MANATUTO, 23 novembru 2022 (TATOLI)–Governu liuhosi Ministériu Turizmu, Komérsiu no Indústria (MTKI), ho kooperasaun Ministériu Administrasaun Estatál (MAE), kuarta ne’e, halo abertura ba feira iha munisípiu Manatuto hodi komemora loron proklamasaun independénsia dala-47 (28 novembru 1975).
Atividade ne’e loke hosi Vise-Ministru Administrasaun Estatál, Lino Torrezão, Vise Ministra Turizmu Komunitária no Kulturál, Inácia da Conceição Texeira, akompaña mós hosi autoridade Manatuto, no reprezentante Polísia Nasionál Timor-Leste (PNTL) inklui FALINTIL-Forsa Defeza Timor-Leste (F-FDTL).
Iha biban ne’e, Vise-Ministru Lino Torrezão, hato’o agradesementu ba parte hotu ne’ebé mak partisipa iha feira.
“Governu sempre buka maiu atu tinan-tinan realiza feira ne’e di’ak liu hodi aumenta rendimentu populasaun. Feira ne’e la’ós de’it ba bola guling, maibé nu’udar dalan ida atu hatudu ita-nia kbiit no valór ukun-an ne’ebé ita hetan ona durante tinan-20 ba mundu katak ita mós bele. Hakarak hato’o parabéns ba partisipante sira hotu ne’ebé mak halibur ona iha feira,” Vise-Ministru ne’e, hateten hafoin abertura feira, iha suku Aiteas, postu administrativu Manatuto Vila, munisípiu Manatuto, kuarta ne’e.
Notísia relevante: Governu prevee $400.000 ba selebrasaun loron proklamasaun independénsia
Governante ne’e konsidera, atividade ne’e reprezenta moris hamutuk no unidade. Tanba ne’e, iha feira ne’e labele buka lukru de’it, maibé atu hatene no rekoñese lisan hanesan ema timor-oan katak fa’an sasán ho folin baratu.
“Bune’e bainhira ema seluk sosa ho laran kontente. Ita loke sorteiu hodi fó surpreza ba ema seluk, ema kontente tanba hetan sorte no ita mós kontente tanba fó surpreza ba ema seluk,” nia akresenta.
Iha biban hanesan, Koordenadór Jerál ba feira, Jelino Soares, informa, partisipante non komersiál no komersiál hamutuk 112, kompostu hosi komersiál 28, artezenatu 36, inklui hahán no hemu 48.
“Atividade ida-ne’e kada tinan sempre halo, ne’ebé serbisu hamutuk ho MAE. Partisipasaun di’ak tebes tanba liña ministériu sira mós partisipa no parseiru hanesan banku no operadór telekomunikasaun sira,” Atuál Diretór Jerál Turizmu tenik.
Nia dehan, feira ne’e iha mós jogu tradisionál hanesan bola guling, negosiante kiik sira, no grupu produtivu sira hodi fa’an sira-nia produtu artezenatu.
“Feira ida-ne’e momentu di’ak tebes ba sira atu promove produtu hanesan artezenatu no lokál sira. Enkuantu munistériu sira ida-idak aprezenta sira-nia produtu ne’ebé mak sira uza durante serbisu hodi serví públiku,” nia relata.
Grupu fa’an tais no artezenatu sira ne’e hosi Manatuto, Liquiçá Dili no Baucau, ne’ebé antes ne’e sira sempre partisipa feira.
Aleinde ne’e, eventu ne’e la’ós feira de’it maibé mós atividade seluk hosi Autoridade Nasionál Petróleu no Minerál (ANPM), ne’ebé sei realiza atividade hanesan kompetisaun dada tali no serteme ba estudante sira, inklui MTKI sei realiza mós kompetisaun gastronomia.
“Ida-ne’e hala’o hodi motiva ita-nia timor-oan sira ne’ebé iha esperiénsia tein hahán hosi produtu lokál,” nia salienta.
Feira ne’e hahú iha loron kuarta ohin (23 novembru) no sei termina iha loron 27 novembru 2022.
Jornalista : Antónia Gusmão
Editora : Julia Chatarina
