iklan

EKONOMIA, HEADLINE

Estudante neen sei tuir kompetisaun siénsia naturál iha Kolómbia

Estudante neen sei tuir kompetisaun siénsia naturál iha Kolómbia

Ilustrasaun siénsia natural. Imajen/Espesiál

DILI, 25 novembru 2022 (TATOLI)–Estudante hosi eskola ensinu báziku privadu na’in-neen sei reprezenta estudante timor-oan hamutuk 393.000 resin iha territóriu nasionál hodi tuir kompetisaun olímpiku internasionál siénsia naturál iha sidade Bogota, Kolómbia.

Koordenadór Siénsia, Luís Nívio, hateten, kompetisaun ne’e sempre realiza kada tinan no tinan ne’e realiza ba dala-19, ba estudante ho idade 15 ba kraik.

“Ita iha estudante neen preparadu atu partisipa kompetisaun, tanba ne’e ita iha delegasaun rua, kada delegasaun kompostu hosi estudante na’in-tolu,” Koordenadór informa iha salaun enkontru Ministériu Edukasaun Juventude no Desortu (MEJD) Vila Verde, sesta ne’e.

Estudante neen ne’ebé sei dezloka ba Kolómbia kompostu hosi estudante Neydra Huto hosi Dili Internasionál School, Helfia Demeriana Vieira Aniceto no Francisco hosi eskola Koléjiu Santo Inácio de Loiola Kasait, Graça de Deus Abi no Jonisio Costa dos Santos hosi Sentru Aprendizajen Formasaun Eskolár (CAFE, sigla portugés) Maliana no Simplício Nunes de Deus hosi eskola Portuguesa de Dili, Ruy Cinatti.

Notísia relevante: Grupu 50 sai manan-na’in iha kompetisaun siénsia no matemátika

Kompetisaun ne’e sei realiza iha área siénsia naturál, maibé sei inklui mós matemátika iha laran. Haree mós ba disiplina tolu fízika, kímika no biolojia.

Alende ne’e, kompetisaun ne’e sei fó mós oportunidade ba kada nasaun sira bele mai ho delegasaun rua.

Bainhira to’o ona iha Kolómbia, estudante sira tuir filafali teste ho modelu tolu, teste eskola multipla no teorítikal ba individuu, hafoin halo teste esperimentál ba kada grupu. Teste sei hala’o iha loron 03 dezembru 2022 no rezultadu sei anúnsia iha loron 11 dezembru 2022.

“Ita espera molok loron determinadu delegasaun sira bele iha ona Kolómbia, tanba iha oráriu ba teste ne’e deside ona loron ida teste no loron ida pauza, ho nune’e rezultadu sei fó sai iha 11 dezembru, hafoin loron 12 dezembru delegasaun sira sei filafali ba ida-idak ninia nasaun,” nia tenik.

Estudante sira heta uluk formasaun durante fulan-rua molok partisipa kompetisaun, atu nune’e bele hetan koñesimentu adekuadu iha área siénsia natural.

Estudante, Neydra Huto, hosi Dili Internasionál School, sente orgullu bele hetan oportunidade hamutuk ho maluk na’in-lima seluk hodi lori nasaun Timor-Leste nia naran inklui reprezenta kolega estudante iha territóriu nasionál, partisipa iha kompetisaun siénsia naturál.

“Ida-ne’e hanesan onra boot ida. Hanesan estudante ne’ebé hetan ona fiar, ami hamutuk ho ekipa sei esforsu-an atu hatudu ba mundu katak estudante timor-oan mós iha kapasidade atu kompete ho nasaun avansadu sira liuhosi siénsia. Ami-nia preparasaun durante ne’e di’ak loos no ami garante katak ami bele kompete ona ho nasaun avansadu sira. Ami sei hatudu ami-nia kualidade iha eventu ne’e,” nia otimista.

Jornalista   : Tomé Amado      

Editora        : Julia Chatarina

iklan
iklan

Leave a Reply

iklan
error: Content is protected !!