante hetan oportunidade dala-neen serbisu iha Austrália

Traballadór, Delio Fernandes, halo hela serbisu iha planta melánsia iha Austrália. Imajen/Espesiál

DILI, 21 novembru 2022 (TATOLI)—Traballadór timor-oan, Delio Fernandes, ne’ebé hetan oportunidade serbisu iha Austrália, liuhosi seasonal worker programme (SWP) hosi Sekretaria Estadu Formasaun Profisionál no Empregu (SEFOPE), konsege halibur osan hamutuk $70.000.

“Ha’u hetan oportunidade bá serbisu Austrália iha área ortikula, entre tinan 2017 to’o 2022 hetan oportunidade dala-neen, konsege halibur osan $70.000,” Delio Fernandes, informa ba Agência Tatoli, via telefónika, segunda ne’e.

Osan ne’ebé traballadór ne’e halibur, konsege sosa motór mio ida, karreta bemo ida, carry ida, sosa rai, halo uma, inklui suporta nesesidade família.

Nia konta tuir, durante hetan oportunidade serbisu iha rai-li’ur, esperiénsia ne’ebé nia hetan mak kuu brokólis no melánsia no tau ein pakotementu ho lalais tuir empregadór nia alvu.

“Ita tenke serbisu ho fuan hodi bele hetan konfiansa hosi kompañia. Dezafiu ne’ebé ha’u hetan mak serbisu todan, tanba klima dalaruma malirin ka bele mós manas liu, tanba ita adapta ambiente foun, maibé dezafiu sira hotu halo ha’u firme hodi hasoru ho kalma, pasiénsia, esforsu, no orasaun hodi bele atinje ita-nia mehi,” nia akresenta.

Notísia relevante: Traballadór timor-oan serbisu iha Koreia no Austrália kontribui reseita millaun $78

Traballadór ne’e rekoñese, serbisu iha ema-nia rai ne’e la fasil, tanba iha ambiente foun, maibé tenke hatudu nafatin nasionalizmu no patriotizmu tanba sai hosi Timor-Leste reprezenta nasaun.

“Entaun tenke hatudu attitude di’ak, atu nune’e bele loke dalan ba maluk joven seluk ne’ebé hein hela oportunidade. Dezafiu sira hanesan esperiénsia, espera sei labele para iha ne’e de’it, tenke tenta esforsu hodi loke oportunidade foun hodi bele kontribui no redús dezempregu  iha ita-nia rain, maski neneik maibé beibeik,” nia otimista.

Nune’e, nia hato’o rekomendasaun ba Governu liuhosi SEFOPE atu buka tuir rekursu lubuk iha área oinoin ne’ebé antes ne’e hetan ona esperiénsia iha rai-li’ur, hodi apoiu aplika sira-nia eperiénsia ne’ebé hetan ona iha Timor.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!