iklan

HEADLINE, MUNISÍPIU, OÉ-CUSSE (RAEOA)

Governu lansa atribuisaun sertifikadu títulu na’in ba rai iha Oé-cusse

Governu lansa atribuisaun sertifikadu títulu na’in ba rai iha Oé-cusse

Ministru Justisa, Tiago Sarmento Amaral, atribui sertifikadu rai ba sidadaun iha RAEOA, iha otél Ambeno Oé-cusse, domingu (27/11). Imajen/Mídia ZEESM

OÉ-CUSSE, 27 novembru 2022 (TATOLI)—VIII Governu Konstitusionál liuhosi Primeiru-Ministru (PM), Taur Matan Ruak, no Ministru Justisa, Tiago Sarmento Aramál, domingu ne’e, lansa atribuisaun sertifikadu títulu na’in ba rai hamutuk neen, ba kategoria uma ba veteranu no Uma Kbiit Laek (UKL) iha Rejiaun Administrativa Espesiál Oé-cusse Ambeno (RAEOA).

Primeiru-Ministru, Taur Matan Ruak, akompaña hosi Ministru Justisa, Tiago Sarmento Amaral, lansa atribuisaun sertifikadu rai ba sidadaun iha RAEOA, iha otél Ambeno Oé-cusse, domingu (27/11). Imajen/Mídia ZEESM

Biban ne’e, Xefe Governu orgullu tanba Estadu no Governu Timor-Leste, liuhosi Ministériu Justisa (MJ) marka tan istoria ida, ne’ebé ema hotu hein no mehi atu hetan, tanba durante tinan barak iha okupasaun portugués no tinan 24 okupasaun Indonézia, timor-oan sira laiha sertifikadu no la sai na’in ba sira-nia rai rasik.

Nune’e, Hafoin Timor-Leste restaura independénsia no tama ba tinan 20, ikus mai VIII Governu Konstitusionál lansa ona ba publiku sertifikadu títulu na’in ba rai ba sidadaun sira iha RAEOA no iha munisípiu 12 sira iha ámbitu komemorasaun loron proklamasaun independénsia ba dala-47 (28 novembru 1975).

“Primeira vez fó atribuisaun títulu propriedade ba ita-nia sidadaun sira iha Oé-cusse, foin daudaun Ministru Justisa husu ha’u tenke lansa iha ne’e, tanba istória foun ba Timor-Leste, entaun lansamentu tenke halo iha Oé-cusse, tanba Oé-cusse kuandu laiha Timor-Leste mós laiha. Tanba ne’e tenke fó uluk iha Oé-cusse, ” Xefe Governu hateten iha ámbitu lansamentu sertifikadu títulu na’in ba rai, iha otél Ambeno Oé-cusse.

Xefe Governu felisita orgaun Parlamentu Nasionál (PN) tanba konsege aprova lei títulu na’in ba rai no hetan promulgasaun hosi Prezidente Repúblika, nune’e mós fó parabéns espesiál ba MJ, ne’ebé halo serbisu maka’as to’o ohin loron bele akontese serimónia atribuisaun sertifikadu.

“Governu preokupa oinsá sidadaun ida iha nia propriedade rasik, iha direitu ne’ebé Konstituisaun fó, infelizmente tinan 20 ona ita la konsege no to’o ohin maka ita hakat tan. Ita agradese ba entidade sira ne’e no ohin sai realidade, ne’ebé povu Timor-Leste hein tinan barak ona,” nia akresenta.

Notísia relevante: Prezidenti Republika Promulga Ona Lei Rai

Iha sorin seluk, Ministru Justisa, Tiago Sarmento Amaral, informa, faze lansamentu ne’ebé realiza iha ámbitu komemorasaun loron proklamasaun independénsia ba dala-47, Primeiru-Ministru, Taur Matan Ruak, atribui uluk sertifikadu na’in ba rai ka sertidão direito propriedade ba sidadaun na’in-neen iha RAEOA no iha loron 28 novembru ema na’in-33 sei simu tan iha munisípiu ida-idak.

Governante ne’e dehan, sertifikadu títulu na’in ba rai iha pontu importante neen maka hanesan, dahuluk, bainhira iha ona sertifikadu na’in ba rai, atu asegura ka fó seguransa ba sidadaun sira-nia direitu ba rai (prevene ema seluk hadau na’in loloos nia rai), daruak, bainhira iha ona sertifikadu na’in ba rai bele fasilita sidadaun sira atu asesu kréditu iha banku sira, datoluk, ho sertifikadu na’in ba rai bele hamenus disputa rai tanba baliza klaru ona iha terrenu no informasaun loloos kona-ba na’in ba rai rejistadu iha baze dadus kadastrál.

Dahaat, ho sertifikadu na’in ba rai bele prevene fraude iha prosesu fa’an no sosa rai ka fasilita prosesu fa’an no sosa rai tuir dalan legál, dalimak, bele fó value added (nilai tambahan) iha prosesu fa’an no sosa rai, ezemplu iha legalidade, nune’e folin rai sei a’as liu kompara ho rai ne’ebé laiha sertifikadu títulu na’in ba rai no iha pontu ikus liu maka sidadaun sira bele halo kontratu ho setór privadu sira ka investidór sira ho seguransa diak liu kona-ba direitu ba rai.

“Faze inísiu ne’e, Ministériu Justisa atribui ba sidadaun ne’ebé okupa Uma Kbiit Laek no Veteranu 24 anos ne’ebé okupa uma ne’ebé Governu fó hamutuk neen iha RAEOA no simultáneamente Governu mós atribui ba sidadaun na’in-33 seluk iha munisípiu 12,” Tiago Sarmento, relata.

Benefisiáriu 39 simu sertifikadu rai iha faze dahuluk

Totál benefisiáriu ne’ebé sei simu sertifikadu na’in ba rai iha faze dahuluk tinan 2022 ne’e hamutuk ema na’in-39 iha territóriu Timor nasionál, ne’ebé hosi númeru ne’e UKL na’in-33 no rai hosi uma veteranu hamutuk neen maka hanesan, iha munisipíu Aileu rua, Ainaro rua, Baucau rua, Bobonaro tolu, Covalima tolu, Dili hitu, Ermera tolu, Lautém haat, Liquiçá tolu, Manatuto ida, Manufahi rua, Viqueque ida no RAEOA neen.

“Ita-nia progresu no preparasaun ba atribuisaun sertifikadu títulu na’in ba rai ne’e hahú kedas iha fevereiru 2022, ho promulgasaun Kódigu Rejistu Prediál no promulgasaun dekretu-lei Informasaun Kadastrál iha agostu 2022,” MInistru Tiago Sarmento, dehan.

Notísia relevante: KM aprova dekretu-lei Kódigu Rejistu Prediál

Atribuisaun sertifikadu títulu na’in ba rai ne’e bazeia ba baze legál sira kona-ba administrasaun rai maka hanesan lei rai númeru 13/2017 kona-ba Regime Espesiál ba definisaun titularidade bens imóvel, dekretu-lei núeru 14/2022 kona-ba Kódigu Rejistu Prediál, dekretu-lei númeru 65/2022, kona-ba Informasaun Kadastrál Prediál, diploma ministeriál kona-ba Modelu Sertidaun Direitu Propriedade públika iha loron 09 novembru 2022.

Nune’e mós, diploma ministeriál kona-ba Úniku Identifikasaun Prédiu públika iha loron 09 novembru 2022, diploma ministeriál Sertidaun Rejistu Prediál públika iha loron 09 novembru 2022, diploma ministeriál Modelu dos Impresu Rejistu Prediál públika iha loron 09 novembru 2022.

“Primeiru-Ministru, Taur Matan Ruak, diretamente fó orientasaun ba tékniku DGTP kona-ba atribuisaun títulu na’in ba rai, Iha loron 09 setembru 2022. Ho ida ne’e, hahú iha loron 26 setembru to’o 11 outubru, ekipa téknika halo kedan levantamentu terrenu ka rekonstrusaun baliza iha munisípiu Aileu, Ainaro, Covalima, Manufahi, Manatuto, Baucau, Viqueque, Lautém, Liquiçá, Ermera, Bobonaro no RAEOA no iha loron 17 to’o 27 outubru, ekipa kontinua halo levantamentu terrenu ka rekonstrusaun baliza iha munisípiu Dili,” Ministru haktuir.

Hafoin atividade iha terrenu, ekipa halo prosesamentu, analiza no verifika dadus iha loron 28 outubru to’o 09 novembru 2022, no iha loron 16 novembru 2022, publika ona diploma omologasaun no daudaun sei finaliza hela prosesu imprimi sertidaun direitu ba propriedade.

“Ha’u hodi Ministériu Justisa nia naran, hakarak agradese ba Primeiru-Ministru nia apoiu no ba Ministériu Administrasaun Estatál, Ministériu Asuntu Kombatente Libertasaun Nasionál, Ministériu Petroleum no Minerál  inklui parte hotu ne’ebé apoiu ona serbisu ida-ne’e, nune’e bele implementa atribuisaun sertifikadu títulu na’in ba rai ohin iha RAEOA,” governate ne’e agradese.

Prezidente Autoridade RAEOA, Arsénio Paixão Bano, agradese ba Governu sentrál tanba bele hili Oé-cusse hodi realiza serimónia atribuisaun sertifikadu títulu na’in ba rai.

“Ha’u lori komunidade Oé-cusse nia naran, hakarak agradese ba Primeiru-Ministru no membru Governu sira mai hosi Governu sentrál, tanba iha istória foun, bele hili ami-nia rejiaun atu lansa sertifikadu títulu na’in ba rai,” nia orgullu.

Serimónia ne’e partisipa hosi Vise-Prezidente PN, Deputada Angelina Sarmento no membru komisaun E PN, Ministru Asuntu Parlamentár no Komunikasaun Sosiál,  Francisco Martins da Costa Pereira Jerónimo, Komandante Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) iha RAEOA.

Nune’e mós, partisipa hosi membru 𝐷𝑒𝑤𝑎𝑛 𝑃𝑒𝑟𝑤𝑎𝑘𝑖𝑙𝑎𝑛 𝑅𝑎𝑘𝑦𝑎𝑡 𝐷𝑎𝑒𝑟𝑎ℎ (DPRD) hosi Belu, Nusa Tenggara Timur (NTT), Indonezia, Autoridade judisiáriu sira iha RAEOA, inklui komunidade lokál.

Jornalista   : Abílio Elo Nini

Editora        : Julia Chatarina

iklan
iklan

Leave a Reply

iklan
error: Content is protected !!