iklan

EDUKASAUN, HEADLINE

UCT hahú halo preparasaun simu avaliasaun institusionál hosi ANAAA

UCT hahú halo preparasaun simu avaliasaun institusionál hosi ANAAA

Reitór UCT São João Paulo II, Padre, Joel Casimiro Pinto. Imajen Tatoli/Francisco Sony

DILI, 21 novembru 2022 (TATOLI)–Reitór Universidade Katólika Timorense (UCT, sigla portugés) João Paulo II, Padre, Joel Casimiro Pinto, hateten, daudaun ne’e parte universidade halo hela preparasaun hodi hein avaliasaun hosi Avaliasaun Akreditasaun Akadémiku (ANAAA) iha tinan 2024.

“Ami foin hetan lisensa operasionál hosi Governu iha tinan 2021-2022, ne’ebé sei to’o iha tinan 2024 maka ami foin tama ba avaliasaun institusionál ne’ebé sei hala’o hosi ANAAA. Agora ami halo ona preparasaun, tinan oin ami prepara tan depois tinan tuir mai ami halo preparasaun liután. Ami garante katak tinan 2024 ami prontu simu avaliasaun,” Padre, Joel Casimiro, relata iha salaun Delta Nova, segunda ne’e.

Regra avaliasaun institusionál ba instituisaun ka universidade foun ida maka tenke kompleta ezisténsia iha tinan-rua, hafoin identifikasaun instituisaun maka foin bele halo avaliasaun, hafoin liu tinan-lima mai fali maka kontinua halo filafali avaliasaun ba programátiku.

Tuir Responsável universidade ne’e, jerente universidade sira kompreende ona saida mak atu halo hasoru avaliasaun, tanba ne’e sei la tuur hodi hein tempu de’it, maibé halo ona preparasaun ba rekursu, husu apoiu hosi Fundu Dezenvolvimentu Kapitál Umanu (FDCH, sigla portugés) no halo kolaborasaun ho universidade sira hosi rai-li’ur hanesan Indonézia, Malázia, Kambódia, Filipina, Portugal no Brazil.

Notísia relevante: ANAAA halo avaliasaun atu hadi’a kursu no instituisaun sira

Aleinde ne’e, UCT mós hola ona parte ona iha Asosiasaun Universidade Katólika Aziátiku (AUCA, sigla inglés) inklui tama iha International Federation of Chatolic University (IFCU).

“Esforsu sira ne’e UCT halo hanesan estimulasaun ida atubele hatudu kualidade hodi kompete ho universidade sira ne’ebé hamahan-an organizasaun rua ne’e. Ami-nia kooperasaun ho universidade iha Indonézia, ho Universidade Atmajaya, Widia Mandala no Universidade Hasanudin. Ami foku ba área medisina no enfermajen, depois iha rai-laran ho Universidade Nasionál Timor-Lorosa’e (UNTL),” nia tenik.

Universidade privada ne’e halo mós kooperasaun ho International Bussiness School hosi Kambódia, ne’ebé foin maka liuhosi akordu asina memorandu entendimentu, ne’ebé kooperasaun ne’e atu prepara dosente lisensiatura sira.

“Preparasaun atu hasoru avaliasaun institusionál, konserteza hakarak hetan rezultadu di’ak no instituisaun ne’ebé harii ne’e hakarak fó kualidade di’ak liuhosi ninia performance di’ak, tanba ne’e maka tenke prepara-an,” nia otimista.

Nune’e mós, halo preparasaun ba infraestrutura, ne’ebé daudaun ne’e UCT hahú lansa ona fatin dahuluk ba konstrusaun biblioteka, laboratóriu inklui sala aula 18 ba estudante sira, nune’e bele garante estudante ativu hamutuk 700 resin inklui dosente 60 to’o 70 hodi bele ezerse direitu nu’udar estudante no manorin, hodi aselera prosesu ensinu aprendizajen kualidade ba UCT iha futuru.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!