iklan

HEADLINE, OÉ-CUSSE (RAEOA)

Autoridade adia hatuur fatuk dahuluk projetu estrada nasionál Pante Makasar-Oésilo

Autoridade adia hatuur fatuk dahuluk projetu estrada nasionál Pante Makasar-Oésilo

Prezidente Autoridade RAEOA, Arsénio Paixão Bano.Imajen Tatoli/Egas Cristóvão

OÉ-CUSSE, 27 novembru 2022 (TATOLI)–Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, adia serimónia hatuur fatuk dahuluk ba projetu estrada nasionál hosi sub-rejiaun Pante Makasar liga ba sub-rejiaun Oésilo tanba iha konkorente projetu balun hato’o reklamasaun.

“Tuir loloos ohin Primeiru-Ministru atu halo lansamentu ba estrada nasionál projetu estrada hosi sub-rejiaun Pante Makasar liga bá sub-rejiaun Oésilo, iha prosesu ami fó sai avizu, informa ba públiku katak, empreza PT. Hutama Karya mak sai manán na’in ba projetu ne’e, maibé iha konkorente ida seluk PT. Waskita Karya halo reklamasaun,” Autoridade RAEOA hateten iha ámbitu inaugurasaun projetu reabilitasaun estrada ruráll iha suku Bobokase, sub-rejiaun Pante Makasar, Oé-cusse, domingu ne’e.

Notísia relevante: Empreza Hutama Karya mak sei reabilita estrada nasionál Pante Makasar-Oésilo

Ho razaun ida-ne’e maka Autoridade RAEOA deside adia no husu fali ba painél sira atu halo avaliasaun hodi responde ba reklamasaun empreza ninian, tuir regra aprovizionamentu ne’ebé vigór.

“Entaun ohin Primeiru-Ministru la konsege lansa projetu ne’e, maibé ha’u informa tan katak konstrusaun estrada nasionál hosi Pante Makasar ponte Noefefan, liga bá sub-rejiaun Nítibe, servisu tékniku la’o daudaun ona, ba pakote I sei to’o Oénunu, suku Suni-Ufe, ho distánsia kilómentru 16,” nia akresenta.

Entretantu, iha loron 05 novembru ne’e tuir rezultadu avaliasaun hosi Unidade Aprovizionamentu RAEOA fó sai katak, empreza internasionál PT. Hutama Karya mak sai manán na’in ba projetu estrada nasionál hosi sub-rejiaun Pante Makasar liga ba sub-rejiaun Oésilo.

Nune’e, valór orsamentu ba projetu estrada nasionál ne’e hamutuk $33.591.867 hodi mellora estrada nasionál ne’e hosi Pante Makasar suku Cunha to’o fronteira Napan, suku Bobometo sub-rejiaun Oésilo, ho distánsia kilómetru 18.

Fundu konstrusaun ne’e Autoridade RAEOA prevee iha Orsamentu Jerál Estadu (OJE) 2022 nian, ho durasaun serbisu durante tinan-rua.

Jornalista   : Abílio Elo Nini

Editora        : Julia Chatarina

iklan
iklan

Leave a Reply

iklan
error: Content is protected !!