iklan

JUSTISA, DILI

PTR seidauk pronunsia rekursu MP ba kazu droga

PTR seidauk pronunsia rekursu MP ba kazu droga

Prezidente Tribunál Rekursu, Deolindo dos Santos. Imajen Tatoli /Egas Cristovão.

DILI, 25 novembru 2023 (TATOLI)—Prezidente Tribunál Rekursu (PTR), Deolindo dos Santos, seidauk pronunsia ba rekursu hosi Ministéiru Públiku (MP) liga ba kazu droga ne’ebé envolve hosi arguidu na’in-sia (9).

Notísia Relevante: MP prepara rekursu kontra desizaun TDD ba kazu tráfiku no ilísitu droga 

“Ha’u hanoin bainhira ita trata kazu ne’ebé sei pendente iha Tribunál Rekursu no primeira instánsia tanba ha’u mós juiz. Entaun, ha’u labele hateten desizaun sai ona metan ka mutin maibé se desizaun sai ona ka seidauk presiza konfirma, tanba kazu ne’e barak ita lahatene kazu ne’e konkretu deside ona ka seidauk,” Deolindo dos Santos hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, sesta ne’e.

Nune’e, nia dehan, bele ba iha seksaun iha prosesu iha Tribunál hodi buka hatene katak kazu ne’e deside ona ka seidauk, tanba prazu sempre prontu lais bainhira trata kestaun sira-ne’ebé koloka iha Tribunál Rekursu.

“Medida koasaun entaun haree tuir lei sempre iha prioridade, desizaun sempre lais,” nia dehan.

Antes ne’e, Ministériu Públiku (MP) hahú prepara rekursu ba Tribunál Rekursu hodi kontra desizaun primeiru interogatórriu Tribunál Distritál Dili (TDD)-nian kona-ba kazu ilísitu ba droga ne’ebé aplika medida koasaun Termu Indetidade Rezidénsia (TIR) no aprezentasaun periódika ba arguidu na’in-sia.

Tribunál Distritál Dili (TDD) liuhosi juiz José Gonçalves aplika medida koasaun Termu Identidade Rezidénsia (TIR) no aprezentasaun periódika ba arguidu na’in-sia (9) ho inisiál DGS, MM, B, MAA, AY, SSO, M, CRMS no J tanba konsidera faktu la sufisiente.

Nune’e, Prokuradór Rogério Viegas, hateten hahú prepara rekursu hodi submete ba Tribunál Rekursu (TR) hodi haree no anula desizaun TDD kona-ba medida koasaun TIR no aprezentasaun periódika ba fali medida koasaun  prizaun preventiva ba arguidu na’in-sia (9) ba kazu ilísitu ba droga.

“Hanesan prokuradór ne’ebé ka’er kazu ne’e, daudaun ne’e ha’u prepara ona rekrusu tuir prazu loron 15, hahú desizaun Tribunál iha primeira instánsia hodi hato’o ba Tribunál Rekursu atu haree fali ka anula desizaun Tribunál Distritál Dili nian hosi medida koasaun termu identidade rezidénsia (TIR), no aprezentasaun períodika ba fali medida koasaun prizaun preventive,”  Prokrudór Rogerio Viegas hateten ba TATOLI via telefônika foin lala’is ne’e.

Tanba, nia dehan, maske iha alegasaun interrogatóriu dahuluk, MP husu akuza arguidu sira ho krime tráfiku no atividade ilísita ne’ebé previstu iha artigu 7 (tráfiku no atividade ilísita) lei númeru 02/2017, 25 janeiru, maibé Tribunál Distritál Dili aplika TIR no aprezentasaun periódika.

Nune’e, Prokuradór Rogerio Veigas dehan MP la aseita hodi hato’o rekursu ba Tribunál Rekursu atu anula medida koasaun TIR no aprezentasaun periódika ba fali médida koasaun prizaun preventiva

“Posibilidade ba arguidu nain-sia ne’ebé envolve kazu droga foin dadaun ne’e sei halo kontinuasaun julgamentu, maibé ha’u labele ko’alia buat ruma tanba kazu ne’e sei iha hela prosesu nia laran no ministériu públiku mós kontinua buka evidénsia,” Prokuradór Rogerio hateten.

Jornalista  : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!