DILI, 22 novembru 2022 (TATOLI)–Institutu Jestaun Ekipamentu, Institutu Públiku (IGE, I.P), segunda ne’e, koloka ona ekipamentu pezadu hodi normaliza hikas mota rua ne’ebé konsege sobu irrigasaun iha munisípiu Manatuto, postu administrativu Manatuto Vila no postu administrativu Laclo, kauza hosi inundasaun ne’ebé akontese iha loron 01 abril 2021.
Ho ida ne’e, Asesór Polítiku Prezidente Repúblika, Tomas do Rosário Cabral, durante vizita ba mota Rembor, koordena kedas ho ekipa IGE, I.P hodi bele tulun koloka ekipamentu pezadu no hadia hikas kondisaun irrigasaun hodi fasilita bee tama populasaun sira-nia natar laran.
“Irrigasaun kuaze a’at hotu no tinan-rua kuaze populasaun la halai natar, tanba ne’e Prezidente Republika husu tulun ba IGE ho koordenasaun autoridade no povu Manatuto hodi bele tulun hadi’a hikas kondisaun mota hodi bee bele tama fali ba populasaun nia natar,” Tomas Cabral, hateten liuhosi nota ne’ebé Agência Tatoli asesu, tersa ne’e.
Notísia relevante: MAP konsege rezolve irrigasaun haat hosi projetu ualu
Inundasaun iha loron 04 abril 2021 konsege estraga totál irrigasaun, nune’e halo populasaun labele halo atividade natar kuaze tinan-rua ona. Iha loron 07 jullu 2022, Asesór Polítika Prezidente Repúblika, Tomas do Rosário Cabral lori karta rekomendasaun hosi Prezidente Repúblika, José Ramos Horta, liuhosi Xefe Kaza Sivil hodi hala’o reniaun ho autoridade no agrikultór Manatuto tanba kestaun ne’e presiza hetan intervensaun lalais.
Prezidente Republika, José Ramos-Horta antes ne’e hala’o ona diálogu ho populasaun sira hodi husu rezolve problema irigasaun, nune’e iha loron 15 juñu 2022, Xefe Estadu hala’o mos enkontru ho Prezidente IGE, I.P, Ermenegilda da Costa Laurentina, hodi informa preokupasaun povu nune’e institutu bele hadi’a mós kondisaun estrada ligasaun Cribas ba aldeia Camedar, suku Barique, postu administrativu Natarbora, munisípiu Manatuto.
IGE lori ekipamentu pezadu boot rua hodi tau iha mota Rembor no tuir planu iha tersa ne’e ekipa hahú serbisu hadi’a bee-dalan ne’ebé hetan estragu grave.
Ho apoia ne’e, Administrador munisípiu Manatuto, Bernardo Lopes, agradese ba Prezidente Repúblika, José Ramos Horta, hodi koordena ho IGE bele tulun koopera serbisu di’ak liután ba nesidade povu iha tempu emerjénsia.
Jornalista : Antónia Gusmão
Editora : Julia Chatarina
Se Timor Leste hadiak irigasaun sira iha Mota Malibaca nebe fornese ba Natar sira iha Tunubibi, Mota Loes fornese be ba Sare, Mota Mola Fornese be ba Beilaco, Mota Lomea fornese be ba Kulu-oan e no mota sira seluk nebe fornese be b Natar sira ih Timor Leste nia laran, Ita Timor Leste la presiza importa foz hosi rai liur, Tanba ita nia Natar sira nee bele fornese foz ba iha Timor Leste no bele kolleta tinan ida dala rua.
No Timor Leste bele fornese ( Expor) fos ba Indonesia ( West Timor) liu hosi ida nee mos aumenta ona rendimento ekonomia povu ninian.
Obrigado