DILI, 25 novembru, 2022 (TATOLI)—Koordenadór Jerál Sekretariadu Tékniku Pagamentu Subsídiu Fim do Ano ba Uma Kain iha Ministériu Solidariedade Sosiál no Inkluzaun (MSSI), João Coimbra, hateten MSSI deside data tentativa ba pagamentu subsídiu $200 fim do ano ba uma kain iha territóriu nasionál ne’e akontese iha 06 dezembru tinan ne’e.
Notísia Relevante: PN espera Governu bele implementa subsídiu $200 la’o ho di’ak
Nia hatutan, kalendáriu ne’e MSSI submete on aba Governu liuhosi Konsellu Ministru (KM) atu diskute no sei aprova iha sá loron mak bele ekipa paga,entu sira bele halo pagamentu iha territóriu nasionál.
“Tanba ne’e, ekipa pagamentu ne’e kolabora ho tékniku sira hosi Ministériu Solidariedade Sosiál no Administrasaun Munisipál hodi fó atensaun ba prioridade ida-ne’e, nune’e iha inísiu dezembru halo pagamentu ba agregadu família sira iha territóriu nasionál, Data tentativa ne’e, iha loron 06 dezembru tinan ne’e,” João Coimbra hateten ba Agência Tatoli, hafoin prenxe programa Entrevista Eksluziva iha Faról, kinta ne’e.
MSSI liuhosi ekipa pagamentu sei koordena ho autoridade lokál suku no aldeia sira no mós pesoál sdministratsaun sira no Polísia Nasionál Timor-Leste (PNTL) nian, sei koordena diretamente ho ekipa pagamentu sira hodi ba diretamente iha rezidénsia benefisiáriu sira-nian.
Koordenadór ne’e mós hateten, atu apoiu ekipa pagamentu halo pagamentu iha territoriu nasionál ne’e, sei heta apoiu transporte hamutuk 248 no hosi hirak ne’e karreta 120 hosi Diresaun Jerál Patrimóniu Estadu nian no hirak seluk paradu ona.
Kona-ba rekursu umanu, nia dehan, ema na’in-452 hosi ekipa sekretariadu tékniku nian, iha+ funsionáriu hamutuk 900 hosi Governu lokál mak fó apoiu ba halo pagamentu iha kada suku.
MSSI sei hahú selu iha fulan-dezembru ba ba uma-kain sira no tuir dadus hosi Ministériu Administrasaun Estatál (MAE) família timoroan 400.000-resin mak sei sai hanesan benefisiáriu ba subsídiu fim do ano $200 ne’e.
Iha dekretu lei 37/2022, artigu 2 ne’e hateten katak família ne’ebé sai benefisiária ne’e ninia membru ida mak nia rendimentu liu ona $500 ne’e labele simu.
Jornalista : Osória Marques
Editór : Cancio Ximenes
