iklan

EKONOMIA, COVALIMA, POLÍTIKA

Feira 28 novembru: stand bola guling selu taxa $900 ba Estadu

Feira 28 novembru: stand bola guling selu taxa $900 ba Estadu

Autoridade Covalima halo abertura ba jogu bola guling hodi komemora loron proklamasaun independénsia 28 novembru. Imajen Tatoli/Celestina Teles.

COVALIMA, 25 novembru 2022 (TATOLI)–Prezidente Komisaun Organizadór 28 novembru iha Covalima, Francisco de Jesus Alves, informa komisaun organizadora loke feira jogu bolu guling iha ámbitu komemora 28 novembru ne’e kada stand selu taxa $900 ba Estadu.

Notísia Relevante: Autoridade Covalima loke feira kulinária-bola guling komemora 28 novembru

“Ita-rejista bola guling stand sia (9) ne’ebé kada stand-ida sira kontribui osan $900 hodi selu taxa no sira mós kontribui orsamentu uitoan hodi fó apoiu ba komisaun organizadór ne’e la’ós obrigasaun maibé sira apoiu ho voluntáriu hodi realiza eventu ho di’ak,” Francisco de Jesus Alves hateten ba jornalista sira, iha kampu ladi, sesta ne’e.

Komemorasaun 28 novembru iha munisípiu Covalima tinan 2022, loke atividade jogu bola guling ne’e tanba agora daudaun komisaun organizadora iha de’it osan $1.400 ne’ebé fahe ba seksaun sira hanesan isar bandeira nasional $700-resin, seksaun liturjia $170-resin no seksaun sira seluk tan entaun osan la sufisiénte.

Tanba ne’e, komisaun organizadór rejista feira bola guling stand sia (9), ne’ebé kada stand ida selu taxa $900 no hosi orsamentu hirak ne’e hodi finansia seksaun parada, sosa sasán halo manutensaun, sosa rai henek hodi halo ateru rai, limpeza jerál, aluga tenda, sosa terpal, iluminasaun hodi selu ba EDTL, E.P

“Taxa hosi bola guling ne’e, balun ita uza ba atividade komisaun ba seksaun sira tanba orsamentu 1,400 la sufisénte. Hafoin gasta osan sira-ne’e ami sei relata relatóriu,” nia informa.

Komisaun loke feira ne’e durante loron ualu (8) ne’ebé hahú abertura iha loron 21 novembru to’o loron 28 novembru kalan.

Iha feira ne’e, komisaun la’ós loke de’it atividade bola guling maibé negosiante sira mós faan hahan kulinária no harii baraka hodi loke kioske.

Durante loke feira komisaun organizadora mós destaka nia membru na’in-neen (6) hodi tau matan ba negosiante sira no grupu sira-ne’ebé loke bola guling.

Komerasaun 28 novembru tinan 2022, maske públiku kestiona kona-ba loke jogu bola guling maibé komisaun iha kompeténsia uza estratejia meiu oioin atu bele realiza aventu ida-ne’e ho susesu.

Nain ba bola guling, Rui Amaral, konfirma komisaun loke feira iha ámbitu komemora 28 novembru ne’e loke mós atividade bola guling maibé kada stand ida selu taxa $900 baEstadu.

“Ami loke bola guling kada stand ida ami selu taxa ba estadu liuhusi komisaun organizadora 28 novembru ho osan $900 ne’e, ami entrega cash de’it,” nia dehan.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!