iklan

HEADLINE, MUNISÍPIU, VIQUEQUE

Veteranu Viqueque 50 sei simu kondekorasaun iha ámbitu komemora proklamasaun independénsia

Veteranu Viqueque 50 sei simu kondekorasaun iha ámbitu komemora proklamasaun independénsia

Prezidente Konsellu Veteranu munisípiu Viqueque, Adriano do Amaral. Imajen Tatoli/Vitorino Lopes da Costa

VIQUEQUE, 21 novembru 2022 (TATOLI)–Prezidente Konsellu Veteranu munisípiu Viqueque, Adriano do Amaral, informa, veteranu munisípiu Viqueque na’in-50 sei simu kondekorasaun ba orden haat, iha ámbitu komemorasaun loron proklasaun independénsia ba da-47 (28 novembru 1975).

“Estadu rekoñese sira-nia partisipasaun iha luta libertasaun independénsia,” Prezidente Konsellu Veteranu munisípiu Viqueque hateten ba Agência Tatoli, iha ninia rezidénsia, Loi-Huno, postu Ossu, segunda ne’e.

Notísia relevante: Veteranu na’in-628 sei simu kondekorasaun iha 28 novembru

Governu sei atribui orden funu-na’in, Nicolau Lobato, Gerilla no Loriko Asu’wain.

Tuir Adriano do Amaral, maski iha veteranu balun partisipa luta la’ós iha tempu naruk nia laran, maibé ho kontribuisaun sira hosi parte hotu mak bele hetan independénsia. Tanba ne’e, iha 28 novembru Konsellu Veteranu serbisu hamutuk Governu hodi fó kondekorasaun ba kombatente sira iha faze dahuluk iha munisípiu Viqueque.

“Aban bainrua faze daruak sei iha balun mak hetan tan. Ita labele kondekora veteranu Viqueque dala-ida tanba veteranu Viqueque hamutuk 1.000 resin,” nia akresenta.

Kondekorasaun sei atribui hosi membru VIII Governu Konstitusionál, membru Parlamentu Nasionál, Konsellu Veteranu, Administradór Viqueque no Komandante munisípiu Viqueque.

Kondekorasaun ba veteranu na’in-50 hosi postu lima hanesan Viqueque Vila 12, Uatulari 12, Ossu 10, Uatucarbau sia no Lacluta hitu.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!