VIQUEQUE, 25 novembru 2022 (TATOLI)–Prezidente Konsellu Veteranu munisípiu Viqueque, Adriano do Cámara, fó hanoin ba abitante hotu hodi hasa’e bandeira nasionál iha ida-ida ninia rezidénsia iha ámbitu komemorasaun loron proklamasaun independénsia ba dala-47 (28 novembru 1975).
“Ha’u sujere Autoridade lokál sira tenke fó koñesimentu ba ita-nia sidadaun sira iha komemorasaun 28 novembru, hotu-hotu hasa’e bandeira iha ninia uma oin. Tanba loron ne’e importante ba ita-nia nasaun. Ema balun la fó valór ba loron ida-ne’e, tanba ne’e autoridade lokál sira tenke esklarese ba povu hodi bele hatene,” Prezidente Konsellu Veteranu hateten ba Agência Tatoli, iha postu Viqueque Vila, sesta ne’e.
Notísia relevante: Veteranu Viqueque 50 sei simu kondekorasaun iha ámbitu komemora proklamasaun independénsia
Nia haktuir, iha tempu okupasaun Indonénzia, invazór sira haruka povu Timor-Leste sira hasa’e bandeira Indonézia no momentu ne’ebá hotu-hotu kumpre.
“Uluk tempu okupasaun ema haruka ne’e tantu ema kiak no riku hotu hasa’e bandeira. Tanba sá ita hetan ona independénsia, ita labele fó valór ba ita-nia nasaun, ita labele fó sala ba ita-nia povu, sala ne’e hosi autoridade sira ladún hakbesik ba povu hodi esklarese. Tanba ne’e ita-nia povu ladún hatene valór istóriku iha loron proklamasaun independénsia,” nia akresenta.
Iha fatin seluk, Xefe suku Macadique, postu administrativu Uatulari, munisípiu Viqueque, Afonso dos Reis, hateten, nia parte sei aviza populasaun hodi hasa’e Bandeira.
“Ida-ne’e ha’u sei apelu tamas ai uma fó hatene ba komunidade,” nia tenik.
Tuir observasaun Agência Tatoli iha terrenu, nota katak daudaun abitante Viqueque hahú hasa’e bandeira iha ida-idak ninia uma.
Jornalista : Vitorino Lopes da Costa
Editora : Julia Chatarina
