Membru komisaun F husu komunidade hamoos uma ninin prevene dengue
DILI, 22 novembru 2022 (TATOLI)—Membru komisaun F trata asuntu Saúde iha Parlamentu Nasionál, Deputada Lúcia Taeki, husu komunidade atu hamoos uma ninin hodi prevene moras dengue tanba daudaun ne’e tama ona ba tempu udan.
Notísia Relevante: MS-PAM hahú prepara estratéjia hodi kombate moras dengue
“Agora tama ona ba tempu udan atu ko’alia kona-ba moras dengue la’ós responsável Ministéiru Saúde nian de’it maibé ema hotu-hotu tenke kontribui,” Lúcia Taeki hateten iha Parlamentu Nasionál, tersa ne’e.
Atu ema hotu livre hosi moras dengue, husu komunidade iha kada bairu ida-idak tau atensaun ba limpeza tanba kapitál Dili sempre sai zona mean ba moras dengue.
“Zona mean ba moras dengue iha Dili kada tinan sempre iha hela de’it, entaun bainhira atu tama ona situasaun hanesan ne’e ita hotu atu kontribui atu redús liuhosi limpeza iha uma ninin ka uma leet sira-ne’e.” nia hateten.
Deputada bankada opozisaun ne’e fó hanoin ba Governu liuhosi Ministéiru Saúde (MS), Ministéiru Administrasaun Estatál (MAE) ne’ebé kria ekipa task force durante ne’e atu serbisu hamutuk oinsá nafatin hala’o atividade prevensaun.
Nia husu ba Ministériu Saúde atu bele prepara ekipamentu no ai-moruk hanesan abate hodi distribui ba komunidade no bainhira iha área ne’ebé risku atu halo fumigasaun, tanba dengue ne’e fó ameasa ba labarik ki’ik sira.
Kestaun hanesan hato’o mós hosi membru Komisaun F, Deputada Helena Martins, hodi fó hanoin Ministériu Saúde eleva kapasidade ba iha parte rekursu umanu ninian atu bele halo prevensaun másimu ba moras dengue.
Tanba iha tinan kotuk kazu dengue aumenta no fatin ne’ebé atu akomoda hodi labarik sira ba baixa mós defísil tebes.
Maibé deputada hosi bankada Fretilin ne’e fó hanoin ba komunidade liu-liu iha Dili atu bele hamoos ida-idak nia baitru, areadór uma oin, aruma lata mamuk, hasai bee nalihun iha roda laran ho sira seluk hodi prevene kazu dengue .
Nune’e, presiza ema hotu kontribui hodi bele livre hosi moras dengue iha tempu udan, maske agora seidauk iha kazu dengue maibé halo prevensaun ne’e importante.
Jornalista : Nelson de Sousa
Editór : Cancio Ximenes
