iklan

HEADLINE, MUNISÍPIU, VIQUEQUE

MJ lansa integrada online sertidaun moris no BI ba idozu Uatucarbau

MJ lansa integrada online sertidaun moris no BI ba idozu Uatucarbau

Ekipa DJSRN MJ halo hela atendimentu ba idozu trata sertidaun moris no BI, iha postu Uatucarbau, segunda (21/11). Imajen Tatoli/Vitorino Lopes da Costa

VIQUEQUE, 21 novembru 2022 (TATOLI)–Ministériu Justisa (MJ) liuhosi Diresaun Jerál Servisu Rejistu Notariadu (DJSRN), segunda ne’e, lansa rejista integrada online móvel sertidaun moris no Billete Identidade (BI), iha postu administravu Uatucarbau, munisípiu Viqueque.

Família akompaña idozu sira trata sertidaun moris no BI, iha postu Uatucarbau, segunda (21/11). Imajen Tatoli/Vitorino Lopes da Costa

Diretór Jerál MJ, Crisjogno da Costa Neto, hateten, inisiativa ne’e hodi fasilita idozu sira fasil trata dokumentu tanba postu Uatucarbau dook hosi munisípiu Viqueque

“Idozu sira barak labele trata sertidaun moris no Billete Identidade. Tanba ne’e, ohin ami kontinua halo atendimentu móvel iha postu Uatucarbau hodi halo atendimentu ba idozu sira ne’ebé labele ba munisípiu trata dokumentu. Bainhira inan aman sira laiha dokumentu hirak ne’e iha tempu independénsia, maka ita konsidera ilegál maski ita hanesan rai-na’in maibé ita seidauk timor-oan. Sidadaun tenke iha Billete Identidade,” Diretór Jerál hateten iha serimónia lansamentu integrada online, iha postu Uatucarbau, segunda ne’e.

Atendimentu ne’e ho durasaun semana rua, hahú 20 novembru to’o 02 dezembru.

Notísia relevante: Sidadaun Hotu Tenke Hetan Sertidaun RDTL

Diretór Jerál MJ, Crisjogno da Costa Neto, entrega sertidaun moris ba idozu, iha postu Uatucarbau, segunda (21/11). Imajen Tatoli/Vitorino Lopes da Costa

Iha fatin hanesan, Administradór postu Uatucarbau, munisípiu Viqueque, Alfredo dos Santos, agradese ba ekipa DJSRB, ne’ebé hakat mai postu Uatucarbau hodi halo atendimentu ba idozu sira iha suku neen.

“Husu ba Ministériu Justisa atu kontinua realiza atividade ne’e to’o suku, tanba ferik no katuas sira barak maka oras-ne’e labele la’o. Tanba ne’e, husu se bele to’o suku hodi inan aman ne’ebé seidauk trata sira-nia dokumentu karik bele trata hela,” nia tenik.

Durante serimónia lansamentu ne’e, Diretór Jerál MJ hamutuk ho Autoridade postu distribui simbolikamente sertidaun moris no BI ba idozu 10 hosi suku neen.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!