COVALIMA 27 novembru 2022 (TATOLI ) –Administradór munisípiu Covalima, Francisco de Andrade, akompaña hosi Komandante Polísia Nasionál Timor-Leste (PNTL) munisípiu Covalima hamutuk komunidade tau ai-funan iha momentu masakre setembru negro 1999.
Inisiativa ne’e hodi komemora loron proklamasaun independénsia ba dala-47 (28 novembru 1975) no presta omenajen ba eroi no mártir sira ne’ebé fó sira nia-isin no klamar ba rai-ida ne’e.
“Atu komemora loron nasionál, ita sempre husu misa no hafoin misa ita mai tau ai-funan hodi presta omenajen ba eroi sira iha momentu masakre setembru negro 1999, n’e la’ós foin mak akontese maibé bai-bain tiha ona,” Autoridade covalima, informa ba Agência Tatoli hafoin tau ai-funan iha momentu masakre setembru negro, domingu ne’e.
Notísia relevante: Governu halo abertura feira iha Manatuto komemora loron proklamasaun independénsia dala-47
Maski nune’e, komunidade ladún partisipa másimu iha serimónia tau ai-funan tanba kondisaun udan no balun halo preparasaun ba serimónia komemorasaun proklamasaun independénsia.
Antes ne’e, Prezidente Komisaun organizadora, Francisco de Jesus Alves, hateten, atu komemora loron nasionál 28 novembru tinan ne’e aloka orsamentu $ 1.400, nune’e diretór no funsionáriu sira halo kontribuisaun hodi finansia atividade sira-ne’ebé atu anima komunidade.
Atividade ne’ebé realiza mak hanesan feira no kalan kulturál, ne’ebé sei aprezenta hosi estudante sira.
Jornalista : Celestina Teles
Editora : Julia Chatarina
