Fundu kontributivu kombatente libertasaun nasionál millaun $28 iha konta veteranu
DILI, 25 novembru 2022 (TATOLI)–Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, infroma to’o agora ne’e fundu kontributivu kombatente nasionál hamutuk milliaun $28 iha konta veteranu nian.
Notísia Relevante: Riak Leman: Fundu kontributivu kombatente millaun $27,6 iha konta fundu veteranu
“Osan fundu veteranu to’o agora milliaun $28 ona, maibé ida-ne’e sura ho nia lukru,” Riak Leman hateten ba Agência Tatoli, liuhosi telefónika, sesta ne’e.
Benefisiáriu ba fundu ne’e hamutuk na’in-27.828 no fundu kontributivu veteranu nian ne’e liuhosi kongresu konsellu nasionál kombatente libertasaun nasionál, dahuluk aprova deliberasaun númeru 01, iha loron 21 dezembru 2019, hodi fó kbiit ba SEAKLN hodi hahú implementa polítika kriasaun fundu investimentu ba veteranu.
Antes ne’e, iha loron 26 abril 2022, Governu liuhosi reuniaun Konsellu Ministru (KM) extraordinária aprova alterasaun daruak kriasaun fundu kombatente libertasaun nasionál .
Enkuantu, kriasaun fundu kombatente libertasaun nasionál hodi garante finansiamentu adekuadu ba programa apoiu ba kombatente libertasaun nasionál.
Antes ne’e, Ministru Prezidénsia Konsellu Ministru, Fidelis Manuel Leite, hateten kriasaun Fundu Kombatente Libertasaun Nasionál ho valór millaun $1.000 hodi garante finansiamentu adekudau ba programa apoiu ba KLN iha área oioin.
“Ho proposta-lei ida- ne’e mak sei prosede mós kriasaun Fundu Kombatente Libertasaun Nasionál ho valór millaun $1.000 (biliaun $1) hodi garante finansiamentu adekuadu ba programa apoiu ba Kombatente Libertasaun Nasionál mak hanesan iha área apoiu sosiál, edukasaun, saúde, empregu, asesu ba kréditu no atividade sira-ne’ebé hamosu rendimentu,” Fidelis Manuel Leite hateten.
Ninia baze legál iha aprovasaun dekretu-lei númeru 8/2020 6ª alterasaun ba dekretu-lei númeru 15/2008 ba pensaun liuhosi Konsellu Ministru, promulgadu hosi Prezidente Repúblika iha 19 marsu 2020, hodi kria Gabinete Apoiu Programa Fundu Investimentu Veteranu Timor-Leste ne’ebé despaixu deside hosi númeru 01/MACLN SEACLN/1/ 2020 tau matan ba fundu investimentu veteranu.
Jornalista : Osória Marques
Editór : Cancio Ximenes
