DILI, 23 novembru 2022 (TATOLI)–Ministru Prezidénsia Konsellu Ministru, Fidelis Manuel Leite Magalhães, aprezenta dekretu-lei ne’ebé hetan ona aprovasaun iha reuniaun Konsellu Ministru (KM), atu kria Institutu Públiku Millennium Challenge Account Timor-Leste.
“Institutu Públiku ne’ebé tutela ba Primeiru-Ministru, sei funsiona hanesan instrumentu implementasaun finansiamentu ne’ebé sei hetan doasaun hosi ajénsia governamentál amerikana Millennium Challenge Corporation (MCC), tuir akordu kompaktu ne’ebé asina ona iha loron 19 jullu liubá no sai hanesan responsável ba jestaun finansiamentu no ba koordenasaun implementasaun ne’ebé atu promove liuhosi entidade nasionál sira,” refere nota ne’ebé Agência Tatoli asesu, hafoin reuniaun KM ne’ebé hala’o iha edifísiu administrasaun munisípiu Ataúro, kuarta ne’e.
Nune’e, implementasaun projetu sira ne’e sei sai hanesan responsabilidade Governu liuhosi entidade nasionál sira tuir ida-idak ninia kompeténsia.
Notísia relevante: PN ratifika akordu kompaktu MCC
Governu Timor-Leste no ajénsia governamentál amerikana MCC, iha loron 19 jullu 2022, asina akordu kooperasaun hodi apoia orsamentu ho montante millaun $484.
Totál osan ne’e, MCC disponibiliza millaun $420 no Governu Timor-Leste kontribui millaun $64. Nune’e, valór ne’ebé disponibiliza hosi Timor-Leste sei aloka de’it ba projetu tratamentu bee, ezgotu no drenajen nian, hosi osan sira-ne’e millaun $34 sei uza hodi halo ligasaun ba uma sira, restante millaun $30 sei utiliza hodi apoia instalasaun sistema konvensionál no ba instalasaun bomba bee nian.
Entretantu, Konsellu Administrasaun MCC iha dezembru 2017, hili ona Timor-Leste, nu’udár nasaun ne’ebé kumpre rekizitu hodi implementa programa ba promosaun kreximentu ekonómiku, ne’ebé aliña ho prioridade dezenvolvimentu nasionál.
Iha loron 21 jullu 2018, Ministru Fidelis no Vise-Prezidente Adjuntu MCC nian, Jonathan Brooks, asina ona akordu finansiamentu inisiál ida, ho valór $750.000 hodi kria ekipa ida, ne’ebé integra iha programa MCC, ho misaun atu identifika setór ekonómiku sira ne’ebé sei dezenvolve durante implementasaun programa.
Ekipa Dezenvolvimentu Kompaktu ba Dezenvolvimentu Governu Timor-Leste (CDT-TL) ofisiálmente kria iha loron 25 marsu 2019 no lidera hosi Embaixadór, Constâncio Pinto.
Ministru Fidelis lidera delegasaun altu nível ida, iha loron 11 to’o 17 abríl 2022, ne’ebé kompostu hosi reprezentante 14 hosi entidade governamentál oin-oin, halo viajen ba Estadu Unidu Amérika (EUA) hodi halo negosiasaun akordu kompaktu ho MCC.
Jornalista : Antónia Gusmão
Editora : Julia Chatarina
