iklan

HEADLINE, MUNISÍPIU, VIQUEQUE

CNE halo edukasaun sívika kona-ba eleisaun parlamentár ba abitante Macadique

CNE halo edukasaun sívika kona-ba eleisaun parlamentár ba abitante Macadique

CNE Viqueque divulga edukasaun sívika ba abitante suku Macadique, tersa (22/11). Imajen Tatoli/Vitorino Lopes da Costa

VIQUEQUE, 22 novembru 2022 (TATOLI)–Komisaun Nasionál Eleisaun (CNE, sigla portugés), tersa ne’e, halo edukasaun sívika durante loron-ida, kona-ba eleisaun parlamentár ba abitante no estudante suku Macadique, postu administrativu Uatulari, munisípiu Viqueque.

“Atividade ne’e iha ámbitu eleisaun parlamentár ne’ebé sei akontese iha tinan 2023. Eventu ne’e importante ba Timor-Leste atu determina futuru nasaun. Dezenvolvimentu depende ba líder sira ne’ebé eleitu hosi ita rasik maka sei hili. Bainhira laiha eleisaun maka dezenvolvimentu mós la la’o,” Komisáriu CNE destakadu munisípiu Viqueque, Olávio da Costa Monteiro Almeida, informa ba Agência Tatoli, iha aldeia Betulari, suku Macadique, tersa ne’e.

Notísia relevante: CNE abertura edukasaun sívika ba eleitór Pássabe hasoru eleisaun parlamentár

Atividade ne’e realiza ho tema: ‘ha’u sente lakon no moe wainhira ha’u la ba vota.’

“Tema ne’e hodi dezafia ita no eleitór hotu katak vota ne’e importante, se ita la vota sente lakon no sente moe. Tanba sá ema seluk ba vota ninia destinu, ita ida-ne’ebé la ba vota ita la hanoin destinu rasik. Tanba ne’e vota ne’e importante,” nia akresenta.

Biban ne’e, nia konvida komunidade tenke partisipa votu iha eleisaun parlamentár ne’ebé sei akontese iha tinan 2023.

Iha fatin hanesan, Xefe suku Macadique, Afonso dos Reis, hateten, liuhosi edukasaun sívika ne’e, partisipante bele hetan informasaun liu kona-ba prosesu eleisaun parlamentár.

“Ha’u hanoin edukasaun sívika ne’e importante tebes ba komunidade hodi bele partisipa iha eleisaun ho di’ak. Tanba liuhosi edukasaun sira bele hasa’e komunidade nia koñesimentu. Ha’u husu komunidade tenke pasiénsia partisipa,” nia hato’o.

Atividade ne’e partisipa hosi Sekretaria Tékniku Administrasaun Eleitorál (STAE), autoridade no komunidade lokál, no estudante hamutuk 146.

Jornalista   : Vitorino Lopes da Costa
Editora        : Julia Chatarina

iklan
iklan

Leave a Reply

iklan
error: Content is protected !!