iklan

EKONOMIA, HEADLINE

Rezultadu serbisu iha Austrália, Luís halo negósiu oho karau no loke kost

Rezultadu serbisu iha Austrália, Luís halo negósiu oho karau no loke kost

Traballadór timor-oan, Luís Freitas, halo hela serbisu iha planta brókolis iha Austrália. Imajen/Espesiál

DILI, 22 novembru 2022 (TATOLI)–Traballadór timor-oan, Luís Freitas, ne’ebé hetan oportunidade serbisu iha Austrália, hosi Sekretaria Estadu Formasaun Profisionál no Empregu (SEFOPE) liuhosi programa Seasonal Worker Programme (SWP), konsege halibur osan hodi loke negósiu.

Luís Freitas hetan oportunidade serbisu iha Bairnsdale, Austrália iha tinan 2018, iha empreza Bulmer Farm, hetan kontratu durante fulan-neen no serbisu kuu brókolis.

“Ho fulan-neen de’it ha’u fila ba Timor lori osan $8.000 no konsege halo negósiu hanesan oho karau no halo kost kuartu lima, agora Organizasaun Naun Governamentál (ONG) lokál ida mak aluga,” Traballadór timor-oan ne’e relata ba Agência Tatoli, via telefónika, tersa ne’e.

Notísia relevante: Empreza rua kontrata tan traballadór timor-oan 45 bá serbisu iha Austrália

Nia haktuir, hafoin ramata kontratu fulan-neen no fila mai Timor, iha loron 14 setembru 2022 hetan tan oportunidade hosi Agency Madec liuhosi programa Pacific Labor Mobility (PALM), nune’e bele bá Austrália hodi kontinua tan serbisu iha empreza Aaa Farm, iha sidade Melbourne, parte Werribbe durante fulan-sia.

“Daudaun ha’u sei hala’o hela knaar iha Austrália, konta ha’u hetan ona oportunidade dala-rua,” nia akresenta.

Durante serbisu iha Austrália, nia koñese ambiente, kultura, serbisu ekipa no hasa’e abilidade iha lian inglés.

“Dezafiu ne’ebé ha’u hasoru foufoun mak ambiente foun, diferente tebes ho ita nia-rai, dalaruma iha tempu malirin difísil tebes atu ita atu tama serbisu iha to’os, tanba dalaruma jelu nakonu iha modo tahan, entaun difikulta ita kuu ho di’ak,” Luís tenik.

Ho difikuldade sira, nu’udar traballadór ne’ebé hakarak muda família nia moris tenke pasiénsia.

“Bainhira ema order barak tama, ita bele serbisu to’o kalan no dalaruma udan mós pasiénsia tenke tama nafatin serbisu atubele responde order hosi supermarket sira. Dezafiu hirak ne’ebé ha’u enfrenta nunka hamate espíritu no vontade atu serbisu tanba ha’u hakarak tebes atu muda hau-nia moris no família uma-laran,” nia salienta.

Nune’e, traballadór timor-oan ne’e rekomenda ba Governu liuhosi SEFOPE atu fó apoiu ba traballadór sira.

“Ho haraik-an husu SEFOPE bele fó apoiu nafatin ba maluk joven sira ne’ebé karik mai serbisu iha Austrália fila bá Timor iha hanoin hakarak halo atividade negósiu, nune’e bele kria tan serbisu ba ita-nia maluk sira seluk,” nia dehan.

Luís Freitas bolu atensaun ba joven sira hotu ne’ebé hakarak halo mudansa ba moris tenke aproveita didi’ak oportunidade, kuidadu saúde no aprende lian inglés nune’e bele komunika iha serbisu fatin bainhira hetan oportunidade.

Jornalista   : Arminda Fonseca

Editora        : Julia Chatarina

iklan
iklan

3 Comments

  1. My children want to work in neighbours Australia to work and demonstrate my good behavior and work so that I can earn money for Timor-leste’s famili..

  2. My children want to work in neighbours Australia to work and demonstrate my good behaviour and work so that I can earn money for Timor-leste’s famili

  3. I am Timor-leste looking for work in a neighboring country Australia working well and following whatever rules when mandor makes me work like this I will follow the rules mandor Will be climate

Leave a Reply

iklan
error: Content is protected !!