HEADLINE, LEI, NASIONÁL

KM aprova dekretu-lei Kódigu Rejistu Prediál

KM aprova dekretu-lei Kódigu Rejistu Prediál

Vise Primeiru-Ministru no Ministru Planu no Ordenamentu (MPO), José Maria dos Reis, prezide reuniaun Konsellu Ministru, iha Palásiu Governu, kuarta (12/01). Imajen TATOLI/Francisco Sony

DILI, 12 janeiru 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu dekretu-lei Kódigu Rejistu Prediál ne’ebé aprezenta hosi Ministru Justisa, Manuel Cárceres.

“Inisiativa ne’e ho objetivu atu permite rejistu direitu propriedade ne’ebé sidadaun no ema koletiva sira hetan ona ka sei hetan,” Ministru Prezidénsia Konsellu Ministru, Fidelis Manuel Leite Mangalhães, relata, hafoin reuniaun ezekutivu, iha Palásiu Governu.

Tuir Portavós Governu, sistema rejistu prediál ne’e ho karaktér transferénsia no seguru, ne’ebé sei fó konfiansa ba komérsiu jurídiku imobiliáriu hodi bele funsiona hanesan instrumentu atu hasa’e komérsiu jurídiku nomós komérsiu arrendamentu ka merkadu finanseiru.

Notísia relevante: Kódigu rejistu prediál ho kódigu kadastru nu’udar mekanizmu emite sertifikadu na’in ba rai

“Ida-ne’e hanesan pasu importante ida ba implementasaun lei rai, rai no direitu ba rai ne’e importante tebes,” Ministru akresenta.

Dekretu ne’e la’os de’it importante ba dezenvolvimentu ekonómiku Timor-Leste no ba páz no estabilidade, maibé fó notasaun justisa ba sidadaun sira, katak sai na’in duni ba rai no bele sente seguru iha atividade loron-loron.

“Ida-ne’e ita konsidera pasu importante ne’ebé ohin Konsellu Ministru aprova no sei haruka tuir dalan legál ba Prezidente Repúblika,” nia dehan.

Jornalista : Arminda Fonseca

Editora     : Julia Chatarina

iklan
iklan

Comments are closed.

iklan
error: Content is protected !!