iklan

OPINIAUN

Polítika Xanana Gusmão: Polítika mizerikordia

Polítika Xanana Gusmão: Polítika mizerikordia

Heribertus Soares Pedro

Hosi: Soares Pedro*)

 

Introdusaun

Ita mak kriatura ida-ne’ebe úniku hosi kriatura sira seluk tanba ita ema iha hanoin ne’ebe rasionál. Ita kria hosi Nai (Maromak) hodi sai Nai saseluk ne’ebé mak úniku (He created us in His image and Likeness). Hanesan ema-ne’ebe ho rasionalidade, ema iha kapasidade hodi esplika nia realidade moris, halo identifikasaun ba natureza tomak no halo evaluasaun ba asaun no atitude ne’ebé mak hatudu ba ema seluk. Ida-ne’e hatudu hosi Lider Karismátiku Xanana Gusmão katak ita iha hanoin, ita tenke halo buat ida-ne’ebé mak diferensa ho buat seluk (kritura sira seluk). Ita nu’udar timoroan ita iha ita-nia realidade rasik hodi buka tuir no hatene sé mak ita?

Hosi ne’e, ita hatene realidade katak ema hanesan umanu ne’ebe mak iha rasionalidade no konxiente kona-ba hanoin no perspetiva hotu hosi hanoin tradisaun sira uluk to mai ohin loron. Iha sékulu-V, Sophokles, Protagoras no Diogenes fó hanoin kona-ba oinsá atu valoriza umanu nia kriasaun ne’ebé úniku mak hanesan umanu ida-ne’ebe iha hanoin no ideia. Ho ideia no hanoin, umanu eziste nu’udar kriatura úniku no perfeitu. Umanu maske laiha fulun ne’ebe mahar hanesan animál sira hodi taka kulit, maibe umanu iha hanoin hodi buka fatin ne’ebe seguru hodi salva an hosi malirin. Ho ida-ne’e, hatudu katak umanu de’it mak bele iha tipu ida-ne’e, hodi ajuda an (Ozias Fernandes, 1983: 33).

Aristoles iha ninia perspetiva kona-ba umanu, nia hanaran umanu hanesan animál ida-ne’ebe mak iha hanoin no ideia. Hanesan animál ne’ebé mak iha ideia, ema iha hanoin foun sira hodi tetu no halo desizaun hotu-hotu (Magnis-Suseno, 1997:33). Ida ne’e hatudu iha Xanana nia luta hodi lori Timor-Leste livre hosi kolonializmu. Katak Xanana iha fuan ne’ebe boot hodi hakuak no halibur ema hotu atu buka tuir sira-nia direitu rasik ka direitu ba Liberdade.

Xanana Gusmáo

Kay Rala Xanana Gusmão, moris iha 20 Juñu 1946 iha Manatutu, Timor-Leste. Moris iha país nia laran, hamutuk ho alin mane ida 91) no feto na’in-lima. Hotu tiha ensinu primáriu no hahú fali ensinu sekundáriu misaun Katólika Nosa Señora Fátima, iha Dare, hafoin mai fali iha Dili. Hahú sevisu sedu liu, hala’o funsaun fiskál iha obra aban bain rua nian no lorokraik hanorin iha eskola Xineza. Iha Abril 1974, hala’o servisu iha redasaun “Lian Timor nian” (A Vos Timor). Xanana Kaben ho Emília Baptista iha 1969 (div) ho oan na’in-rua (2) no kaben ho Kristy Sword Gusmão iha 2000 ho oan na’in-tolu (3). 

Polítika Xanana Gusmáo

Akontesimentu ba Revolusaun Ai-funan (Revolução dos Cravos) iha Portugál, iha 25 Abril 1974, no hetan oportunidade ba auto-determinasaun no independénsia, Kay Rala Xanana Gusmão, deside hamutuk ho Asosiasaun Sosiál Demokrata Timorense (ASDT), ne’ebé foin atu forma no iha tinan ida-ne’e duni, transforma iha Frente Revolusionária Timor-Leste Independente (FRETILIN). Hala’o servisu hanesan jornalista no fotógrafu, Kay Rala Xanana Gusmão, asume kargu nu’udar Direktor Adjuntu ba Departamentu Informasaun partidu nian.

Iha loron 07 dezembru 1975, hafoin hala’o tiha invazaun fronteirisa armada iha teritóriu Timor-Leste, Indonézia deside invade kapitál Dili. Hafoin Prezidente FRETILIN, Nicolau Lobato mate iha 31 dezembru 1978, hamutuk ho membru Komité Sentrál FRETILIN nian, Kay Rala Xanana Gusmão, simu kna’ar hodi organiza hikas fali luta. Iha fulan Marsu 1981, organiza Konferénsia Nasionál FRETILIN nian ba dahuluk, durante ne’e, foti nia nu’udar líder Rezisténsia no Komandante-Xefe FALINTIL nian (Forsa Armada Libertasaun Nasionál Timor-Leste). Iha Marsu 1983, Kay Rala Xanana Gusmão, hatudu nia pragmatizmu, bainhira hahú hala’o negosiasaun formál ho Forsa Armada Indonézia nian (ABRI/TNI), hodi halo sesar-fogu, ne’ebé dura to’o fulan agostu tinan ne’ebá ne’e.

Kay Rala Xanana Gusmão harii no dezenvolve Polísia Unidade Nasionál ne’ebé hatudu iha kooperasaun ativa ho membru Igreja Katólika no ho autoridade tranzitória Timor-Leste, Kay Rala Xanana Gusmão aproveita fulan lima sesar-fogu hodi dezenvolve rede organizada klandestina nasionál nian ba dahuluk, ne’ebé ema hatene hanesan “Frente Klandestina”. Iha 1988 susesu ba inisiativa Unidade Nasionál lori Kay Rala Xanana Gusmão harii CNRM-Konsellu Nasionál Rezisténsia Maubere, hanesan espresaun komandu nasionál apartidáriu luta nian; CNRM ne’ebé tuir mai mud aba CNRT, Konsellu Nasionál Rezisténsia Timorense.

Tinan ida hafoin masakre Santa Kruz, no hafoin hala’o tiha iha gerilla tinan 17 nia laran, ema kaptura Kay Rala Xanana Gusmão iha loron 20 Novembru 1992 iha kapitál Dili. Maske hetan elojiu iha nível internasionál, Kay Rala Xanana Gusmão, sai nu’udar alvu hodi simu julgamentu hanesan sena ida no dadur iha prizaun ida-ne’ebé destinadu ba krimunozu komún. Maibé, tanba presaun hosi komunidade internasionál, autoridade indonézia sira, obriga halo nia transferénsia ba Prizaun Cipinang, rezervadu ba prezu polítiku sira.

Iha prizaun, Xanana Gusmão, dedika nia tempu hodi halo estratéjia ba Rezisténsia, hodi estuda mós lian indonéziu, inglés no estuda kona-ba direitu. Nia mós halo pintura no hakerek poezia, haki’ak nia talentu ida-ne’ebé hatene tiha ona iha 1975, bainhira nia manan Prémiu Timorense ba Poezia husi poema “Mauberíadas”. Nia pintura balu faan tiha ona no proveitu hosi pintura hirak ne’e, Xanana Gusmão oferese ba Rezisténsia. Iha 1994, nia ensaiu polítiku balun, publika tiha ona iha livru ida kona ba Timor-Leste: Povu ida, Pátria ida.

Iha Abril 1998, iha Konvensaun Nasionál Timorense iha diáspora, ne’ebé estabelese Konsellu Nasionál Rezisténsia Timorense (CNRT) nian, Xanana Gusmão reafirma tiha ona hó aklamasaun hanesan líder Rezisténsia Timorense no Prezidente CNRT.

Tuir mai iha presaun internasionál ne’ebé makaas liután kona-ba libertasaun Xanana Gusmão nian no deklarasaun hosi Prezidente Indonézia BJ Habibie, hodi promete atu fó independénsia ba Timor-Leste, bainhira hala’o konsulta populár iha país ida-ne’e, rejeita planu autonomia ne’ebé hato’o hosi Governu, Kay Rala Xanana Gusmão transferidu ba Prizaun Cipinang iha loron 10 fevereiru 1999, hodi ba fali iha prizaun domisiliária iha Salemba, parte sentrál Jakarta nian.

Prosesu dezenvolvimentu polítiku timorense hala’o lalais loos no rekuiñesimentu internasionál jeneralizadu hosi kualidade Xanana Gusmão nian hanesan estadista no líder, nu’udar razaun atu hetan vizita barak-barak ba nia uma prizaun nian, hosi parte governu estranjeiru, inklui mos Sekretária Estadu EUA, Madaleine Albright, eis Prezidente EUA, Jimmy Carter, Ministru Negósiu Estranjeiru Austrália Alexander Downer no Ministru Negósiu Estranjeiru, Japaun Masahiko Komura.

Referendun patrosinadu hosi ONU iha loron 30 agostu 1999, proposta ba autonomia ne’ebé hato’o hosi Indonézia rejeitada ho ‘modo esmagador’, hatudu sinál katak tenke hakotu duni okupasaun indonézia iha Timor-Leste no hahú prosesu tranzisaun ne’ebé lidera hosi ONU iha Timor-Leste. Ida-ne’e, hanesan aktu demokrátiku ba dahuluk, iha istória Timor-Leste nian.

Iha 7 setembru 1999, Kay Rala Xanana Gusmão, sai hosi prizaun domisiliária. Iha agostu 2000, hala’o Kongresu Nasionál CNRT nian iha Dili ba dahuluk, hodi foti Kay Rala Xanana Gusmão nu’udar Prezidente CNRT ka Kongresu Nasionál. Iha novembru 2000 to’o abril 2001, Kay Rala Xanana Gusmão sai hanesan portavós ba Konsellu Nasionál, órgaun lejislativu ida-ne’ebé timoroan nian duni, iha Administrasaun Tranzitória Timor-Leste, kompostu hosi reprezentante partidu polítiku sira, sosiedade sivil, grupu pós autonomia no krensa relijioza oioin.

CNRT/CN deolvidu iha loron 09 juñu 2001. Hafoin hala’o tiha disolusaun CNRT/CN, Kay Rala Xananna Gusmão konsentra nia esforsu iha AVR ka Asosiasaun Veteranu Rezisténsia, organizasaun ida ne’ebé halo parte membru antigu sira hosi Frente Klandestina, atu hodi kria kondisaun ba sira-nia partisipasaun kualifikada iha prosesu dezenvolvimentu país nian.

Iha 14 abríl 2002, Kay Rala Xanana Gusmão eleitu hanesan Prezidente Timor-Leste, hodi simu pose hanesan Prezidente Repúblika Demokrátika Timor-Leste iha 20 Maiu 2002. Nu’udar Prezidente Repúblika to’o finál ba nia mandatu, iha maiu 2007.

Hafoin hosik tiha Prezidénsia, Kay Rala Xanana Gusmão, eleitu hanesan Prezidente partidu polítiku CNRT ka “Kongressu Nasionál ba Rekonstrusaun Timor-Leste”, ne’ebé forma iha abríl 2007. Iha fulan-juñu nia laran, Kay Rala Xanana Gusmão, hala’o kampaña ba eleisaun lejislativa iha nasaun laran tomak. Iha 30 juñu hala’o eleisaun lejislativa, ne’ebé CNRT simu iha segundu lugar, boot liu iha votu no hodi forma kedas aliansa ida ho partidu polítiku tolu mak PD (Partidu Demokrátiku) no Koligasaun ASDT-PSD, no hosi aliansa ne’e hanaran AMP (Aliansa Maioria Parlamentár) no hodi garante asentu iha Parlamentu Nasionál ho ema na’in-37 hosi membru deputadu hamutuk 65.

Iha 03 agostu 2007, Prezidente Repúblika, José Ramos Horta, konvida ofisialmente AMP atu forma Governu tuir mai. Iha 08 agostu 2007, iha Palásiu Prezidensiál Lahane, Kay Rala Xanana Gusmão, simu pose iha IV Governu Konstitusionál, nu’udar Primeiru-Ministru Repúblika Demokrátika Timor-Leste no mandatu ba Governu ne’e nian hakotu iha tinan 2012.

Iha 07 jullu 2012, iha eleisaun lejislativa, CNRT hetan votu boot liu, hodi garante asentu 30 hosi asentu 65 iha Parlamentu Nasionál. CNRT forma koaligasaun ho Partidu Demokrátiku (PD) no Frente Mudança (FM), hodi asegura hamutuk asentu 40 ba Bloku Koligasaun hosi partidu tolu nian.

Partidu koligasaun hetan konvite atu forma Governu hosi Prezidente Repúblika ne’ebé mós mak foin eleitu, Sua Eselénsia Taur Matan Ruak no iha 08 agostu 2012, V Governu Konstitusionál [Governu Konstitusionál] simu pose, bainhira IV Governu Konstitusionál] kompleta loloos ninia Governasaun tinan lima (5). Kay Rala Xanana Gusmão simu pose nu’udar Primeiru-Ministro no Ministru Defeza no Seguransa ba mandatu daruak tinan lima nian.

Ohin loron, Xanana ne’ebé la asume kargu ruma iha Estadu, maibé hanesan Lideransa polítika ne’ebé mak iha fuan no domin ba rai ida-ne’e, nafatin fó nia an hodi apoiu nafatin Estadu ida. Loos duni katak diferensa idiolojia no polítika ne’e parte ketak ida maibé nasaun RDTL ne’e lulik tebes iha ne’ebé ita-nia heroi da patria sira fó sira-nia isin, ruin no raan mak sosa. Ho fuan, Xanana Gusmão nafatin apoiu no suporta másimu Governu ida-ne’e hanesan lideransa Polítika ne’ebe mak maduru. 

Polítika Mizerikordia Xanana Gusmão

Ema deside hodi moris mesak hanesan haktuir hosi Aristoles katak “ema hanesan umanu independente”. Umanu iha ninia responsabilidade morál hodi konsidera nia maluk sira-ne’ebe mak presiza tulun no apoiu. Kontestu ida-ne’e refere ba Xanana Gusmão. Hanesan umanu iha ninia definisaun ne’ebé mak kona-ba luta ema-nian katak ema-ne’ebe moris livre no iha dever hodi partisipa iha vida polítika. Ema sira-ne’ebe mak moris depende ba ema seluk mós mak hanesan ema sira-ne’ebe mak iha sira-nia kontribuisaun ka partisipasaun ba luta libertasaun rai ida-nian (Alasdair MacIntyre, 1999:7).

Alasdair MacIntyre, hanesan filózofu hosi Estadu Unidu Amérika (EUA), ne’ebé moris iha Skotlandia, nia iha ninia hanoin ida-ne’ebe mak diferensa tebes kona-ba umanu. MacIntyre haktuir katak ema hanesan umanu rasionalidade. Maske nune’e, rasionalidade ema-nian seidauk sai ba nia hanesan umanu independente. Razaun tanba bainhira ema hasoru susar no terus iha moris (moras no idade avansadu) hatudu katak ema laiha forsa no sei presiza ema seluk. Tanba laiha ema ida mak fó tulun rasik ba nia an rasik, maibé nia presiza ajuda no apoiu ema seluk nian. Ho ida-ne’e, MacIntyre haktuir katak umanu hanesan umanu rasionalidade no mos dependente.

Hosi ida-ne’e Xanana tau iha pratika. Iha ne’ebe banhira Timor-Leste ukun an, Xanana fó nia an tomak hodi Lidera nasaun Timor-Leste nu’udar prezidente primeiru iha ámbitu ukun rasik an. Iha períodu tuir mai, Xanana sai ema-ne’ebe mak iha esperansa boot tebes ba Timor nia futuru liuhosi Polítika Mizerikordia ne’ebe Xanana rasik mak ho fuan ho laran hodi tula liman ba prezidentr sira tuir mai hanesan Prezidente Ramos Horta (2007-2012), Prezidente Taur Matan Ruak (2012-2016), Prezidente Francisco Guterres Lú- lo (2016-2022), no ikus mai Xanana nafatin iha fuan hodi tula liman ba Prezidente Ramos Horta hodi sai Prezidentr ba daruak (2022-2027).

Hanoin mundu nian ne’ebe mai ho teoria filózofiku hodi adora umanu hanesan umanu ne’ebe mak iha konxiente ba nia an rasik no sei kontinua hanoin hela. Hanesan animál laiha ideia no hanoin no sira hodi sai hanesan objetu ba ema hodi uza tuir hakarak ida-idak. Hosi MacIntyre nia hanoin kona-ba dependente ema-nian sai mós mai ita hanesan hanoin foun ida no motiva ita hodi buka kauza hosi ita-nia limitasaun iha perspetivu filozofia morál no étika.

Iha livru Etika Nicomachea, Aristoteles hatoo nia argumentu liuhosi etika virtude nian sai hanesan matadalan ba ema iha relasaun ema ida no ema seluk iha moris sosiál (Aristoteles, Nicomachean Ethics, tra. Embun Kenyowati, 2004:11). Hodi ba to’o iha moris ksolok no alegria ema seluk nian mak ema hotu iha obrigasaun atu halo di’ak. Buat ne’ebe di’ak hanesan buat ida-ne’ebe mak abstratu maibé nia existe, no halo moris ne’e sempre iha ksolok no perfeitu.

Thomas Aquinas mós mai ho ninia viertude teolójika tolu (3) mak hanesan fiar, esperansa no domin. Tanba hosi fiar, esperansa no domin fó spiritu ba ema hodi moris iha virtude morál no étika iha moris loro-loron nian (K. Bertens, 2002:222). Hosi virtude tolu (3) ne’ebé iha ona mak halo ema hotu-hotu moris iha ksolok rohan laek nian no sente katak moris ne’e úniku no Maromak rasik prezente hanesan autór prinsipál ba moris ida-ne’e. Tanba liuhosi ema seluk, hatudu Imajen Maromak nia Prezensa.

Tuir MacIntyre katak virtude moris ne’ebé mak prezisa ema hotu-hotu iha nu’udar umanu rasionál no dependente mak virtude Mizerikordia. Mizerikordia hanesan maktudu an ida iha ema ida-idak banhira hola parte iha ema seluk nia susar no terus. Hola parte iha ema seluk nian hodi fó tulun iha sira-nia terus no iha fatin hanesan ita mós sente saida mak ema seluk sente ne’e. Mizerikordia hanesan domin ida-ne’ebe mak laiha rohan (unconditional love) ba ema seluk, tanba moris sei iha relasaun no amizade ba malu iha familia ida de’it mak familia Nai Nian ne’ebe hamutuk iha uma fukun ida deit, uma fukun mundu ida-ne’e. Tanba ne’e, sentimentu domin ba malu sai esensiál moris ema hotu nian. 

Lia Maktaka

Xanana la halo milagre, maibe iha Xanana iha milagre”. Iha ne’ebe hatudu hosi Xanana nia simplisidade, ónestidade, no umoris. Ho nia simplisidade no domin hatudu Xanana nia Polítika Mizerikordia ne’ebé boot ba nia povu no nasaun. Ita hare agora maske nia tinan mós nakaras ona maibé nia sei la lakon espíritu servi nian ba nia povu ki’ik no ki’ak sira. No mós nia sei luta nafatin hodi defende soberania rai-maran hosi Indonezia no tasi hosi Austrália nian liu-liu hodi defende ita-nia riku-soin iha tasi laran hanesan Mina no Gas.

Ho ninia esfrosu sira-ne’e hotu, hatudu katak nia hadomi tebes nia povu no nasaun doben Timor Lorosa’e. Xanana mai ami laiha rohan. Xanana ba Timor ida-ne’e mak Nain ba Nia Xanana. Xanana Natureza Timor nian. Xanana Lia-Nain Timor Nian. Xanana Ai-riin tuan Timor Nian. Xanana Manu Aman Timor Nian. Xanana Liurai Timor Nian. Xanana oh Xanana, Xanana ba ó laiha rohan. (*) 

Referénsia:

Aristoteles, Nicomachean Ethics: Sebuah Kitab Suci Etika, penerj. Embun Kenyowati. Jakarta: Teraju Masterpiece Filsafat, 2004.

Bertens, K. Etika. Jakarta: Gramedia, 2002.

Fernandes, O. “Humanisme: Citra Manusia Budaya Timur Barat”, (ms). Maumere: Sekolah Tinggi Filsafat Katolik Ledalero, 1983.

Gusmao, X. To Resist is to Win (The Autobiography of Xanana Gusmão). Australia: Aurora Books, 1999.

Gusmão, X. E Os Primeiros 10 Anos Da Construção Do Estado Timorense. Lisboa: Publicado em Portugal por Portu Editora, 2012.

MacIntyre, A. Dependent Rational Animals: Why Human Beings Need the Virtues. Chicago and La Sale, Illinois: Open Court Publishing, 1999.

Magnis-Suseno, F. 13 Tokoh Etika Sejak Zaman Yunani Sampai Abad ke-19. Yogyakarta: Kanisius, 1997.

*) Hakerek Na’in Alumni Eskola Sekundária No. 01 Laulara, Aileu. Vida Misionáriu hosi Kongregasaun SVD.

 

 

iklan
iklan

One Comment

Leave a Reply

iklan
error: Content is protected !!