iklan

DILI, POLÍTIKA

PN espera Governu bele implementa subsídiu $200 la’o ho di’ak

PN espera Governu bele implementa subsídiu $200 la’o ho di’ak

Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 24 novembru 2023 (TATOLI)—Vise Prezidente Parlamentu Nasionál, Maria Angelina Sarmento, hateten espera Governu liuhosi ministéiru tutela bele implementa subsídiu fim do ano ba uma kain $200 la’o ho di’ak.

Notísia Relevante: Membru família ho rendimentu mensál $501 labele simu subsídiu $200

“Hein katak subsídiu $200 fim do ano ba kada uma kain distribuisaun ba duni família vulneravél bele la’o ho di’ak,” Vise PN ne’e hateten ba jornalista sira iha PN, kinta ne’e.

Nune’e, entidade ne’ebé ezekuta distribuisaun subsídiu ne’e sei hahú iha fim novembru to’o dezembru tinan ne’e atu haree família rendimentu ki’ik tuir dadus dezagregadu ne’ebé rejistu hosi Ministéiru Solidariedade Sosiál no Inkluizasaun (MSSI) no Ministériu Administrasaun Estatál (MAE) iha sistema no autoridade lokál sira mós sei envolve.

“Ha’u hanoin autoridade lokál sira hatene malu iha sira-nia aldeia no suku ne’ebé mak funsionáriu públiku no ajénsia internasionál ho saláriu $500 ba leten hanoin ema hatene malu aliénde dadus hosi MAE ne’ebé iha dadus detallu,” nia hateten.

Iha mós entidade halo fiskalizasaun no kontrolu hanesan Komisaun Anti Korrupsaun (KAK) ba monitorizasaun.

“Ne’ebé sira mós halo monitorizasaun ba sistema uluk ita atribui ona ba uma kain sira iha 2020 bainhira hasoru COVID-19 iha keixa barak aprezenta ba KAK no ministéiru tutela kona-ba ema sira ho saláriu $500 ba leten simu hotu subsídiu. Ne’ebé, sira iha ona informasaun totál família iha Timor-Leste tama kategória vulneravél,” nia dehan.

Nune’e Vise PN ne’e espera katak entidade tutela ne’ebé iha dadus bele hola papél proativu atu koordena Governu ba sira-ne’ebé la prenxe kriteira bele retira.

Governu tenke apiende beibeik sistema ne’ebé iha hodi halo atendimentu ho di’ak ba públiku mezmu ho dezáfiu, tanba durante iha BNCTL ajuda tebes Governu ba distribuisaun subsídiu ba  uma kain sira.

Vise Bankada CNRT, Deputadu Patrocínio Fernandes, hateten programa ne’e tau ona iha Orsamentu Jerál Estadu (OJE) 2022 tenke ezekuta lalais tanba PN aprova tiha ona ba povu uma kain iha direitu duni atu simu.

“Ita iha ona novembru nia rohan, tama ona ba dezembru hein katak rezolve lalais tiha,” nia dehan.

Tan ne’e, atu implementasaun programa ne’e la’o di’ak ba duni ema ne’ebé elizivel mak  Parlamentu, mídia no parte hotu atu kontrola nafatin.

Notísia Relevante: Semana ne’e, MSSI-MAE sei asina diploma ministeriál ba subsídiu $200

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!