Estudante 75 hetan bolsa estudu área dezenvolvimentu nasionál iha Portugal no Brazil
DILI, 21 novembru 2022 (TATOLI)—Ministériu Ensinu Superiór Siénsia no Kultura (MESSK) no Fundu Dezenvolvimentu Kapitál Umanu (FDCH, sigla portugés) realiza serimónia despedida ba bolseiru timor-oan na’in-75, ne’ebé sei desloka ba Portugal no Brazil hodi kontinua estudu iha ensinu superiór.
“Ita-nia estudante bolseiru sira hili variedade área maibé bazeia ba Planu Estratéjiku Dezenvolvimentu Nasionál (PEDN) iha área prioridade hanesan Direitu, Agrikultura, Saúde no área seluk tan,” Diretór Ezekutivu FDCH, Cristóvão dos Reis, informa hafoin ramata serimónia despedida bolseiru 75, iha salaun Delta Nova, segunda ne’e.
FDCH prevee fundu hamutuk $777.006 ba bolseiru 75, ne’ebé bolseiru 63 sei kontinua estudu iha Portugal no bolseiru 12 seluk iha Brazil.
Notísia relevante: FDCH prevee millaun $17 ba programa haat iha tinan 2023
Bolseiru sira kompostu hosi méritu 30 no dosente 45, ne’ebé sei hala’o estudu iha nível lisensiatura, mestradu no doutoramentu.
“FDCH iha kontratu ho bolseiru atu regula durasaun tempu estudu bazeia ba grau akadémiku, ne’ebé lisensiatura ho durasaun tinan-tolu maibé tuir kontratu hasa’e ba tinan-haat. Sira sei halo viajen ba nasaun rua hahú hosi fulan-novembru to’o dezembru. Posibilidade grupu dahuluk bele dezloka ona iha novembru nia laran, hafoin maka sei kontinua tan ba oin,” nia tenik.
Ministru Longuinhos enkoraja bolseiru estuda maka’as
Iha biban hanesan, Ministru Ensinu Superior Siénsia no Kultura, Longuinhos dos Santos, enkoraja bolseiru atu haka’as-an estuda maka’as.
“Ha’u husu ba bolseiru sira hotu, bainhira to’o ona iha universidade sira iha nasaun rua, tenke kontinua hatudu dedikasaun boot liuhosi estuda maka’as hodi bele hetan susesu tanba imi mak sei sai hanesan embaixadór akadémiku hodi reprezenta nasaun Timor-Leste iha Komunidade País Lian Portugés (CPLP, sigla portugés) no ninia rezultadu sei hetan influénsia imajen estudante timor-oan sira,” Ministru fó hanoin, liuhosi mensajen ne’ebé lee hosi Diretór Ezekutivu FDCH, Cristóvão dos Reis.
Governante ne’e konsidera, papél estudante maka buka haka’as-an nafatin atu sai ema ne’ebé iha kualidade, nune’e bele tau konfiansa rekursu umanu hodi bele garante futuru nasaun.
“Ha’u hakarak hato’o susesu ba imi-nia perkursu akadémiku, atu kontinua kontribui ativamente ba dezenvolvimentu nasaun tuir meta sira ne’ebé prevee ona iha Planu Estratéjiku Dezenvolvimentu Nasionál tinan 2011-2030,” Ministru reforsa.
Tuir Ministru, atribuisaun bolsa estudu ne’e nu’udar investimentu atu loke oportunidade ba formasaun dosente inklui kapasitasaun rekursu umanu iha área prioritária liuhosi kualifikasaun dosente sira.
Ho nune’e, Ministru apresia ho vontade dosente sira hotu hosi Instituisaun Ensinu Superiór privada sira ne’ebé maka hetan oportunidade atu hadi’a kompeténsia siénsia iha lian portugés.
“Susesu iha imi-nia estudu sira sei kontribui maka’as liután ba futuru atu hadi’a kualidade ensinu no aprendizajen iha Instituisaun Ensinu Superiór nia laran hodi kumpre lema Ministériu Ensinu Superior Siénsia no Kultura. Nu’udar Ministru, hakarak agradese ba serbisu tékniku ne’ebé mak Fundu Dezenvolvimentu Kapitál Umanu halo ona hodi forma ekipa juri ho treinadór sira maski hasoru difikuldade oin-oin, maibé konsege finaliza prosesu ida-ne’e hodi fó dalan ba bolseiru hosi nasaun CPLP,” nia apresia.
Jornalista : Tomé Amado
Editora : Julia Chatarina
