iklan

ATAÚRO, MUNISÍPIU

PN aprova FEDA millaun $13 garente povu Ataúro nia moris di’ak

PN aprova FEDA millaun $13 garente povu Ataúro nia moris di’ak

Ministru Administrasaun Estatál, Miguel Pereira de Carvalho. Imajen Tatoli/António Daciparu

ATAÚRO, 23 novembru 2022 (TATOLI)—Ministru Administrasaun Estatál (MAE), Miguel Pereira de Carvalho, hateten Parlamento Nasionál aprova Fundu Espesiál Devenvolvimentu Ataúro (FEDA) millaun $13 atu garante povu Ataúro nia moris di’ak.

Notísia Relevante: PN aprova Fundu Espesiál Dezenvolvimentu Ataúro

“Oitavu Governu Konstitusionál kria meus hotu, mekanizmu hotu hodi garante kondisaun populasaun iha illa Ataúro nia moris di’ak. Ne’e mak liuhosi munisípiu Ataúro iha tinan ida-ne’e ho nia orsamentu rasik kuaze millaun $2,5, nune’e tau matan ba ninia populasaun mais de 10.000-resin. Governu liuhosi Parlamentu Nasional aprova FEDA ho orsamentu millaun $13 atu fó kondisoens sira-ne’ebe mak ita nia komunidade enfrenta iha fatin ida-ne’e,” Governante ne’e hateen ba jornalista sira iha suku Manumeta, kuarta ne’e.

Populasaun Ataúro iha tinan barak desde Timor-Leste independénsia, suspira dezenvolvimentu ba infraestrutura, espesifikamente kondisaun ba eletrisidade, estrada no bee-moos.

“Eletrisidade iha Ataúro ne’e loron ida, kalan oras ualu de’it. Agora, hanesan eventu sira hanesan ne’e, eletrisidade lakan 24 horas,” nia dehan.

Governu sei solusioana difikuldade ne’ebe mak populasaun iha Ataúro enfrenta liuhosi fundu espesiál dezenvolvimentu espesiál Ataúro (FEDA).

“Ataúro iha loron 01 jeneiru 2022, muda nia estatutu hosi postu administrativu ba munisipiu. Tantu, bainhira nia sai munisípiu ida, atribuisaun iha kompeténsia hodi tau matan ba populasaun Ataúro nia moris,” nia dehan.

Notísia Relevante: FEDA prioritiza projetu infraestrutura iha Ataúro

Administradór munisíipio Ataúro, Dominggos Soares, hateten populasaun Ataúro iha direitu atu asesu ba bee-moos no eletrisidade.

“Eletrisidade durante ne’e lakan iha oras ualu, oras haat iha dader no oras haat iha lorokraik to’o kalan. Úniku bee-matan boot iha Atauro ne’e iha berao, tanba ita-nia terrenu ne’e tesik mai fatuk lolon, entaun udan ona fatuk monu bele estraga,” nia hateten.

Tuir nia, estrada ba suku kuaze hotu-hotu iha asesu maibé estrada to’o de’it iha Arlo no  Makadadi ne’e kuaze populasaun efrenta difikuldade susar asesu ba estrada.

Munisípiu Ataúro kompostu hosi suku lima ho totál populasaun tuir sensu populasaun 2015 nian ne’e hamutuk rihun 11.744, kompostu feto na’in rihun 5.509 no mane hamutuk 115 ne’ebé hela iha aldeia 19 nia laran.

Notísia Relevante: Hahú janeiru 2022, Ataúro sai munisípiu foun

Jornalista : Mirandolina Barros Soares

Editór       : Cancio Ximenes

iklan
iklan

Leave a Reply

iklan
error: Content is protected !!